.jpg)
តារាចម្រៀងស្រី សុខ សីឡាលីន បង្ហាញលទ្ធផលប្រឡងជាប់ក្របខ័ណ្ឌនគរបាល។ រូបថត ហ្វេសប៊ុក
ភ្នំពេញ៖ ថ្មីៗនេះ តារាចម្រៀងស្រីដែលនិយមបកស្រាយបទចម្រៀង និងលេងស្ទីលបរទេសប្រចាំហង្សមាសកញ្ញា សុខ សីឡាលីន បង្ហាញលទ្ធផលជាប់ជាស្ថាពរក្នុងការប្រឡងក្របខ័ណ្ឌមន្រ្តីនៃសាលាបណ្ឌិត្យសភានគរបាលកម្ពុជា ដោយបង្កការភ្ញាក់ផ្អើលពីមហាជនសាជាថ្មី។
ដំណឹងដែលតារាចម្រៀងស្រីប្រចាំផលិតកម្មហង្សមាសជាប់ជាមន្រ្តីក្របខ័ណ្ឌនៃសាលាបណ្ឌិត្យសភានគរបាលកម្ពុជានេះ កញ្ញា សុខ សីឡាលីន ដែលបានក្ដោបឱកាស ធ្វើជាគណៈកម្មការក្នុងកម្មវិធី X Factor Cambodia រដូវកាលទី ១ បង្ហើរសារពីជោគជ័យរបស់ខ្លួនថា៖ «ទីបំផុត ខ្ញុំប្រឡងជាប់ក្របខ័ណ្ឌបណ្ឌិត្យសភានគរបាលកម្ពុជា សម្រេចបំណងប៉ាម៉ាក់ហើយ! ទី ១៤ កុម្ភៈ នេះ ជាថ្ងៃល្អសម្រាប់ខ្ញុំ»។
ទន្ទឹមនឹងមានការសាទរពីសំណាក់ក្រុមទស្សនិកជន អ្នកនិយមតាមដានបណ្ដាញសង្គម មានក្រុមគ្រួសារមិត្តរួមអាជីព ដោយសារតែកញ្ញា សុខ សីឡាលីន បានសម្រេចបំណងប្រាថ្នាដ៏ធំរបស់ខ្លួនក្រៅអាជីពសិល្បៈ។
កញ្ញា សុខ សីឡាលីន បង្ហើបពីមូលហេតុប្រឡងក្របខ័ណ្ឌមន្រ្តីនគរបាល និងអារម្មណ៍ត្រៀមខ្លួនចូលធ្វើការក្នុងពេលឆាប់នេះដែរថា៖ «ការមកប្រឡងក្របខ័ណ្ឌរដ្ឋ ក៏ដោយសារជាក្តីប្រាថ្នារបស់ប៉ាម៉ាក់គាត់ស្រឡាញ់ និងចង់ឲ្យចូលធ្វើការផ្នែកនេះយូរហើយដែរ។ សម្រាប់ខ្ញុំផ្ទាល់ក៏ស្រឡាញ់ការងាររដ្ឋដែរ ហើយដោយសារតែមួយរយៈពេលមុនៗនោះ ជាប់រវល់នឹងការងារសិល្បៈខ្លាំងពេកទើបមិនបានប្រឡង ទើបតែឆ្នាំ ២០២០ នេះ ខ្ញុំក៏សម្រេចចិត្តមកប្រឡងរហូតបានជាប់ជាសា្ថពរកាលពីថ្ងៃទី ១៤ ខែកុម្ភៈ កន្លងមកនេះ។ ចំពោះការចូលធ្វើការងារថ្ងៃដំបូង នៅផ្នែកអ្វីក៏មិនទាន់ដឹងទេ ខណៈខ្ញុំក៏ត្រៀមចិត្តចាំមើលនូវសេចក្តីជូនដំណឹងផងដែរ»។
ទើបតែទទួលបានការងារថ្មីក្របខ័ណ្ឌរដ្ឋ គឺជាមន្រ្តីនៃសាលាបណ្ឌិត្យសភានគរបាលកម្ពុជាក្តី មើលទៅពេលវេលាធ្វើការងាររដ្ឋផង និងការងារសិល្បៈផងដែរនោះ កញ្ញា សុខសីឡាលីន អាចទំនងជាជួបបញ្ហានៃការពិបាកនឹងលៃលកហើយ ដូចជាពាក្យចាស់ពោលថា «ខ្លួន ១ ជិះទូក ២» គឺពិតជាមិនស្រួលឡើយ។
តែតារាចម្រៀងស្រី កំពុងតែឡើងកូដសន្សឹមនៅហង្សមាស ដោយបានក្លាយជាគណៈកម្មការម្នាក់នៃកម្មវិធី X Factor- Cambodia រដូវកាលទី ១ ដែលឧស្សាហ៍បង្កើតភាពភ្ញាក់ផ្អើលដល់មហាជនរូបនេះក៏បញ្ជាក់ថា៖ «បើតាមមើលទៅដូចជាមិនមានការប៉ះពាល់រវាងការងាររដ្ឋ និងការងារសិល្បៈខ្ញុំទេ ដោយសារការងាររដ្ឋធ្វើនៅថ្ងៃចន្ទដល់សុក្រ ខណៈសៅរ៍អាទិត្យវិញខ្ញុំមកលេងសិល្បៈ»៕
