ភ្នំពេញ៖ របៀបតុបតែងលម្អមុខរោងជ័យបែបសិល្បៈសហសម័យដែលមានក្បាច់ក្បូរប្លែកៗខាងក្រៅមានធាងដូង ស្លឹកដូង ផ្កាភ្ញី ដើមអំពៅ និងផល្លានុផលស្រស់ៗ នៅក្នុងឱកាសនៃការប្រារព្ធពិធីមង្គលការ ពិសេសសម្រាប់ជីវិតគូ ចំពោះកូនកំលោះកូនក្រមុំ ជាស្នាដៃរបស់ក្រុមវិចិត្រករមួយក្រុម កំពុងតែទាក់ទាញចំណាប់អារម្មណ៍ខ្លាំង។
លោក សេក វិសាល ជានិស្សិតបញ្ចប់ការសិក្សានៃមហាវិទ្យាល័យសិល្បៈសូនរូប ជំនាញឯកទេសវិចិត្រកម្ម នៅសាកលវិទ្យាល័យភូមិន្ទវិចិត្រសិល្បៈឆ្នាំ ២០១៧ ដែលជាសមាជិកម្នាក់នៃក្រុមវិចិត្រករបង្កើតស្នាដៃតុបតែងរោងការបែបសិល្បៈសហសម័យនោះប្រាប់ឲ្យដឹងថា៖ «ក្រោយពីការបង្ហាញសា្នដៃពួកយើង ដែលរៀបចំដំឡើង ពេលប្រារព្ធពិធីខួប ១០០ ឆ្នាំ របស់សាលារចនា (ឆ្នាំ ២០១៧) មកនោះ ក៏មានគេចាប់អារម្មណ៍ និងគាំទ្រពីបងប្អូនយើងរហូតមក។ សព្វថ្ងៃនេះ សេវាកម្មស្នាដៃសិល្បៈសហសម័យនេះ មានការគាំទ្រច្រើន ខណៈពេលខ្លះយើងមិនបានទទួលផងដែរ»។
វិចិត្រករជាកូនពៅនៅក្នុងគ្រួសាររូបនេះ ក៏ធ្លាប់បង្កើតនូវស្នាដៃច្នៃម៉ូដ សម្លៀកបំពាក់តំណាងជាតិ ដ៏លេចធ្លោឲ្យបេក្ខនារីជាកញ្ញាឯកកម្ពុជា ដែលបង្ហាញនៅបរទេស ៣ ប្រទេសផងដែរ មានដូចជាប្រទេស ចិន ម៉ាឡេស៊ី និងមីយ៉ាន់ម៉ា។ វិចិត្រករវ័យ ២៤ ឆ្នាំ បានបញ្ជាក់ថា៖ «សម្រាប់ច្នៃម៉ូដ ខ្ញុំធ្លាប់បានច្នៃម៉ូដឲ្យភ្នាក់ងារ ដែលដឹកនាំកញ្ញាឯកកម្ពុជាទៅប្រកួតបវរកញ្ញាតំណាងកម្ពុជានៅចិនឆ្នាំ ២០១៧ និងនៅម៉ាឡេស៊ី ក៏ឆ្នាំ ២០១៧។ លុះដល់ឆ្នាំ ២០១៩ ច្នៃម៉ូដឲ្យក្រុមភ្នាក់ងារកញ្ញាឯកកម្ពុជា ទៅមីយ៉ាន់ម៉ា»។
លោក សេក វិសាល ពុំមានសាច់ឈាមជាប់ជាអ្នកសិល្បៈនោះឡើយ ដោយគ្រាន់តែមានជីតា គឺជាតន្រ្តីករបុរាណ។ គំនិតច្នៃប្រឌិតតុបតែង នៅតាមមុខរោងការមានក្បាច់សិល្បៈដោយបូកបញ្ចូលគ្នារវាងបុរាណ និងសម័យ ឬហៅថាសិល្បៈសហសម័យនោះ លោកចាប់ផ្តើមជាមួយក្រុមខ្លួន ក្រោយបញ្ចប់ការសិក្សាជំនាញសិល្បៈតាំងពីឆ្នាំ ២០១៧ មកនោះ។
ទន្ទឹមការតុបតែងរោង ដែលមើលទៅស្រស់ស្អាត និងខុសប្លែកទាក់ទាញអារម្មណ៍ពីមហាជននោះ ក្រុមអ្នកឌីហ្សាញ ក៏ទាមទារដឹងពីកាលបរិច្ឆេទពីម្ចាស់ពិធីមុនយ៉ាងហោចណាស់ កន្លះខែដែរ ដើម្បីមានភាពងាយស្រួលក្នុងការរៀបចំប្លង់គំនិតច្នៃប្រឌិត និងបង្កើតក្បាច់ក្បូរផ្កាភ្ញីសិល្បៈឲ្យសមសួនតាមទំហំជាក់ស្តែង។
លោក សេក វិសាល ក៏បញ្ជាក់ថា៖ «ការដំឡើងក្នុងពិធីមង្គលការ យើងតម្រូវឲ្យម្ចាស់រោងការ គាត់ជូនដំណឹងមុនកន្លះខែ ដើម្បីយើងអាចមានពេលដំឡើងគ្រោងដែកជាមុន។ ខណៈពេលសម្រាប់តុបតែងខាងក្រៅ ដែលមានធាងដូង ស្លឹកដូង ផ្កាភ្ញី និងផ្លែឈើមួយចំនួនទៀតនោះ ក៏ត្រូវការពេលប្រមាណ ៤-៥ ថ្ងៃ មុនថ្ងៃចូលរោងការដែរ ទើបអាចរៀបចំរួចរាល់»៕