ភ្នំពេញ៖ ប្រហែលជាមកពីរូបសម្ផស្សរបស់តារាចម្រៀងស្រីរាងស្លីម កាន់តែស្អាតបែបធម្មជាតិពិតៗនេះ ហើយទេដឹង ទើបថ្មីៗនេះ ធ្វើឲ្យមហាជនភ្ញាក់ផ្អើលយ៉ាងខ្លាំង មានស្រ្តីខ្មែរម្នាក់ឈ្មោះ នីតា ហ៊ានលះបង់ កែសម្ផស្សមុខមាត់ ដើម្បីបានទម្រង់មុខដូចជាតារាក្នុងដួងចិត្ត គឺអ្នកនាង សុខ ស្រីនាង។
គេធ្លាប់តែឃើញមានឯក្រៅប្រទេសដូចជានៅកូរ៉េ ចិន ឬអឹរ៉ុប ដែលអ្នកគាំទ្រលះបង់សាច់ឈាម និងប្រឈមនឹងមុខកាំបិតវះកាត់កែសម្ផស្ស ដើម្បីឲ្យដូច Idols ខណៈនៅស្រុកខ្មែរក៏មានស្រ្តីម្នាក់ហ៊ានកែសម្ផស្សមុខមាត់ខ្លួន ដើម្បីឲ្យមុខមាត់ដូចតារានៅក្នុងដួងចិត្តដែលបញ្ជាក់ពីក្តីស្រឡាញ់។
បើគ្រាន់តែពិនិត្យមើលរូបថតផ្ទៃមុខមួយភ្លែត គឺថាពិតជាស្រដៀងគ្នាខ្លាំងណាស់ រវាងតារាចម្រៀងស្រីមានសំឡេងស្រាលពីរោះរណ្តំ សុខ ស្រីនាង និងអ្នកគាំទ្រឈ្មោះ នីតា នោះកុំតែខុសកម្ពស់គ្នាទេ កុំអីអាចមើលច្រឡំថា ជាកូនភ្លោះ។
ថ្លែងទាំងសប្បាយចិត្ត ខណៈគេក៏អាចនិយាយបានថា ទំនងជាតារាចម្រៀងស្រីខ្មែរម្នាក់ដំបូងផង ដែលមានអ្នកគាំទ្រហ៊ានមកលះបង់បែបនេះ ដើម្បី Idol ជាទីស្រឡាញ់នោះ ខណៈអ្នកនាង សុខ ស្រីនាង ប្រាប់ឲ្យភ្នំពេញប៉ុស្តិ៍ដឹងថា៖ «ខ្ញុំ ពិតជាសប្បាយចិត្តខ្លាំង ហើយក៏ត្រេកអរណាស់ ដែលទទួលបាននូវការស្រឡាញ់អស់ពីចិត្តរបស់ Fan ម្នាក់នេះ និងហ៊ានលះបង់រហូតកែសម្ផស្សវះកាត់ច្រមុះ និងវះបបូរមាត់នៅប្រទេស វៀតណាម ដើម្បីឲ្យមុខមាត់គាត់មើលទៅដូចនាងខ្ញុំ។
បើតាមគាត់ប្រាប់ខ្ញុំឲ្យដឹងនោះ កាលពេលគាត់វះកាត់ច្រមុះ គឺស្ថានភាពសុខភាពរបស់ប្អូនស្រី នីតា មិនល្អនោះឡើយ តែគាត់នៅតែចង់ធ្វើ គឺលះបង់ការវះកាត់ដោយយកឆ្អឹងខ្ចីត្រចៀក ប៉ះប៉ូវត្រង់ឆ្អឹងខ្ទង់ច្រមុះ ដែលចំណាយពេលយូរជាងការវះកាត់ធម្មតា ក៏ព្រោះក្តីស្រឡាញ់ចង់មានទម្រង់មុខដូចខ្ញុំនោះ»។
តារាចម្រៀងស្រី ដែលទើបទទួលបានភាពជោគជ័យលើអាជីពចម្រៀងនៅទ្រនំថ្មីហង្សមាស បានតំណែងជាគណៈកម្មការផ្តល់ពិន្ទុកម្មវិធីប្រឡងចម្រៀងកុមារលំដាប់ពិភពលោក Cambodian Idol Junior រដូវកាលទី ១ សុខ ស្រីនាង ក៏រំឭកពីការលះបង់របស់ នីតា កែសម្ផស្សឲ្យមានមុខមាត់ដូចខ្លួនដែរថា៖ «ឥឡូវនេះ ប្អូនស្រី នីតា និងនាងខ្ញុំ បីដូចជាបងប្អូនដែលជាប់សាច់ឈាម គឺលើសពីអ្នកគាំទ្រដោយសារ គ្រួសារខ្ញុំ និងគ្រួសារគាត់ រាប់អានគ្នាដូចគ្រួសារកើតពីផ្ទៃតែមួយព្រោះតែនិស្ស័យ។
តាមពិត គាត់បានសម្រេចចិត្តទៅវះកាត់យូរហើយតាំងពី ២-៣ ឆ្នាំមុនមក គ្រាន់តែមិនសូវមានអ្នកដឹងពីមុន ទើបតែផ្ទុះឡើងវិញមានអ្នកដឹង។ គាត់វះកាត់ច្រមុះ និងមាត់ តាំងពីនៅលីវឥឡូវនេះ គាត់មានស្វាមី មានកូន និងមានរបររកស៊ី»៕