.jpg)
អ្នកនិពន្ធបទភ្លេង និងតារាចម្រៀងលោក សួន ពិសិដ្ឋ។ រូបថត ហ្វេសប៊ុក
ភ្នំពេញៈ អ្នកនិពន្ធបទភ្លេងល្បីឈ្មោះបានបញ្ចប់ការសិក្សាពីប្រទេសកាណាដាលោក សួន ពិសិដ្ឋ ក្រោយពីបានបញ្ចប់ការងារជាមួយផលិតកម្មហង្សមាស អស់រយៈពេល ២ ឆ្នាំមកគេសង្កេតឃើញថា ផលិតករផលិតបទភ្លេងរូបនេះ ហាក់ដូចជាស្ងប់ស្ងាត់មិនសូវចេញតាមកម្មវិធីនានា ឬបង្ហើរសំនៀងថ្មីឡើយ ប៉ុន្តែលោកបែរជាមានវត្តមានក្នុងកម្មវិធី The melody រដូវកាលទី ១ របស់ទូរទស្សន៍បាយ័នជាគណៈកម្មការទៅវិញ។
ផលិតករបទភ្លេង និងជាអ្នកនិពន្ធបទចម្រៀងក៏ជាតារាចម្រៀងមួយរូបលោក សួន ពិសិដ្ឋ បានផ្តល់បទសម្ភាសមកកាន់ភ្នំពេញ ប៉ុស្តិ៍ ពីការស្ងប់ស្ងាត់ទីផ្សារចម្រៀងក៏ដូចជាផ្នែកសិល្បៈថា៖ «មួយរយៈនេះបងរវល់ធ្វើបទភ្លេង និងទំនុកច្រៀងទាក់ទងអ្វីដែលថ្មីៗឲ្យតារាជាច្រើននាក់ បងអត់មានពេលចេញបទចម្រៀងខ្លួនឯងទេ។ តាមពិតទៅបងជាគ្រូបង្វឹកអ្នកចម្រៀងឲ្យគេចេះច្រៀង ហើយដឹងគ្រប់តុងធ្លាក់ ឬឡើង តែមិនមែនមានន័យថាបងអាចច្រៀងបានគ្រប់បទទេ គ្រាន់តែបងជាអ្នកបង្រៀនគេប៉ុណ្ណោះ»។
លោក សួន ពិសិដ្ឋ ចូលរួមសម្ពោធភាពយន្តខ្មែរនាពេលថ្មីៗនេះ។ រូបថត ហ្វេសប៊ុក
អ្នកនិពន្ធបទភ្លេងដែលមានឈ្មោះល្បីក្នុងសហគមន៍ខ្មែរនៅក្នុងប្រទេសកាណាដាខាងតូរ្យតន្ត្រីកាលពីជិត ២ ទសវត្សរ៍មុន និងជាអ្នកនិពន្ធបទភ្លេងក្នុងប្រទេសកម្ពុជា ១ រូបដែលធ្លាប់បានចារឈ្មោះនៅលើផ្ទាំងមាសស្ថិតក្នុងប្រទេសកាណាដា លោក សួន ពិសិដ្ឋ បានបង្កើតស្នាដៃថ្មីៗជាច្រើនទាក់ទងជាមួយការនិពន្ធបទភ្លេង និងទំនុកច្រៀងដែលមិនចម្លងពីប្រទេសជិតខាង ថែមទាំងមានឆន្ទៈខ្ពស់ក្នុងការបង្កើតស្នាដៃថ្មីៗនៅក្នុងវិស័យសិល្បៈទៀតផង។
លោក សួន ពិសិដ្ឋ អ្នកនិពន្ធឆ្នើមប្រចាំប្រទេសរូបនេះក៏បានបន្តទៀតថា៖ «ក្រោយពីបងបានចប់កុងត្រាពីផលិតកម្មហង្សមាសមក បងបានផលិតបទចម្រៀងជាច្រើនសម្រាប់តារាចម្រៀងដូចជា ដួង វីរៈសិទ្ធ វង្ស ដារារតនា ជាដើម ហើយក៏នៅមានច្រើនទៀតដែរ ហើយបន្តិចទៀតបងរវល់ក្នុងកម្មវិធី The melody រដូវកាលទី ២ ដែលចាប់ផ្តើមក្នុងពេលឆាប់ៗនេះផងដែរ បង្ហើបបន្តិចចុះណាបងកំពុងបង្កើតកម្មវិធីធំមួយទាក់ទងការបង្កើតស្នាដៃថ្មីៗរបស់កូនខ្មែរដែលជាគំនិតរបស់បងផ្ទាល់ ហើយក៏ជិតដំណើរការហើយដែរ»។
ក្នុងរយៈក្រោយពេលចាកចេញពីផលិតកម្មជួរមុខនៅក្នុងប្រទេសលោក សួន ពិសិដ្ឋ មិនត្រឹមតែជាគណៈកម្មការក្នុងកម្មវិធី The melody នឹងជាអ្នកផលិតបទចម្រៀងឲ្យតារាល្បីប្រចាំប្រទេសប៉ុណ្ណោះទេក្នុងអំឡុងពេលនេះដែរ អ្នកនិពន្ធឆ្នើមរូបនេះក៏មានផលិតកម្មចម្រៀងមួយផ្ទាល់ខ្លួន ហើយក៏មានគម្រោងចេញចម្រៀងសម្រាប់ពិធីបុណ្យចូលឆ្នាំខ្មែរខាងមុខនេះដែរ ដោយលោកមិនបានបញ្ជាក់ពីឈ្មោះផលិតនោះទេ គ្រាន់តែបង្ហើបថា ផលិតកម្មលោកក៏មានការផលិតកុនបែបអប់រំផងដែរ។
លោក សួន ពិសិដ្ឋ ដែលជាបុគ្គលសំខាន់ម្នាក់នៅក្នុងវិស័យសិល្បៈក៏បានបន្ថែមទៀតថា៖ «ក្រៅពីការងារសិល្បៈដែលបានធ្វើរាល់ថ្ងៃ និងមានការរវល់ច្រើនស្ទើរគ្មានពេលសម្រាក បងក៏មានភោជនីយដ្ឋាន ៣ ទៅ ៤ កន្លែង និងឆ្លៀតធ្វើជំនួញផ្ទាល់ខ្លួនបន្តិចបន្តួចដែរ ប៉ុន្តែមិនដែលមានអ្នកណាដឹងទេ»៕
