.jpg)
តារាចម្រៀងស្រីកំពូលនៅទ្រនំហង្សមាស ឱក សុគន្ធកញ្ញា បង្ហោះរូបមានគភ៌ដំបូងជាមួយស្វាមី។ រូបថត សហការី ហេង ជីវ័ន
ភ្នំពេញៈ ថ្មីៗនេះកំពូលតារាចម្រៀងស្រីនៅទ្រនំហង្សមាសអ្នកនាង ឱក សុគន្ធកញ្ញា បានបង្ហោះសារមួយឃ្លាបង្ហាញពីក្តីរំភើបចិត្តយ៉ាងខ្លាំងទៅនឹងដំណឹងល្អមានបុត្រដំបូងរបស់ខ្លួនតាមបណ្តាញសង្គម ក្រោយពីបានរៀបមង្គលការដ៏គគ្រឹកគគ្រេងតាំងពីថ្ងៃទី ១៦ ខែឧសភា ឆ្នាំ ២០១៩ កន្លងមកនៅឯសណ្ឋាគារសុខា។
តារាចម្រៀងស្រីដែលរក្សាបានកិត្តិស័ព្ទល្អលើវិថីសិល្បៈរហូតថៅកែហង្សមាសភ្ជាប់និស្ស័យជាសាច់ឈាមធ្វើជាប្អូនថ្លៃដោយស្តីដណ្តឹងឲ្យប្អូនបង្កើតលោក អ៊ឹង សុខលី ធ្វើជាភរិយា ក្រោយពីអ្នកនាង ឱក សុគន្ធកញ្ញា បានឈរជើងយូរនៅទ្រនំផលិតកម្មដ៏សុខសាន្តនេះ។
អ្នកនាង ឱក សុគន្ធកញ្ញា បង្ហោះរូបភាពមួយសន្លឹកលក្ខណៈជាស្ត្រីពពោះ ហើយមានស្វាមីថើបអមសារថា៖ «ពួកយើងកំពុងរង់ចាំការមកដល់របស់គាត់..! We are waiting for you baby»។
រំពេចនោះក៏មានមហាជនអ្នកគាំទ្រ និងមិត្តភក្តិក្នុងសង្គមសិល្បៈចុច Like និង Comment អបអរសាទរយ៉ាងសន្ធឹកសន្ធាប់ដោយមានចំនួន Views ដល់ 22K, 2.1K Comments, 4.9K Shares។
អ្នកខ្លះបានសរសេរថា៖ «អបអរសាទរ l dol ជូនពរឲ្យមានសុខភាពល្អទាំងម៉ាក់ៗ និងកូន និងចូលរួមត្រេកអរផងអាយដលសំណប់-70!»។ ឯអ្នកខ្លះទៀតបានចេញសារដោយនិយាយត្រង់ៗថា៖ «គ្រាន់តែឃើញបង កញ្ញា បែកសាច់រាងមូលពេលឃើញព័ត៌មានចុះផ្សាយ អ្នកណាក៏ថាបងធាត់ដែរ តែខ្ញុំគិតក្នុងចិត្តថាបងមានកូនហើយ ឥឡូវនេះមានមែន!គ្រាន់តែបងមិនទាន់បញ្ចេញ! ចូលរួមអបអរសាទរផងបង។ សូមឲ្យបុត្រមានថ្ពាល់ខួចកាត់ទៅស្វាមី ហើយភាពរួសរាយកាត់បង កញ្ញា»។
គួរបញ្ជាក់ថាតារាចម្រៀងស្រីរូបនេះពិតជាទទួលបានការគាំទ្រ និងទាក់ទាញនូវចំណាប់អារម្មណ៍ពីមហាជនខ្លាំងណាស់ សូម្បីតែបង្ហោះរូបថតអាពាហ៍ពិពាហ៍ខ្លួន ក៏នាងមានលក្ខខណ្ឌលេងជាថ្នូរនឹងប្រិយមិត្តផងដែរ ដោយបានសរសេរថា៖ «សួស្ដីមិត្តភក្តិ បងប្អូនទាំងអស់គ្នា! ថ្ងៃនេះមានរូបបែកធ្លាយរូប Pre-Wedding អាពាហ៍ពិពាហ៍នាងខ្ញុំ តើបងប្អូនជឿដែរឬទេ? បើចង់ដឹងការពិតរូបថត Preweddings ជាផ្លូវការសូម Share Status នេះឲ្យបានចំនួន 168k Share ខ្ញុំនឹងបង្ហាញរូបជាផ្លូវការខ្ញុំជូនបងប្អូនទាំងអស់គ្នា»។
ទន្ទឹមនឹងការបង្កើតឲ្យមានភាពភ្ញាក់ផ្អើលនេះក៏មានការទទួចចង់ដឹងដែរថា តើបុត្រដំបូងនៅក្នងផ្ទៃដែលជាចំណងស្នេហ៍អាពាហ៍ពិពាហ៍របស់អ្នកនាង ឱក សុគន្ធកញ្ញា និងលោក អ៊ឹង សុខលី ជាប្អូនប្រុសបង្កើតថៅកែហង្សមាសនោះ មានអាយុកាលប៉ុន្មានសប្តាហ៍ ឬខែហើយនោះទាំងខាងមហាជនក៏ដូចជាខាងបណ្តាញផ្សព្វផ្សាយ។
ដោយឡែកភ្នំពេញ-ប៉ុស្តិ៍ក៏មិនអាចទំនាក់ទំនងសុំសេចក្តីបញ្ជាក់ពីអ្នកនាង ឱក សុគន្ធកញ្ញា បានទេដោយសារទូរស័ព្ទមិនអាចទាក់ទងបាន៕
