.jpg)
តារាចម្រៀងស្រី សួស វីសា និងគូដណ្តឹងដែលជិតចូលរោងការចុងឆ្នាំនេះលោក ថមមី។ រូបថត ហ្វេសប៊ុក
ភ្នំពេញ៖ ស្តែងចេញពីអារម្មណ៍រំភើចចិត្តលាយឡំភាពច្របូកច្របល់ដោយគិតរឿងទៅថ្ងៃអនាគតនៃជីវិតគូ ដ្បិតថ្ងៃមង្គលការកាន់តែខិតជិតមកដល់នោះ ស្រាប់តែគូស្នេហ៍អ្នកសិល្បៈទាំង ២ កញ្ញា សួស វីសា និងតារាសម្តែងលោក ប៊ុនថុល ប៊ុនថង ហៅថមមី នាំគ្នាបង្ហើរសារស្រដៀងគ្នាបង្ហើបឲ្យមហាជនបានដឹងនៅតាមបណ្តាញសង្គមអ៊ីនស្តាក្រាមបង្ហាញពីការត្រៀមខ្លួនរួចជាស្រេចផងដែរ សម្រាប់ជីវិតគូក្រោយពីអាពាហ៍ពិពាហ៍។
តារាចម្រៀងស្រីដែលកំពុងតែស្រូបបានប្រជាប្រិយភាពពីមហាជននៅក្នុងវិស័យសិល្បៈចម្រៀង បន្ទាប់ពីបានគ្រងតំណែងជាគ្រូបង្វឹកក្នុងកម្មវិធីលំដាប់ពិភពលោក The Voice Kids Cambodia រដូវកាលទី ២ កញ្ញា សួស វីសា ចេញសារខ្លីរបស់ខ្លួនពីការត្រៀមចិត្តចំពោះពាក្យសម្តីត្រូវគេហៅខ្លួនក្រោយពេលរៀបការរួចយ៉ាងដូច្នេះថា៖ «ខ្ញុំបានត្រៀមខ្លួនរួចរាល់ សម្រាប់ការប្តូរពាក្យ ដែលអ្នកទាំងអស់គ្នា ធ្លាប់ហៅខ្ញុំថា «កញ្ញា» ប្តូរមកជា «អ្នកនាង» វិញក្នុងពេលដ៏ខ្លីខាងមុខនេះតែម្តង»។
ចំណែកឯគូដណ្តឹងរូបស្រស់សង្ហាលោក ប៊ុនថុល ប៊ុនថង ហៅ ថមមី វិញក៏បង្ហើរសាររាងវែងបន្តិចបង្ហាញពីការតាំងចិត្ត និងត្រៀមចិត្តសម្រាប់ដាក់ជាសម្ពាធលើខ្លួនឯងក្នុងនាមមេគ្រួសារក្រោយពីថ្ងៃមង្គលការខ្លួនដែរ ថា៖ «ត្រៀមខ្លួនរួចហើយ សម្រាប់ថ្ងៃខាងមុខនេះ កាលនៅខ្លួនមួយក៏បងប្អូនហៅខ្ញុំ «លោក» ដល់ពេលរៀបការរួចក៏បងប្អូនហៅខ្ញុំថា «លោក»។ អាណិតតែអនាគតប្រពន្ធខ្ញុំ ពេលមិនទាន់រៀបការគេហៅថា «កញ្ញា» ដល់គាត់រៀបការជាមួយខ្ញុំ ចឹងគេឈប់ហៅថា «កញ្ញា» ហើយគឺគេហៅថា «អ្នកនាង»។ អ៊ីចឹងបានថាគាត់លះបង់ច្រើនណាស់សម្រាប់ខ្ញុំ ដូច្នេះខ្ញុំមានតែថែរក្សា មើលថែគាត់ និងព្យាយាមឲ្យគាត់សប្បាយរីករាយ មានសុភមង្គលពេញមួយជីវិត ដោយការតាំងចិត្ត ខិតខំឲ្យគ្រួសាររីកចម្រើន និងមានការទទួលខុសត្រូវជាស្វាមី មេគ្រួសារមួយឲ្យល្អរឹងមាំ និងសម្រេចគោលដៅផ្សេងៗឲ្យគ្រួសារមានក្តីសុខ»។
យ៉ាងណាគេនៅតែពុំទាន់បានដឹងច្បាស់លាស់នៅឡើយដែរពីថ្ងៃកំណត់វេលាចូលរោងការនៅថ្ងៃខែណាឡើយ ខណៈភ្នំពេញប៉ុស្តិ៍មិនទាន់អាចបញ្ជាក់បានការបញ្ជាក់ប្រាប់បន្ថែមពីសំណាក់កញ្ញា សួស វីសា និងលោក ថមមី ឡើយ ដោយសារតែប្រព័ន្ធទូរស័ព្ទអ្នកទាំង ២ សុទ្ធតែមិនអាចទាក់ទងបាន ដោយគ្រាន់តែបានដឹងថា ពួកគាត់បានកំណត់យកវេលាចុងឆ្នាំ ២០១៩ នេះតែប៉ុណ្ណោះ។
សួស វីសា និងលោក ថមមី បានភ្ជាប់ពាក្យកាលពីថ្ងៃទី ៧ ខែ មិថុនា ឆ្នាំ ២០១៩ កន្លងមក បន្ទាប់ពីបានបង្កាត់ភ្លើងស្នេហ៍ក្នុងនាមជាគូសង្សារជាច្រើនឆ្នាំមកនោះ៕
