ភ្នំពេញៈ សិស្សវិទ្យាល័យ នីសិនគ្រីបអាខាដិមី (Neeson Cripps Academy-NCA) នៃអង្គការមូលនិធិកុមារកម្ពុជា (CCF) តំបន់ស្ទឹងមានជ័យបានរៀបចំនូវ ពិព័រណ៍យុវតីផ្នែកវិទ្យាសាស្ត្រ និងបច្ចេកវិទ្យាក្នុងគោលបំណងបង្ហាញពីដំណើរវិវឌ្ឍន៍របស់ក្មេងស្រី ដែលកំពុងសិក្សាមុខវិជ្ជា STEM (វិទ្យាសាស្ត្រ បច្ចេកវិទ្យាវិស្វកម្ម និងគណិតវិទ្យា) ដើម្បីអបអរសាទរសមិទ្ធផលរបស់សិស្សស្រីក្នុងទិវាសិទ្ធិនារីអន្តរជាតិឆ្នាំ ២០២០។
បើតាមសេចក្តីប្រកាសព័ត៌មានបានឲ្យដឹងថា ក្នុងចំណោមសិស្សានុសិស្សសរុប ៤០០ នាក់ដែលសព្វថ្ងៃសិក្សានៅវិទ្យាល័យ នីសិនគ្រីបអាខាដិមី (NCA) មានជាង ៧៥ ភាគរយគឺជាក្មេងស្រីក្រោមការជួយពីអង្គការមូលនិធិកុមារកម្ពុជា (CCF) ដែលធ្វើដើម្បីត្រួសត្រាយផ្លូវសម្រាប់ក្មេងស្រីៗចូលសិក្សានៅទីនោះ និងលើកទឹកចិត្តឲ្យស្វែងរកមុខវិជ្ជាវិទ្យាសាស្ត្រឈានដល់សម្រេចសក្តានុពលរបស់ពួកគេដែលគាំទ្រយ៉ាងពេញទំហឹងពីអង្គការមូលនិធិកុមារកម្ពុជា។
ពិព័រណ៍យុវតីផ្នែកវិទ្យាសាស្ត្រ និងបច្ចេកវិទ្យានេះក៏ជាគំនិតផ្តួចផ្តើមដំបូងថ្មី ជាដៃគូរវាងអង្គការមូលនិធិកុមារកម្ពុជា (CCF) និងក្រុមហ៊ុនសប្បុរសធម៌ធីជីប៊ី (TGBCharity) ដែលគាំទ្រដល់អង្គការជុំវិញពិភពលោកដែលមិនបានស្វែងរកប្រាក់ចំណេញដោយប្រើប្រាស់បច្ចេកវិទ្យាភ្ជាប់ការផ្តល់ព័ត៌មាន។
ព្រឹត្តិការណ៍នេះមានការពិភាក្សា និងការបង្ហាញសិល្បៈ មនុស្សយន្តឌីជីថល ភាពច្បាស់លាស់នៃការប្រកួតប្រជែងព្រមទាំងបទពិសោធលើខាងផ្នែកវិទ្យាសាស្ត្រ និងបច្ចេកទេសសម្រាប់សិស្សានុសិស្សស្រីបានគឺត្រូវកំណត់ចាប់ពីសិស្សថ្នាក់ទី ៧ ដល់ថ្នាក់ទី ១២។
លោក ស្កតនីសិន ជាស្ថាបនិក និងជានាយកប្រតិបត្តិនៃអង្គការមូលនិធិកុមារកម្ពុជា (CCF) បានលើកឡើងថា៖ «យើងសូមថ្លែងអំណរគុណយ៉ាងជ្រាលជ្រៅចំពោះការគាំទ្រក្រុមហ៊ុនសប្បុរសធម៌ធីជីប៊ី (TGBCharity)។ ការវិនិយោគលើការអប់រំលើមុខវិជ្ជា (STEM គឺជាវិទ្យាសាស្ត្របច្ចេកវិទ្យា វិស្វកម្ម និងគណិតវិទ្យា) នឹងផ្តល់សារៈសំខាន់ចាំបាច់ច្រើន សម្រាប់មនុស្សគ្រប់ជំនាន់ហើយអនុញ្ញាតឲ្យក្មេងស្រីនឹងក្លាយជាអ្នកដឹកនាំបច្ចេកវិទ្យា និងវិស្វកម្មទៅថ្ងៃខាងមុខ»។
សម្រាប់ក្រុមហ៊ុនសប្បុរសធម៌ធីប៊ីជី (TGBCharity) បានធ្វើការបរិច្ចាគនូវសប្បុរសធម៌នេះទៅដល់អង្គការមូលនិធិកុមារកម្ពុជា ដើម្បីប្រើប្រាស់ក្នុងផ្នែកអប់រំបច្ចេកវិទ្យានៅតាមសាលានានា ខណៈការបរិច្ចាគនេះផងដែរក៏នឹងជួយឲ្យអង្គការមូលនិធិកុមារកម្ពុជាអាចបង្កើតកម្មវិធីសិក្សារបស់ខ្លួន និងទាក់ទាញក្រុមយុវជនកាន់តែច្រើនឲ្យចាប់អារម្មណ៍ក្នុងផ្នែកបច្ចេកវិទ្យា និងមុខជំនាញអាជីពរបស់ពួកគេនាពេលអនាគត។
តំណាងក្រុមហ៊ុនសប្បុរសធម៌ធីជីប៊ី (TGBCharity) ក៏បានលើកឡើងនាឱកាសបើកកម្មវិធីកាលពីចុងសប្តាហ៍កន្លងមកថា៖ «យើងមានក្តីរំភើបយ៉ាងខ្លាំងដែលក្លាយជាដៃគូផ្លូវការរបស់អង្គការមូលនិធិកុមារកម្ពុជា (CCF) និងគាំទ្រកម្មវិធីអប់រំរបស់ពួកគេ។ នេះជាលើកដំបូងហើយសម្រាប់ក្រុមហ៊ុនសប្បុរសធម៌ធីជីប៊ី (TGBCharity) ដើម្បីឈានជើងចូលទៅក្នុងវិស័យនេះ ហើយយើងក៏សង្ឃឹមថានឹងបង្កើតទំនាក់ទំនងយ៉ាងយូរអង្វែងជាមួយអង្គការមូលនិធិកុមារកម្ពុជា (CCF) ក្នុងការលើកកម្ពស់ការយល់ដឹងជាសាធារណៈលើការអប់រំរបស់កុមារ»៕