.jpg)
ពិធីការិនីរូបស្រស់ រាងស្រលូនស្អាត កញ្ញា ម៉េង ឃុននី ហៅ ជីមមី បង្ហាញទិដ្ឋការដែលនាងបានទៅអាមេរិកចំនួន ១ ខែ។ រូប អ៊ីនស្តាក្រាម ហុង មិនា
ភ្នំពេញៈ ទើបតែប្រកាសពីឆន្ទៈចង់ក្តោបយកទីផ្សារសិល្បៈឲ្យបានច្រើន ដោយទុកការសិក្សានៅក្រៅប្រទេសមួយអន្លើសិននោះ ក៏ស្រាប់តែកញ្ញា ម៉េង ឃុននី ហៅ ជីមមី បង្ហោះពីដំណឹងល្អរបស់ខ្លួនទទួលបានទិដ្ឋាការឈានជើងទៅកាន់ទឹកដីសហរដ្ឋអាមេរិកនាពេលថ្មីៗ។
បន្ទាប់ពីបង្ហោះភ្លាមនោះក៏មានអ្នកចូលចុច Like និង comment អបអរសាទរនាងផង និងមានអ្នកឆ្ងល់ផងដែរ ចំពោះឱកាសបានទិដ្ឋាការទៅប្រទេសអាមេរិករបស់កញ្ញា ជីមមី ដោយសារជារឿងកម្រណាស់ សម្រាប់អ្នកសិល្បៈទូទៅដែលប្រាថ្នាចង់បានទិដ្ឋាការទៅកាន់ទឹកដីដែលសម្បូរដុល្លារមួយនេះ។
ក៏មានអ្នកលើកឡើងពីសម្តីរបស់កញ្ញា ជីមមី កន្លងមកថា៖ «ច្បាស់ណាស់កញ្ញា ជីមមី ច្បាស់ជាបានទិដ្ឋាការទៅបន្តការសិក្សានៅអាមេរិកហើយមើលទៅព្រោះនាងធ្លាប់ប៉ងទៅរៀននៅប្រទេស!»។
ផ្ទុយទៅវិញទិដ្ឋាការនេះមិនមែនកញ្ញា ជីមមី ទៅបំពេញការងារសិល្បៈ និងការសិក្សាបន្តនោះទេ បើតាមការបញ្ជាក់ប្រាប់ពីសំណាក់ពិធីការិនីរូបស្រស់រាងស្ល៊ីមដែលពូកែខាងវោហារស័ព្ទ សម្តីចាក់ទឹកមិនលេច មានទម្រង់មុខឃ្យូតៗគួរឲ្យស្រឡាញ់កញ្ញា ម៉េង ឃុននី ហៅ ជីមមី។
ពិធីការិនីប្រចាំនៅទូរទស្សន៍ភីអិនអិន ដែលមហាជនច្រើនស្គាល់មុខនាងច្បាស់ក្នុងស្ប៉តពាណិជ្ជកម្មនៃភេសជ្ជៈខារ៉ាបាវកញ្ញា ជីមមី ប្រាប់ភ្នំពេញប៉ុស្តិ៍ដោយសុំការអធ្យាស្រ័យមិនទាន់ដល់ពេលប្រាប់ឲ្យដឹងសេចក្តីថា៖ «អូ!ចាសបង!ខ្ញុំពិតជាបានទិដ្ឋាការទៅកាន់ប្រទេសអាមេរិកមែន គឺបានពេលចំនួន ១ ខែ។ នាងខ្ញុំមិនមែនទៅនៅក្នុងការងារសិល្បៈ ឬជាការបន្តការសិក្សានោះទេ គឺនាងខ្ញុំគ្រាន់តែទៅក្នុងកិច្ចការផ្ទាល់ខ្លួនតែប៉ុណ្ណោះ»។
កាលពីថ្មីៗនេះក៏លេចឮដំណឹងថា ពិធីការិនីមានរូបស្រស់ រាងស្ល៊ីម កញ្ញា ម៉េង ឃុននី ហៅ ជីមមី ចង់ពង្រីកទីផ្សារសិល្បៈសម្តែងភាពយន្តបន្ថែមដោយមិនប្រាថ្នាទាមទារប្រាក់កម្រៃថតកុនដូចជាតារាសម្តែងអាជីពរលកមុននោះឡើយ។
កញ្ញា ជីមមី ជាពិធីការិនីរូបស្រស់ដែលចេះច្រើនភាសានោះ ធ្លាប់ប្រាប់ថា៖ «ដោយយល់ថាខ្លួនឯងបានប្រឡូកក្នុងវិស័យជាពិធីការិនីមានបទពិសោធច្រើនគួរសម ហើយក៏ចង់រកបទពិសោធថ្មីក្នុងសិល្បៈទើបចង់សាកល្បងសម្តែងកុនបន្ថែមព្រោះខ្ញុំមិនដែលធ្លាប់សម្តែងឡើយតាំងពីចូលវិស័យសិល្បៈមក»។
តារាស្រីសាច់សខ្ចី វ័យ ២៣ ឆ្នាំរូបនេះបន្តទាំងលាយសំណើចពេលសួរនាំពីរឿងការកំណត់តម្លៃខ្លួន ប្រសិនបើមានគេហៅថតកុននោះថា៖ «មូលហេតុមិនធ្លាប់ថតហ្នឹងហើយបានជំរុញចិត្តឲ្យខ្ញុំចង់ចាប់ផ្តើមថតកុនហើយទើបមិនហ៊ានទាមទារថ្លៃកម្លាំងពលកម្មថតកុនឲ្យដូចតារាសម្តែងរៀមច្បង ឬតារាអាជីពនោះទេ»៕
