.jpg)
តារាចម្រៀងស្រីសំឡេងស្រួយមានរូបស្រស់កញ្ញា សុខ ពិសី ប្រកាសអញ្ជើញតាយាយចាស់ពិសាអាហារនៅថ្ងៃទី ១៤ កុម្ភៈនេះ។ អ៊ីនស្តាក្រាម ស្រេង ម៉េងស្រ៊ុន
ភ្នំពេញៈ ហាក់ដូចជាមានភាពចម្លែក និងបង្កការភ្ញាក់ផ្អើលពីមហាជន ខណៈដែលតារាចម្រៀងស្រីលំដាប់ជួរមុខនៃទ្រនំសាន់ដេ កញ្ញា សុខ ពិសី បានប្រកាសអញ្ជើញលោកតាលោកយាយឲ្យទៅពិសាអាហារមួយពេលនៅចំថ្ងៃទី ១៤ ខែកុម្ភៈ ឆ្នាំ ២០១៩ នេះដែលជាទិវានៃក្តីស្រឡាញ់នោះ។
នៅមុនថ្ងៃទិវានៃក្តីស្រឡាញ់ ឬទី ១៤ ខែកុម្ភៈ ឆ្នាំ ២០១៩ នេះក៏ឃើញតារាចម្រៀងស្រីសាច់សខ្ចីមានសំឡេងស្រួយស្រែសឆក់បាននូវប្រជាប្រិយភាពពីមហាជនយុវវ័យយ៉ាងច្រើនកញ្ញា សុខ ពិសី បានបង្ហើរសារថា៖ «ស្អែកត្រូវជាថ្ងៃ ១៤ កុម្ភៈ ទិវានៃក្តីស្រឡាញ់ នាងខ្ញុំ សុខ ពិសី ចង់អញ្ជើញលោកតា លោកយាយ ដែលខ្វះខាតមកពិសាអាហារថ្ងៃត្រង់មួយពេល និងមានរបស់បន្តិចបន្តួចជូនដល់ពួកគាត់។ ដូច្នេះបើបងប្អូនបានស្គាល់លោកតាដែលខ្វះខាតសូមទំនាក់ទំនងខាងនាងខ្ញុំ ខណៈខាងខ្ញុំក៏មានឡានទៅទទួលលោកតាលោកយាយផ្ទាល់ផងដែរ។ ចំពោះទីតាំងសម្រាប់ការមកពិសាអាហារថ្ងៃត្រង់នៅភោជនីយដ្ឋានមាតុភូមិសាខាជិតស្ថានីយនៃទូរទស្សន៍អាស៊ី-អាគ្នេយ៍»។
តារាចម្រៀងស្រីសាច់សខ្ចី សុខ ពិសី ដែលធ្លាប់ផ្ទុះដំណឹងចចាមអារ៉ាមដែលផ្ទុះឡើងដ៏ក្តៅគគុកបែកធ្លាយថា លួចបង្កាត់ភ្លើងស្នេហ៍យ៉ាងអាថ៌កំបាំងនឹងថៅកែ ផលិតកម្មសាន់ដេទើបតែរសាយចំហាយព័ត៌មាននោះក៏បានបញ្ជាក់ប្រាប់កាលពីរសៀលថ្ងៃម្សិលមិញផងដែរថា៖ «ពេលនេះចំនួនលោកតាលោកយាយនឹងបានចំនួនប្រមាណ ១០០ រូប ឬលើសនេះនៅថ្ងៃស្អែក។ ចំណែកឯការចេញថ្លៃសម្រាប់អាហារថ្ងៃត្រង់នេះគឺនាងខ្ញុំចំណាយ ៥០ ភាគរយ និងការ ៥០ ភាគរយទៀតគឺជាការចំណាយរបស់ក្រុមហ៊ុនភេសជ្ជៈ Zorus ដោយនាងខ្ញុំក៏ជាតំណាងឲ្យផលិតផលមួយនេះដែរ»។
កញ្ញា សុខ ពិសី ក៏បានបន្តថា៖ «គោលបំណងសំខាន់នៃការអញ្ជើញលោកតាលោកយាយឲ្យទៅពិសាអាហារមួយពេលនៅចំថ្ងៃទី ១៤ ខែកុម្ភៈ ឆ្នាំនេះចង់បង្ហាញពីក្តីស្រឡាញ់របស់នាងខ្ញុំចំពោះពួកគាត់ ខណៈតាមពិតទៅនាងខ្ញុំតែងធ្វើរបៀបនេះជារៀងរាល់ឆ្នាំលក្ខណៈគ្រួសារ។ ដោយគ្រាន់តែឆ្នាំនេះ ខ្ញុំបានប្រកាសជាសាធារណៈព្រោះតែនាងខ្ញុំពុំសូវមានពេលគ្រប់គ្រាន់ដូចឆ្នាំមុនៗទៅស្វែងរកខ្លួនឯង ទើបប្រកាសតាមបណ្តាញសង្គមតែម្តងទៅ»។
នាពេលថ្មីៗនេះក៏លេចឮដំណឹងមួយទៀតដែរថា កញ្ញា សុខ ពិសី កំពុងតែត្រូវបានកូនប្រុសរបស់ឧកញ៉ាមានទ្រព្យស្តុក មានមុខជំនួញរកស៊ីផ្នែកសណ្ឋាគារ និងរ៉ែតាមសុំស្នេហ៍យ៉ាងស្អិតល្មួតតែម្តងបង្កការភ្ញាក់ផ្អើលទៅដល់មហាជនជាថ្មីម្តងទៀតផងដែរ៕
