.jpg)
កញ្ញា សុខ ពិសី ទើបតែបានទទួលចុះកុងត្រាជាតំណាងក្រុមហ៊ុន «Konfulon»។ រូបថត ហ្វេសប៊ុក
ភ្នំពេញ៖ តារាចម្រៀងស្រីឈរនៅលំដាប់ជួរមុខនៃទ្រនំសាន់ដេ កញ្ញា សុខ ពិសី ត្រូវមហាជនកត់សម្គាល់ថា កំពុងតែមានរាសីឡើងក្រឺតៗ ដោយសារឃើញនាងមានភាពកាក់កបខ្លាំងនឹងការងារទូតសុច្ឆន្ទៈ និងជាតំណាងផលិតផលនានា ហាក់ដូចជាមានភាពមមាញឹកជាងការងារសិល្បៈ។
តារាចម្រៀងដែលកាក់កបនឹងការងារក្រៅសិល្បៈ គឺថតស្ប៉តពាណិជ្ជកម្មធំៗដូចជាថតស្ប៉តក្រុមហ៊ុនស្រាបៀរ Ganzberg កាលពីឆ្នាំចាស់ ២០១៨ និងក៏ជាអ្នកតំណាងផលិតផលរក្សាសម្ផស្សក្រែមលាបមុខម៉ាក ហ្វែរ អែន ឡោហ្វលី តាំងពីឆ្នាំមុនផងដែរ និងទើបតែបន្ថែមកិច្ចសន្យាបន្តជាមួយនឹងក្រុមហ៊ុនទូរស័ព្ទម៉ាក VIVO នាពេលថ្មីៗសោះ ក៏ស្រាប់តែតារាចម្រៀងនៅទ្រនំផលិតកម្មសាន់ដេ កញ្ញា សុខ ពិសី ត្រូវបានក្រុមហ៊ុនផ្គត់ផ្គង់បរិក្ខារទូរស័ព្ទមួយ គឺ «Konfulon» ជ្រើសរើសនាងធ្វើជាតំណាងផលិតផលខ្លួនបន្ថែមទៀត។
ដោយមើលឃើញថា តារាចម្រៀងស្រីសាច់សខ្ចីដូចបណ្តូលចេកនាង សុខ ពិសី មានភាពមមាញឹកខ្លាំងនឹងការងារថតស្ប៉តពាណិជ្ជកម្ម និងការងារជាតំណាង ឬជាទូតសុច្ឆន្ទៈនៃក្រុមហ៊ុនផលិតផលនានា យ៉ាងស្អេកស្កះនោះ ក៏មានការលើកឡើងពីមហាជនបែបជាចម្ងល់ថា៖ «បើតាមមើលទៅកញ្ញា សុខ ពិសី ដូចជារវល់ការងារទាំងនេះជាងការងារសិល្បៈ។
ចុះប្រសិនបើរវល់ខ្លាំងយ៉ាងនេះមែននោះ ថាតើតារាចម្រៀងស្រីកញ្ញា សុខ ពិសី អាច ប៉ះពាល់នឹងការងារសិល្បៈដែរ ឬយ៉ាងណា? ហើយកាលក្លាយជាតំណាងឲ្យផលិតផលច្រើនដូច្នេះ តើកញ្ញា សុខ ពិសី ទទួលបានកម្រៃប៉ុន្មានទៅសម្រាប់មួយតំណាងៗនោះ?»។
តារាចម្រៀងស្រី ដែលកំពុងតែមានរាសីឡើងខ្លាំងទាំងវិស័យសិល្បៈចម្រៀង និងការថតស្ប៉តពាណិជ្ជកម្មបានបកស្រាយថា៖ «អូ! តាមពិតទៅ បើទោះបីជានាងខ្ញុំ មានការរវល់នឹងការងារថតស្ប៉ត និងការងារជាតំណាងឲ្យផលិតផលនានាច្រើនមែនក្តី តែមិនបានធ្វើឲ្យប៉ះពាល់ដល់ការងារសិល្បៈនោះឡើយ គឺនាងខ្ញុំបានចែកដាច់រវាងការងារសិល្បៈ និងការងារថតស្ប៉ត និងធ្វើជាតំណាងឲ្យផលិតផលទាំងនោះ។
តារាស្រីស្រស់សំឡេងស្រួយ កញ្ញា សុខ ពិសី ក៏បន្តឲ្យដឹងទៀតថា៖ «ចំពោះការងារថតស្ប៉តក្តី និងការងារថតជាតំណាងផលិតផលក្តី នាងខ្ញុំតែងតែបានផ្តល់ដំណឹងពេលវេលាទំនេររបស់ខ្ញុំឲ្យគេមុន ដូច្នេះទើបមិនមានការប៉ះពាល់នឹងពេលវេលាសម្រាប់សិល្បៈ។
ម្យ៉ាងទៀត សម្រាប់តម្លៃដែលទទួលបានពីការងារតំណាងឲ្យផលិតផលក្តី និងជាទូតសុច្ឆន្ទៈក្តី គឺមានតម្លៃខុសគ្នា ដោយនាងខ្ញុំសុំចិត្តផង ដែលមិនបានប្រាប់ឲ្យដឹងពីតម្លៃនោះ។ និយាយរួមតម្លៃក៏វាអាស្រ័យទៅតាមប្រភេទនៃផលិតផល ដែលនាងខ្ញុំបានធ្វើជាតំណាងហើយនាងខ្ញុំ និងក្រុមហ៊ុនក៏ទាមទារឲ្យមានកិច្ចសន្យាព្រមព្រៀងគ្នាចំនួនតិចឆ្នាំ ឬច្រើនឆ្នាំតាមភាពជាក់ស្តែងផងដែរ»៕
