.jpg)
សុដាលីសក្នុងឈុតសម្លៀកបំពាក់ពេលទទួលសញ្ញាបត្រឌីហ្សាញ។ រូបថត អ៊ីនស្តាក្រាម
ភ្នំពេញៈ ក្រៅពីមុខតំណែងជានាយិកានៅផលិតកម្មមហាហង្សបន្តពីឪពុកគឺលោក អ៊ិន សុភិន និងបានប្រកបរបរហាងលក់ផលិតផលអនឡាញឈ្មោះ Katy Korner លក់កញ្ចក់ភ្នែក Contact-Len ដែលកំពុងតែពេញនិយមផ្តាច់មុខមកពីក្រៅប្រទេសមានគុណភាពខ្ពស់នោះ ក៏លេចឮដំណឹងថាអ្នកនាង ភិន សុដាលីស អាចមិនប្រឡូកនឹងការងារសិល្បៈទេ ក្រោយពីបានបញ្ចប់ការសិក្សាជំនាញឌីហ្សាញពីសាកលវិទ្យាល័យលីមកុងវីងអន្តរជាតិដ៏ល្បីនៅកម្ពុជាកាលពីចុងខែមុនកន្លងមកនោះ។
ខណៈដែលតារាសម្ដែងស្រី ភិន សុដាលីស បានទទួលសញ្ញាបត្រផ្នែកឌីហ្សាញពីសាលាលីមកុងវីងអន្តរជាតិនោះក៏បានធ្វើឲ្យស្រទាប់មហាជន និងតារាសិល្បៈដូចគ្នាបានកោតសរសើរយ៉ាងខ្លាំងគឺដោយសារមុខវិជ្ជាដែលនាងសិក្សានូវឯកទេសពេញនិយម ចំណាយថ្លៃសិក្សាខ្ពស់ ហើយក៏ជាមុខវិជ្ជាមិនងាយសិក្សាផងដែរ។ ជារឿយៗតារាសម្តែងស្រីអ្នកមេម៉ាយក្តៅស្រួយ ភិន សុដាលីស មហាជនតែងតែបានចាប់អារម្មណ៍ខ្លាំងទៅនឹងសម្ព័ន្ធភាពឯកជនរបស់នាង ក្រោយពីបែកបាក់គូស្នេហ៍ និងឧស្សាហ៍បង្ហាញភាពស្និទ្ធស្នាលជាមួយនឹងបុរសប្លែកៗមុខ ខណៈនាងក៏ធ្លាប់បកស្រាយថា គ្រាន់តែជាតួប្រុស ដែលបានសម្តែងកុនជាមួយគ្នាប៉ុណ្ណោះ។
តែក្រោយពីរៀនចប់នូវមុខជំនាញឌីហ្សាញពីសាកលវិទ្យាល័យលីមកុងវីងមកក៏សាយភាយដំណឹងថា អ្នកនាង ភិន សុដាលីស ទំនងជាត្រូវបោះបង់ការងារសិល្បៈសម្តែងហើយ និងអាចចាប់យកនូវមុខងារមួយផ្សេងទៀតតាមជំនាញថ្មីដែលរៀនចប់នេះ។ យ៉ាងណាដំណឹងថា ស្រីស្រស់សាច់សខ្ចីនៅមានសម្រស់មិនចាញ់ក្រមុំ គឺជាកូនស្រីច្បងចាងហ្វាងផលិតកម្មមហាហង្ស ភិន សុដាលីស បានវិលមកសម្តែងទាំងកុនដុំ និងកុនភាគវិញ ក្រោយពីបានសម្រាលកូនស្រីតាំងពីមានវ័យ ៧ ខែ មកម្ល៉េះ និងចែកផ្លូវគ្នាពីអតីតគូស្នេហ៍លោក ប៉ែន ចំរ៉ុង មកនោះពិតជាបោះបង់សិល្បៈនោះក៏មិនត្រូវបានបកស្រាយផងដែរ ដោយសារតែប្រព័ន្ធទូរស័ព្ទនាងតេចូល តែនាងមិនលើកទទួលឡើយ។
ហើយក្រោយមកអ្នកនាង ភិន សុដាលីស ក៏បានផ្ញើសារតបវិញជាភាសាអង់គ្លេសដែលប្រែថា៖ «សុំទោស ខ្ញុំមិនអាចនិយាយបានទេពេលនេះ»។
បើតាមសម្តីឪពុករបស់ ភិន សុដាលីស គឺលោក អ៊ិន សុភិន ដែលបានបង្ហាញមោទនភាពយ៉ាងខ្លាំង ខណៈកូនស្រីរបស់លោកបញ្ចប់ការសិក្សាលើឯកទេសដ៏លំបាកបាននោះ ខណៈលោកបានបង្ហើបកាលពីពេលជូនកូនស្រីទទួលសញ្ញាបត្រកន្លងមកនោះថា សុដាលីស មិនច្បាស់ពីការបោះបង់សិល្បៈ ឬក៏ចាប់អាជីពជាអ្នកឯកទេសឌីហ្សាញទេ។ លោក អ៊ិន សុភិន គ្រាន់តែអះអាងថា នាងអាចមានការងារខ្លះទាក់ទងនឹងការឌីហ្សាញបន្ថែមពីលើសិល្បៈទើបនាងឧស្សាហ៍ចេញចូលក្រៅប្រទេសក៏ដោយសារមានការងារផ្នែកឌីហ្សាញនេះ៕
