ភ្នំពេញៈ អស់ពីការភ្ញាក់ផ្អើល និងតាមដានសកម្មភាពថតកុនរបស់តារាសម្តែងស្រីស្រស់មានរាសីឡើងក្រឺតៗនៅក្នុងវិស័យភាពយន្ត ដែលហ៊ានសម្តែងស្ទើរគ្រប់ឈុតឆាកមិនសូវរាថយ សូម្បីតែថតជាមួយនឹងសត្វពស់ ឬការសម្តែងហ៊ានលែងល្វែងលើ ដើម្បីសាងភាពល្បីរន្ទឺរហូតមកដល់ពេលបច្ចុប្បន្នរបស់កញ្ញា ឌុច លីដា នោះ ក៏ស្រាប់តែមហាជនងាកមកតាមដាន រឿងអត្ថន័យនៅក្នុងសារខ្លីស៊ីជម្រៅរបស់នាងវិញនាពេលថ្មីៗនេះ។
ខណៈពេលចូលឆ្នាំថ្មីកាន់តែខិតចូលមកដល់នោះ ក៏ស្រាប់តារាសម្តែងស្រីស្រស់ ដែលមានរាសីឡើងខ្លាំងនៅក្នុងពិភព សម្តែង និងក៏បានក្លាយជាថៅកែស្រីហាងគុយទាវឡាំឌួយ បានមួយប្រាវ និងទើបតែក្លាយជា តារាស្រីកិត្តិយស ដែលតំណាងឲ្យកម្ពុជា ទៅចូលរួមនៅក្នុងកម្មវិធីមហោស្រពភាពយន្តអាស៊ី-អូសាកា ឆ្នាំ ២០១៨ នៅឯប្រទេសជប៉ុន កន្លងមក កញ្ញា ឌុច លីដា ក៏បង្ហើរសារយ៉ាងខ្លីមួយឃ្លាគួរឲ្យងឿងឆ្ងល់ថា៖ «ខ្ញុំរឹងមាំដឹង បានជាគ្មានអ្នកណាដឹងថា ខ្ញុំ ឯកា!» នៅតាមអ៊ីនស្តាក្រាម។
ភាពចម្លែកទៅនឹងសារ កញ្ញា ឌុច លីដា អាចទំនងជាមហាជនធ្លាប់តែបានលេចឮថា តារាសម្តែងស្រីរូបនេះ តែងមានក្រុមកន្លង់ទាំងចាស់ទាំងក្មេង ទាំងអ្នកទ្រព្យស្តុករហូតដល់ឧកញ៉ា តាមសុំដាក់ពាក្យធ្វើជាម្ចាស់ស្នេហ៍ តែតារាស្រីរូបនេះ ក៏តែងតែធើ្វការបញ្ជាក់វិញដែរថា នាងនៅមិនទាន់បានយកអារម្មណ៍ទៅគិតរឿងគូកននេះឡើយទេ ក្រោមហេតុផលថា នាងចង់ផ្តោតលើការងារជាចម្បងសិន។
ផ្ទុយទៅវិញតារាសម្តែងស្រីដែលមិនត្រឹមតែធ្វើឲ្យមានការភ្ញាក់ផ្អើលពីសំណាក់មហាជនទេ សូម្បីតែមិត្តអ្នកសិល្បៈដូចគ្នាក៏បានបន្លឺសូរស័ព្ទពីភាពក្លាហានសម្តែង ក្នុងឈុតថតកុនយ៉ាងស្និទ្ធ នឹងកូនពស់ខៀវពិតៗជាច្រើនដាក់ផ្តុំលើក្បាលដោយសារមិនខ្លាចញញើត នាពេលថតកុនភាគខ្នាតធំគឺរឿង «កូនពស់កេងកង» ជាវណ្ណកម្មគ្មាន ២ ដែលជាការដឹកនាំសម្តែងដោយលោក ហ្វៃ សំអាង សម្រាប់ការចាក់បញ្ចាំងនៅលើកញ្ចក់ទូរទស្សន៍ហង្សមាស នោះប្រាប់អត្ថន័យនៃសារខ្លីថា៖ «សារអត់មានន័យអីជ្រាលជ្រៅនោះទេបង។ តាមពិតទៅ នាងខ្ញុំគ្រាន់តែសរសេរ ឆ្លើយដាក់វិញទៅកាន់មិត្តភក្តិប៉ុណ្ណោះ ព្រោះខ្ញុំតែងតែឮពាក្យចេញពីមាត់ពួកគាត់ថាឲ្យខ្ញុំថា មនុស្សអីមើលទៅដូចជាគ្មានការព្រួយបារម្ភ និងខ្វល់ខ្វាយអ្វីអ៊ីចឹង!។
កញ្ញា ឌុច លីដា បន្តឲ្យដឹងយ៉ាងលះៗបញ្ជាក់ប្រាប់ពីភាពខ្លួននៅទំនេរ គ្មានជំពាក់ជំពិននូវចំណងស្នេហ៍នឹងបុរសណាមួយនៅឡើយថា៖ «ពេលនឹកឃើញរឿងនោះ ខ្ញុំក៏សរសេរដាក់បង្ហោះប្រាប់ពួកគេវិញទៅ គឺមានន័យថា កាលដែលអ្នកដទៃបានមើលឃើញនោះ មិនប្រាកដថា ត្រឹមត្រូវដូចជាអ្នកបានឃើញច្បាស់នឹងភ្នែកនោះឡើយ»។
និយាយឲ្យត្រង់ទៅ វាជាការពិត អារឿងនៅឯកា ម្នាក់ឯងនឹងគឺជាការពិតមានតាំងពីយូរយាណាស់មកហើយ។ ទោះបីជាដល់ពេលនេះ ក៏នាងខ្ញុំនៅតែអះអាងថា នៅមិនទាន់គិតរឿងមានគូកនអ្វីនោះទេ សុំពេលគិតរឿងការងាររកប្រាក់សិន។ អាចនិយាយបានថា ប្រហែលជាគូព្រេងនាងខ្ញុំមិនទាន់កើតផងទេដឹង?»៕