ភ្នំពេញៈ ដោយសារខ្លួនជាអ្នកស្រឡាញ់ និងចូលចិត្តចិញ្ចឹមសត្វឆ្កែនៅផ្ទះនោះ ស្រាប់តែថ្មីៗនេះបង្កភាពភ្ញាក់ផ្អើលដល់មហាជនដែលតារាចម្រៀងស្រី សំឡេងស្រួយ ឈរជើងយូរលើទ្រនំសាន់ដេ កញ្ញា សុខ ពិសី បង្ហាញចំណាប់អារម្មណ៍អាណិតអាសូរ និងទទូចឲ្យបញ្ឈប់ការធ្វើបាបដល់សត្វឆ្កែគ្រប់រូបភាព ក្រោយពីនាងចំណាយប្រាក់ទិញសត្វឆ្កែ ៨ ក្បាលពីឈ្មួញកណ្តាល នៅខេត្តកំពង់ធំកន្លងមកនេះ។
តារាចម្រៀងស្រីដែលកំពុងតែកាក់កបនឹងការងារក្រៅសិល្បៈគឺថតស្ប៉តពាណិជ្ជកម្មធំៗតាំងពីឆ្នាំចាស់ចូលដល់ឆ្នាំថ្មី កញ្ញា សុខ ពិសី ប្រាប់ភ្នំពេញប៉ុស្តិ៍ថា៖ «ព្រោះតែនាងខ្ញុំមានការអាណិតអាសូរខ្លាំងពេលនាងខ្ញុំបានវិលត្រឡប់មកពីកម្មវិធីប្រគំតន្ត្រីនៅខេត្តកំពង់ធំកាលពីថ្ងៃទី ៨ ខែមីនា កន្លងមកនោះនៅខណៈពេលជិះឡានតាមផ្លូវឃើញហើយក៏ចុះទៅសួរនាំ ដើម្បីសុំទិញសង្គ្រោះជីវិតសត្វឆ្កែ ដែលគួរឲ្យអាណិតទាំងនោះដែលមានចំនួន ៨ ក្បាល ហើយបាននាំយកមកទុកផ្ទះខ្ញុំ បានប៉ុន្មានថ្ងៃដែរទើបបានសម្រេចចិត្តឲ្យទៅអ្នកដែលស្រឡាញ់ចូលចិត្តចិញ្ចឹមសត្វឆ្កែតាមផ្ទះ ដែលមានសន្តានចិត្តល្អដឹងប្រវត្តិច្បាស់ទើបបាននាងខ្ញុំហ៊ានឲ្យយកពួកគាត់ទៅចិញ្ចឹមបន្ត»។
ក្រៅពីខ្លួនមានទឹកចិត្តស្រឡាញ់អាណិតអាសូរដល់សត្វចិញ្ចឹម ដែលបច្ចុប្បន្ននេះកំពុងតែប្រឈមទៅនឹងការធ្វើបាបដាក់អន្ទាក់ចាប់យកទៅលក់នៅទីផ្សារនៃអ្នកនិយមបរិភោគអាហារសាច់ឆ្កែ ព្រោះតែពួកគេមានជំនឿថាជាអាហារប៉ូវកម្លាំងនោះទើបបានតារាចម្រៀងស្រីសាច់ខ្ចី សុខ ពិសី ក៏មានសំណូមពរ ដោយភាពទទូចដែរទៅដល់មហាជនដែលពាក់ព័ន្ធនឹងទង្វើមិនល្អលើសត្វចិញ្ចឹមដ៏ស្លូតបូតនេះផងដែរ ព្រោះសត្វក៏ត្រូវការរស់។
កញ្ញា សុខ ពិសី បានលើកឡើងជាសំណូមពរថា៖ «នាងខ្ញុំក៏សូមចិត្តដល់បងប្អូនដែលជឿថាពិសាសាច់ឆ្កែ ប៉ូវកម្លាំងនោះសូមកុំជឿដូច្នេះទៀតអីព្រោះជាការចូលរួមជំរុញឲ្យអ្នកចិញ្ចឹមសត្វមួយនេះលែងមានភាពមេត្តាទៅដល់សត្វខ្លួនឯងរហូតហ៊ានលក់ដូរអាយុជីវិតគ្នា។
ខណៈអ្នកលក់ម្ហូបពីសាច់សត្វនេះក្តី និងឈ្មួញកណ្តាល ឬអ្នកដាក់អន្ទាក់ចាប់សត្វឆ្កែលក់ ក៏អ៊ីចឹងដែរសូមមេត្តាបញ្ឈប់រឿងនេះតទៅទៀត ព្រោះថាសត្វឆ្កែគឺជាសត្វចិញ្ចឹមមួយប្រភេទដែលមានភាពស្លូតបូតមានចិត្តស្មោះត្រង់នឹងម្ចាស់របស់វា ហើយវាក៏ចេះជួយការពារទ្រព្យសម្បត្តិលោកអ្នកទៀតជាពិសេស វាជួយការពារផ្ទះសំបែងដែរ»៕