.jpg)
តារាចម្រៀងស្រីសំឡេងស្រួយ ប្រចាំទ្រនំសាន់ដេ កញ្ញា សុខ ពិសី។ រូបថត ភ្នំពេញប៉ុស្តិ៍
ភ្នំពេញៈ បង្កការភ្ញាក់ផ្អើលជាថ្មី ខណៈតារាចម្រៀងស្រីលំដាប់ជួរមុខនៃទ្រនំសាន់ដេ កញ្ញា សុខ ពិសី ត្រូវមហាជនកត់សម្គាល់ថា រាងស្រកទម្ងន់ព្រោះតែល្បីថានាងជិតចូលរោងការស្របពេលឃើញតារារួមអាជីពនានាមាន ឱក សុគន្ធកញ្ញា មាស សុខសោភា ពេជ្រ សោភា និង សុគន្ធ និសា ជាដើម ពួកគេសុទ្ធតែមានម្ចាស់ចិត្តរៀងៗខ្លួនអស់ទៅហើយ។
កន្លងមកថ្មីៗនេះក៏ធ្លាប់លេចឮដំណឹងដែរថា កញ្ញា សុខ ពិសី កំពុងតែត្រូវបានកូនប្រុសឧកញ៉ាមានទ្រព្យស្តុក មានមុខជំនួញរកស៊ីផ្នែកសណ្ឋាគារ និងរ៉ែតាមសុំស្នេហ៍យ៉ាងស្អិតល្មួត តែម្តងដោយបានបង្កការភ្ញាក់ផ្អើលទៅដល់មហាជនម្តងរួចមកហើយ។
តារាចម្រៀងដែលកាក់កបនឹងការងារក្រៅសិល្បៈគឺថតស្ប៉តពាណិជ្ជកម្មធំឲ្យសាបៀរ Ganzberg កាលពីឆ្នាំចាស់ ហើយឆ្នាំថ្មីនេះក៏បានក្លាយជាអ្នកតំណាងផលិតផលរក្សាសម្ផស្សក្រែមលាបមុខម៉ាក ហ្វែរ អែន ឡោហ្វលី រយៈពេល ១ ឆ្នាំខណៈខ្លួនជាតារាចម្រៀងនៅទ្រនំផលិតកម្មសាន់ដេកញ្ញា សុខ ពិសី បានប្រាប់ថា៖ «ចំពោះរឿងថា នាងខ្ញុំជិតរៀបការនោះគឺមិនពិតទេ!ប្រសិនបើមានពិតមែននោះ នាងខ្ញុំក៏មិនលាក់បាំងដែរ ហើយនឹងបង្ហាញប្រាប់បងប្អូនជាមិនខាន។ ដោយឡែករឿងថានាងខ្ញុំសម្រកទម្ងន់វិញ ខ្ញុំទទួលស្គាល់ថាដូចជាត្រូវ ព្រោះថាមួយរយៈនេះនាងខ្ញុំបានដាក់ពេលវេលាកំណត់ខ្លួនឯងហាត់ប្រាណជាប្រចាំគឺមួយថ្ងៃដល់ទៅ ២ ម៉ោងឯណោះ ទើបមើលទៅដូចជារាងកាយខ្ញុំខុសពីមុន។ តែតាមពិតទៅបើនិយាយពីទម្ងន់ខ្ញុំវិញនោះគឺនៅរក្សាដូចជាមុនទេគឺចំនួន ៥០ គីឡូដដែលហ្នឹង!»។
ថ្មីៗនេះដំណឹងចចាមអារ៉ាមចាស់ផ្ទុះឡើងសាជាថ្មីថា តារាចម្រៀងស្រីសាច់សខ្ចី សុខ ពិសី នឹងចូលរោងការជាមួយថៅកែផលិតកម្មសាន់ដេ ខណៈក៏លេចឮដំណឹងមុននេះដែរថា នាងកំពុងតែត្រូវបានកូនប្រុសឧកញ៉ាមានទ្រព្យស្តុក មុខជំនួញរកស៊ីផ្នែកសណ្ឋាគារ និងរ៉ែតាមសុំស្នេហ៍យ៉ាងស្អិតល្មួតផងនោះ ហើយកញ្ញា សុខ ពិសី ក៏បានច្រានចោល និងសុំមិនបកស្រាយអ្វីទៀតឡើយ ព្រោះតែជារឿងចចាមអារ៉ាមចាស់ដែលពាក់ព័ន្ធនឹងម្ចាស់ផលិតកម្មខ្លួនច្រៀងផងនោះ។
តែតារាចម្រៀងស្រីមានរាសីឡើងខ្លាំងទាំងចម្រៀង និងការថតស្ប៉តពាណិជ្ជកម្មដែលហាក់ដូចជាមិនបានធីបចោលបញ្ហាស្នេហានោះគឺថានាងក៏បានទុកពេលខ្លះ ដើម្បីសម្លឹងមើលពីគុណសម្បត្តិនៃបុរសជាអនាគតគូស្នេហ៍ដ៏សមសួនខ្លួនជាបណ្តើរៗផងដែរ។
តារាចម្រៀងស្រីសាច់សខ្ចីដូចបណ្តូលចេកនាង សុខ ពិសី ធ្លាប់បង្ហើបប្រាប់ភ្នំពេញប៉ុស្តិ៍ថា ៖ «តាមពិតទៅមានក្រុមកន្លង់ទាំងចាស់ ទាំងក្មេងនៅក្រៅរង្វង់សិល្បៈ និងនៅខាងក្នុងសង្គមសិល្បៈច្រើនតាំងពីយូរមកហើយ មិនត្រឹមតែតាមសុំស្នេហ៍ទេគឺថាថែមបានទៅសួរនាំដល់ចាស់ទុំរបស់ខ្ញុំទៀតផងតែនាងខ្ញុំមិនទាន់បើកចិត្តគិតគូររឿងនេះនៅឡើយទេ»៕
