ភ្នំពេញ៖ នាពេលថ្មីៗនេះ ស្រាប់តែលេចវត្តមានអតីតតារាចម្រៀងនៅទ្រនំហង្សមាស និងជាម្ចាស់ពាន The Voice Cambodia រដូវកាលទី១ លោក ប៊ុត សីហា ក្នុងផលិតកម្មថ្មីសន្លាងមួយមានឈ្មោះថា «Life Production» ដោយលោកក៏មានបទចម្រៀងជាច្រើនមកបំពេអារម្មណ៍ប្រិយមិត្តវិញ ក្រោយពីបាត់មុខអស់ពេលជាយូរមកនោះ។
តាមរយៈការបង្ហាញមុខសាជាថ្មីនៅលើវិថីសិល្បៈចម្រៀងចាស់តែផ្លាស់ប្តូរទ្រនំនោះ តារាចម្រៀងប្រុសដែលធ្លាប់បានកាន់ពានកម្មវិធីប្រកួតចម្រៀងលំដាប់ពិភពលោកមុនគេ គឺពាន The Voice Cambodia រដូវកាលទី១ កាលពីឆ្នាំ ២០១៤ នោះ ក៏មានបទចម្រៀងមួយចំនួនថ្មីៗមកបំពេអារម្មណ៍ប្រិយមិត្តដែរ រួមមាន បទ «ឈប់ខ្វល់» បទ«ក្លិនជាប់ពូកខ្នើយ» បទ «ស្មោះគេខ្លាំងទើបដឹងខ្លួនថោក» បទ«នៅបារម្ភអ្នកចាស់» បទ«មិនយំមុខអូនខ្លាចអូនអាណិត» បទ«ម្តេចបំបែកស្នេហ៍ខ្ញុំ» និងបទ «នឹកអ្នកគ្រូស្អាត»។
បើតាមលោក ឈួន សុខលីម ជានាយកគ្រប់គ្រងផលិតកម្ម Life Production បានបង្ហើបឲ្យដឹងថា៖ «សម្រាប់ផលិតកម្មថ្មីនេះ ប៊ុត សីហា នឹងមានបទចម្រៀងចេញរាល់ថ្ងៃតែម្តង គឺ ១ ថ្ងៃចេញ ២ បទឯណោះ។ ដូច្នេះបងប្អូនអាចទស្សនា និងស្តាប់បទចម្រៀងរបស់ Idol ខ្លួនបាន»។
គេនៅចាំបានថា កាលពីចុងឆ្នាំ ២០១៨ តារាចម្រៀងប្រុសម្ចាស់ពាន The Voice Cambodia រដូវកាលទី១ លោក ប៊ុត សីហា មានដំណឹងថា ផលិតកម្ម ២ គឺផលិតកម្មថោន និងផលិតកម្មសាន់ដេបានចរចា និងចែចូវចង់បាន ក្រោយពីតារាចម្រៀងប្រុសរូបនេះ បានឆ្លងផុតពីព្យុះភ្លៀង ដែលរួតរឹតដោយរឿងអាស្រូវដ៏អាម៉ាស់មួយពាក់ព័ន្ធនឹងរឿងប្រើប្រាស់គ្រឿងញៀននោះ តែក៏បាត់ដំណឹងសូន្យវិញ ដោយគេស្រាប់តែឃើញលេចមុខនៅក្នុងផលិតកម្មអនឡាញមួយឈ្មោះថា «ផលិតកម្មមរតកមេឌា»។
ចំពោះរឿងនេះ លោក ឈួន សុខលីម ក៏បានបញ្ជាក់ថា៖ «តាមពិតទៅ Life Production នេះគឺយើងបានប្តូរមកពីផលិតកម្មមមរតកមេឌា នោះឯង។ ដោយសារផលិតកម្មមមរតកមេឌាយើងរត់ការសុំច្បាប់ពីក្រសួងវប្បធម៌ និងវិចិត្រសិល្បៈមិនបាន ព្រោះតែមានឈ្មោះជាប់ពាក់ព័ន្ធនឹងកម្មសិទ្ធិបញ្ញារួមត្រង់ពាក្យថា «មរតក» ដែលគេប្រើជារួមនោះ។ ដូច្នេះយើងក៏ប្តូរមកដាក់ថា Life Production វិញ ខណៈឥឡូវនេះ យើងក៏បានរៀបចំឯកសាររត់ការខាងក្រសួងរួចរាល់ និងរង់ចាំរយៈពេល ៣ ខែទៀត»។
គួររំឭកដែរថា ប៊ុត សីហា គឺជាតារាចម្រៀងប្រុសមានឈ្មោះបោះសំឡេងល្បីខ្លាំងមួយប៉្រាវ ខណៈពេលដែលលោកបានក្លាយជាម្ចាស់ពាន The Voice Cambodia រដូវកាលទី ១ ដោយនៅក្នុងនោះមានបេក្ខជនជាគូប្រជែងនៅវគ្គផ្តាច់ព្រ័ត្រមានលោក សយ រតនៈ លោក ឃុន វុត្ថា និងកញ្ញា ចំរើន សុភ័ក្រ ដែលទើបតែលើកពាន The Mask Singer Cambodia នៅឆ្នាំ ២០១៩៕