ភ្នំពេញ៖ ខណៈការទិញរថយន្តដ៏ទំនើបតម្លៃជិតកន្លះលានដុល្លារ ធ្វើជាកាដូខួបកំណើតសំណព្វចិត្ត រំលងមិនទាន់បានប៉ុន្មានខែផង សុខៗ ក៏ឃើញតារាចម្រៀងរ៉េប ងួន ចាន់ដេវីត ហៅ ជី ដេវីត ប្រកាសលក់រថយន្តទំនើបម៉ាក Rolls-Royce ដែលខ្លួនបានទិញជូនគូស្នេហ៍ ជាតារាចម្រៀងស្រីសិចស៊ីកញ្ញា ទេព បូព្រឹក្ស នោះវិញ បង្កើតភាពភ្ញាក់ផ្អើលសាជាថ្មី នៅក្នុងចុងឆ្នាំ ២០២០ នេះ។
គេនៅចាំថា ជី ដេវីត បានទិញរថយន្តទំនើបម៉ាក Rolls-Royce ជូនគូស្នេហ៍ជាតារាចម្រៀងស្រីសិចស៊ីកញ្ញា ទេព បូព្រឹក្ស មុនពេលដែលខ្លួនបានទៅបួសជាសង្ឃកាលពីថ្ងៃទី ២៣ ខែ កក្កដា ឆ្នាំ ២០២០ បំពេញកុសលជូនមាតាបិតា និងដើម្បីរម្ងាប់ចិត្ត ដែលរងភាពស្មុគស្មាញមួយរយៈ នៅទីអារាមមួយឈ្មោះវត្តល្អាងកង្កែប នៅស្រុកបាណន់ ខេត្តបាត់ដំបង។
បើទោះបីសម្ព័ន្ធស្នេហ៍ត្រឹមជាគូដណ្តឹងនឹងគ្នាមែនក្តី តែគូស្នេហ៍សិល្បៈចម្រៀងសម័យ កញ្ញា ទេព បូព្រឹក្ស និងលោក ជី ដេវីត ក៏ហៅគ្នាជាប្តីប្រពន្ធពេញៗមាត់រួចទៅហើយដែរ និងហ៊ានលះបង់ខ្ពស់ ដើម្បីបង្ហាញក្តីស្រឡាញ់ដ៏មហិមាដោយបានទិញនូវរថយន្តទំនើបៗ ដែលមានតម្លៃជិតកន្លះលានដុល្លារ ជាកាដូជូនគ្នាទៅវិញទៅមក នាថ្ងៃពិសេសរៀងៗ-ខ្លួន គឺបានធ្វើឱ្យមហាជនមានការស្រឡាំងកាំងម្តងៗ និងតែងពាំចម្ងល់ពីប្រភពប្រាក់ចំណូលពួកគេផងដែរ។
ជាក់ស្តែង ជី ដេវីត ទិញឡានម៉ាក Rolls-Royce ជូនកាដូថ្ងៃខួបកំណើត កញ្ញា ទេព បូព្រឹក្សហើយរូបលោកក៏ទទួលបានកាដូរថយន្តម៉ាក Mercedes G63 ពីកញ្ញា ទេពបូព្រឹក្ស វិញដែរ ថ្ងៃខួបកំណើតរបស់លោក។
តែនៅចុងខែធ្នូ ចុងឆ្នាំ ២០២០ នេះស្រាប់តែគេឃើញ ជី ដេវីត ក៏បង្ហើរសារប្រកាសលក់ឡាន Rolls-Royce វិញនៅតាមអ៊ីនសា្តក្រាមថា៖ «បងអ្នករកស៊ី បងលក់អនឡាញ បងឧកញ៉ារកស៊ីដីឡូត៍ បងឧកញ៉ាបូរី បងឧកញ៉ាត្រូវការឡានទំនើបលេខការ៉េ ទិញឡានអូនមក មិនខុសទេ ខ្ចីញ៉េញ លេងហើយស្រាប់ កង់មានដល់ទៅ ៨ គ្រាប់ កង់ស៊ី ៤ គ្រាប់ យ៉ានលេងក្រៅ ហ្ស៊ីនជាប់ឡាន ($ 4700)។ ឥឡូវដាក់លក់ត្រូវការអាចឆាតចូល page ខ្ញុំមកបង ធានាថា ម៉ាកប់សារី!»៕