.jpg)
តារាចម្រៀង សួស វីសា និងក្រុមរាំរបស់នាងប្រមាណជា ១០ នាក់។ ហ្វេសប៊ុក
ភ្នំពេញ: តារាចម្រៀងផលិតកម្មហង្សមាស ដែលទើបលេចធ្លោនឹងឈុតសម្លៀកបំពាក់ប្លែកភ្នែកលើឆាក កញ្ញា សួស វីសា បានប្រាប់អ្នកកាសែត នៅប៉ុស្ដិ៍លេខ ៥ ថា នាងនឹងធ្វើបទចម្រៀងដោយខ្លួនឯង ចំនួនជិត ១០ បទក្នុងពេលឆាប់ៗ សម្រាប់បង្ហោះលើយូធូប ដោយបទទាំងនោះមិនប៉ះពាល់ដល់ហង្សមាសឡើយ។
លើគោលការណ៍ផលិតបទចម្រៀងខ្លួនឯង ទាំងខ្លួនកំពុងស្ថិតនៅជាតារាចម្រៀងផលិតកម្មធំ ហង្សមាសនោះ តារាចម្រៀងស្រី ដែលធ្លាប់រងគ្រោះនឹងពាក្យចចាមអារ៉ាមរឿងអាស្រូវស្នេហ៍ដល់ថ្នាក់ដឹកនាំកំពូល កញ្ញា សួស វីសា ហើយថ្មីៗនេះកំពុងរន្ទឺនឹងចំណងស្នេហ៍ជាមួយតារាសម្ដែងប្រុសជាសិស្សប្អូនឈ្មោះ ថម មី នោះ នាងក៏បានប្រាប់ឲ្យដឹងយ៉ាងដូច្នេះថា៖ «ព្រោះជាបទពីដើមៗដែលនាងចង់ច្រៀង និងរក្សារមរតកដើមដើម្បីយកបទទាំងនោះ ទៅរំឭក និងច្រៀងតាមកម្មវិធីផ្សេងៗឲ្យបងប្អូននៅតែចងចាំបទចម្រៀងទាំងនោះនៅក្នុងបេះដូង»។
តារាចម្រៀងមកពីខេត្តស្វាយរៀង និងជាម្ចាស់បទ «វាសនាបុប្ផាស្វាយរៀង» ដែលជាបទចម្រៀងកំពុងទទួលបានការពេញនិយមទាំងស្រទាប់យុវវ័យ និងមនុស្សសម័យកណ្តាលផងនោះ កញ្ញា សួស វីសា ក៏បានឲ្យដឹងបន្តថា៖ «ការចំណាយថវិកាក្នុងការធ្វើបទចម្រៀងទាំងនោះ គឺអស់ប្រាក់តិចតួចប៉ុណ្ណោះ ព្រោះខ្ញុំគ្រាន់តែឈរច្រៀងធម្មតាៗ ហើយខ្ញុំនឹងប្រាប់ទៅក្រុមហ៊ុនហង្សមាសឲ្យដឹងជាមុន ក្នុងការដែលខ្ញុំធ្វើបទចម្រៀងដោយខ្លួនឯងនេះដែរ ព្រោះថា ខ្ញុំជាអ្នកចម្រៀងដែលមានកុងត្រាជាមួយហង្សមាស»។
ស្រីស្រស់សាច់សខ្ចី សួស វីសា ក្រៅពីអាជីពចម្រៀង បុប្ផាមានដើមកំណើតពីទឹកដីខេត្តស្វាយរៀង ក៏ល្បីផលិតកម្មរស្មីហង្សមាសបានលើកស្ទួយនាងឲ្យឈានចូលទៅថតភាពយន្ដផងដែរ ហើយលើឆាកតន្ត្រី នាងក៏មានក្រុមរាំអមច្រើនរហូតដល់ទៅជិត ១០ នាក់ផង។
ក្នុងជំហរលើកស្ទួយសិល្បៈចម្រៀងសម័យដើម ទាំងខ្លួនសុខចិត្តចំណាយថវិកាពីហោប៉ៅមកផលិតឲ្យចេញជាចម្រៀង ផ្សព្វផ្សាយអនឡាញនោះ សួស វីសា ក៏អះអាងថា៖ «មហិច្ឆតាខ្ញុំលើអាជីពចម្រៀងនៅមានបន្តទៀត អ៊ីចឹងហើយបានជាខ្ញុំមិនទាន់ចង់គិតរឿងស្នេហា ដែលមុននេះក៏ល្បីថា ខ្ញុំជិតចូលរោងការ ជាមួយតារាសម្តែងរូបសង្ហាអីណា ទាំងព័ត៌មាននេះមិនមែនជាការពិតទេបងប្អូន»។
នាងក៏បានបញ្ជាក់ថា៖ «ខ្លួនខ្ញុំមិនដែលបានដឹងផង ហើយការផ្សាយក៏មិនសម្ភាសខ្ញុំដែរ ទាំងចិត្តខ្ញុំក៏មិនទាន់ចង់គិតរឿងហ្នឹងដែរ អ្វីដែលខ្ញុំគិតគឺរឿងក្នុងក្រុមគ្រួសារឪពុកម្តាយ និងពង្រឹងអាជីពចម្រៀងរបស់ខ្ញុំនោះទេ»៕
