ភ្នំពេញ៖ មហាជនប្លែកអារម្មណ៍ខ្លាំងជាមួយនឹងសារប្លែកៗរបស់តារាសម្តែងស្រីរាងតូចច្រឡឹង សម្រស់ស្រស់ស្អាតកញ្ញា ជេស៊ីកា ដែលមើលទៅដូចជាស្តែងឱ្យដឹងថា កំពុងតែមានរឿងវិបត្តិខកស្នេហ៍ និងបន្លឺប្រាប់ថា រូបខ្លួនគឺជាស្រ្តីអភ័ព្វស្នេហ៍ទៀតផង។
មួយរយៈចុងក្រោយនេះ ស្រាប់តែឃើញកម្រងសារប្លែកៗស្តែងចេញពីអារម្មណ៍បែបស្រពាប់ស្រពោនក្នុងចិត្ត អមទឹកមុខមិនសូវរីករាយពាក់ព័ន្ធនឹងរឿងបេះដូងតែម្តង ដែលមានលក្ខណៈខុសពីសព្វមួយដង រមែងឃើញនាងបង្ហោះរូប និងសាររំលេចន័យបែបសប្បាយៗនោះ។
តារាស្រីវ័យ ២៥ ឆ្នាំ សម្បុរស្រអែមស្រស់ មានឈ្មោះពិត តាន់ សុផា ហៅកញ្ញា ជេស៊ីកា ឧស្សាហ៍បង្ហោះរូបសិចស៊ីល្វែងលើ ឈុតខ្លី និងសម្ញែងឈុតប៊ីគីនី ញឹកញាប់នោះហើយបង្ហើរសារបែបរអ៊ូតូចចិត្តនឹងរឿងស្នេហ៍ថា៖ «គេថាស្រីស្អាត អភ័ព្វស្នេហ៍ ចុះខ្ញុំអត់ស្អាតផងម៉េចក៏អភ័ព្វដែរ? ចង់ដឹងថា ស្រីម្នាក់នេះ សំខាន់នៅពេលណា? ក្ដីស្រឡាញ់ខ្លះ ជាក្ដីស្រឡាញ់ មួយប៉ប្រិចភ្នែក មកហើយក៏ទៅវិញប្រៀបដូចខ្យល់បក់មកល្ហើយមានក្ដីសុខមួយភ្លែតស្ងប់ទៅវិញ ហើយដើម្បីធ្វើឱ្យជីវិតមានក្តីសុខនោះ ត្រូវភ្លេចមនុស្សដែលគេភ្លេចយើង ត្រូវធ្វើល្អជាមួយមនុស្សដែលគេល្អដាក់យើង ត្រូវនៅជាមួយមនុស្សដែលគេចង់នៅជាមួយយើង និងត្រូវស្រឡាញ់មនុស្សដែលគេស្រឡាញ់យើង»។
តារាស្រី រាងតូចច្រឡឹង មុខឃ្យូតគួរឱ្យក្នាញ់ ជេស៊ីកា ឧស្សាហ៍បង្ហោះរូបសិចស៊ីប្លែកៗហាក់ដូចជា មានចេតនាចង់បង្អួតពីសម្រស់ខ្លួនឯង និងទាក់ទាញចំណាប់អារម្មណ៍មហាជន បន្តសារបញ្ជាក់ពីការតាំងចិត្តសាជាថ្មីក្រោយពីជួបភាពខកចិន្តារឿងស្នេហានោះថា៖ «ពេលវេលាមិនបានធ្វើឱ្យមនុស្សផ្លាស់ប្ដូរទេ តែពេលវេលាវាមានតួនាទីបង្ហាញធាតុពិតរបស់មនុស្ស។ តាមធម្មតារស់ក្នុងសង្គម តែងមានគេនិយាយពីនេះ ពីនោះ តាមអ្វី ដែលគេបានឃើញ។
កុំសោកសៅ ចំពោះពាក្យអ្នកដទៃព្រោះអ្វីៗ គឺអ្នកជាអ្នកសម្រេចមិនមែនអ្នកដទៃទេ។ ត្រូវស្រឡាញ់មនុស្សដែលគេខ្លាចបាត់បង់យើង កុំទៅស្រឡាញ់មនុស្ស ដែលគេព្រងើយកន្តើយដាក់យើង មិនផ្តល់តម្លៃឱ្យយើងមិនថា មិត្តភាព ឬក៏ស្នេហា។ មនុស្សស្រីមិនត្រូវការអ្វីច្រើនក្រៅពីសុំឱ្យអ្នកល្អនឹងនាង ដូចជាថ្ងៃដែលអ្នកតាមស្រឡាញ់នាងដំបូងៗ មិនថារូបរាង ឬឋានៈផ្លាស់ប្ដូរបែបណា ក៏អ្នកនៅតែស្រឡាញ់នាង។ ស្រឡាញ់ខ្លួនឯងឱ្យច្រើន មើលថែខ្លួនឱ្យល្អ គិតអ្វីដែលស្រស់ស្រាយ ឈប់គិតរឿងស្មុគស្មាញបន្តក្ដីស្រមៃដោយការព្យាយាមអ្វីៗក្នុងជីវិតនឹងបានប្រសើរ»។
យ៉ាងណាស្រីស្រស់ ជេស៊ីកា ដែលឆ្លងកាត់បទពិសោធសម្តែងបានកុនភាគចំនួន ៧ រឿង កុនដុំ ១ រឿង ថត MV បទចម្រៀងឱ្យផលិតកម្មល្បីៗជាច្រើននោះ ភ្នំពេញ ប៉ុស្តិ៍ មិនអាចបញ្ជាក់បន្ថែមឱ្យដឹងពីរឿងរ៉ាវខកស្នេហ៍នោះឡើយ៕