ភ្នំពេញៈ ពេលវេលាបុណ្យចូលឆ្នាំប្រពៃណីខ្មែរឆ្នាំថ្មីកាន់តែជិតមកដល់តារាចម្រៀងស្រីសំឡេងស្រួយ រូបស្រស់សោភា សាច់សខ្ចី នៅឈរជួរមុខម្នាក់ទៀតហើយគឺកញ្ញា សុខ ពិសី លេចឮដំណឹងចចាមអារ៉ាមថា នាងបានផុតកុងត្រាពីទ្រនំសាន់ដេ ហើយអាចនឹងដូរទ្រនំថ្មីទៀតផងដែរ។
ខណៈមានលេចចេញរលកព័ត៌មានបែបពាក្យចចាមអារ៉ាម ដែលឮល្ហៀងៗដូចគ្នា តែតាមជាក់ស្តែងនោះ តារាចម្រៀងស្រីស្រស់សាច់សខ្ចីទាំង ២ កញ្ញា សុខ ពិសី និងកញ្ញា អ៊ីវ៉ា កំពុងតែនាំគ្នាសម្រុកថតបទចម្រៀង ចង្វាក់ប្រពៃណីខ្មែរយ៉ាងសស្រាក់សស្រាំនៅទ្រនំចាស់នៅឡើយ។
កំពុងតែទទួលបានការគាំទ្រយ៉ាងច្រើនជាមួយនឹងបទចម្រៀងចង្វាក់រាំវង់ គឺជាបទចម្រៀងលំនាំមរតកដើម មានចំណងជើងថា «ឱ!ផ្កាល្ហុង» ដោយមានជនបរទេសស្រីជាតិ អូទ្រីស មានឈ្មោះ សនចា ច្រៀងអមជាមួយនាងដែរនោះ កញ្ញា សុខ ពិសី បានបង្ហើបប្រាប់ភ្នំពេញប៉ុស្តិ៍ ដើម្បីជម្រះមន្ទិលមហាជនថា៖ «អត់ទាន់មានដំណឹងលឿនដូច្នេះទេបងសម្រាប់នាងខ្ញុំ ព្រោះថា ខ្ញុំនៅជាប់កុងត្រាជាមួយនឹងផលិតកម្មសាន់ដេ គឺនៅសល់ដល់ទៅ ២ ឆ្នាំទៀតឯណោះ! ដូច្នេះដំណឹងគេថា ខ្ញុំបានផុតកុងត្រានោះ មិនពិតឡើយ»។
ហាក់ដូចជាបានត្រៀមនូវពាក្យរួចស្រេចជាចម្លើយសម្រាប់ការសួរថា ប្រសិនបើផុតកុងត្រានោះ តើកញ្ញាគិតយ៉ាងណា? កញ្ញា សុខ ពិសី បញ្ជាក់ថា៖ «ដោយសារតែពេលវេលានៅយូរទៀតនោះ នាងខ្ញុំ សុំមិនទាន់ជម្រាបថាយ៉ាងណាជាមុននោះឡើយ។ នាងខ្ញុំគិតថា គឺចាំដល់ពេលនោះមកដល់ ចាំជម្រាបរឿងនេះតែម្តងទៅ!»។
ចំពោះរឿងបញ្ហាស្នេហាវិញ កាលពីឆ្នាំ ២០១៧ កន្លងមក តារាចម្រៀងស្រីសាច់សខ្ចី ដូចជាបណ្តូលចេក គឺកញ្ញា សុខ ពិសី ល្បីថា នាងមានក្រុមកន្លង់ទាំងចាស់ក្មេងនៅក្រៅរង្វង់សិល្បៈ និងក្នុងសង្គមសិល្បៈមិនត្រឹមតែតាមសុំស្នេហ៍ទេ ថែមទាំងមានអ្នកទៅសួរនាំដល់ចាស់ទុំរបស់នាងទៀតផង តែមិនទាន់មានអ្នកត្រូវចិត្តនោះឡើយ ខណៈចិត្តចង់ទុកពេលរកប្រាក់ពីសិល្បៈនេះសិន។
តារាចម្រៀងស្រីជាបុប្ផាមួយទងមានស្រុកកំណើតនៅក្រុងតាខ្មៅ ដែលធ្លាប់បានត្រៀមបើកចំហចិត្តសន្សំពិន្ទុដែរនោះបែរជាមកនិយាយថា៖ «ចំពោះគូស្រករ ពេលនេះនាងខ្ញុំសុំពុំទាន់គិតទេ ដោយចង់ប្រើពេលវេលាដើម្បីរកប្រាក់សិនចុះ»។
តែតារាស្រីមានរាសីឡើងខ្លាំងទាំងចម្រៀង និងថតស្ប៉តពាណិជ្ជកម្មផងដែរនោះ តែកញ្ញាហាក់ដូចជាមិនបានធីបនូវបញ្ហាស្នេហាចោលមួយអន្លើឡើយ ដោយនាងក៏បានទុកពេលខ្លះ ដើម្បីសម្លឹងរកមើលពីគុណសម្បត្តិអនាគតគូស្នេហ៍ដ៏សមសួនរបស់ខ្លួនផងដែរ។
កញ្ញា សុខ ពិសី ក៏ធ្លាប់បានថ្លែងប្រាប់ភ្នំពេញប៉ុស្តិ៍ ទាំងបើកចំហដែរចំពោះរឿងក្រុមកន្លង់តាមស្រលាញ់ឲ្យដឹងថា៖ «តាមពិតទៅ សម្រាប់នាងខ្ញុំ រឿងមានអ្នកស្រឡាញ់ច្រើនតាមស្រឡាញ់ មិនមែនទើបតែឥឡូវនេះទេគឺមានប៉ុន្មានឆ្នាំមកហើយ។ តែមកទល់ពេលនេះ នាងខ្ញុំដូចជាពុំទាន់បានពេញចិត្តអ្នកណាម្នាក់នៅឡើយនោះទេ»៕