ភ្នំពេញ៖ ទំនងជាទ្រាំលែងបានទៅនឹងទម្ងន់នៃការរិះគន់ ទើបថ្មីនេះៗ តារាចម្រៀងស្រីមានសមត្ថភាពអាចច្រៀងទាំងបុរាណ និងសម័យ ជ្រកទ្រនំហង្សមាស កញ្ញា សួស វីសា បានបង្ហើរសារចេញពីចិត្តតបទៅអ្នកចូលចិត្តវាយតម្លៃមិនសមរម្យលើអ្នកសិល្បៈចំពោះរឿងសម្ភារនិយមវិញ ខណៈពេលដែលខ្លួននាងបានបង្ហោះរូបទិញរថយន្តថ្មីម៉ាក Lexus 570 KURO 2020 ដែលមានតម្លៃខ្ទង់ ២០ ម៉ឺនដុល្លារនោះ។
ចេញពីគណនីហ្វេសប៊ុកផ្ទាល់ខ្លួន តារាចម្រៀងស្រីកំពុងតែឡើងកូដនៅលើសិល្បៈ និងជិតចូលរោងជ័យមង្គលចុងឆ្នាំនេះជាមួយនឹងគូស្នេហ៍រូបសង្ហា គឺលោក ថមមី នោះ កញ្ញា សួស វីសា បានរំលេចសារបែបផ្លែផ្កាថា៖ «មួយជីវិតនេះ អ្វីដែលត្រូវធ្វើ គឺខ្ញុំបានលះបង់អស់ហើយសម្រាប់គ្រួសារមួយនេះ កាលពីមុនគ្រួសារយើងធ្លាប់ក្រលំបាកឆ្អែតហើយ។ ហើយអារឿងគេមើលងាយ មើលថោក ក៏វាឆ្អែតដែរ តែយើងមិនដែលតបត គេដោយវិធីអាក្រក់ទេ យើងតែងរើសយកវិធីឈ្នះពួកនោះវិញដោយការប្រឹងប្រែងរកស៊ីសាងកេរ្តិ៍ឈ្មោះ សាងកិត្តិយសឲ្យអ្នកទាំងនោះ បានមើលឃើញ និងប្រឹងដោយសមត្ថភាព និងមិនបានបៀតបៀនបំផ្លាញអ្នកណាទាំងអស់»។
កញ្ញា សួស វីសា ដែលបានក្លាយជាគណៈកម្មការក្នុងកម្មវិធីប្រឡងចម្រៀងកុមារលំដាប់ពិភពលោក the Voice Kids Cambodia រដូវកាលទី ២ ក៏បញ្ជាក់បន្តទៀតថា៖ «ផុសនេះ គឺគ្រាន់តែចង់ប្រាប់ទៅអ្នកដែលចូលចិត្តតាំងខ្លួនអស្ចារ្យមួយចំនួនថា សូមកុំមើលងាយមនុស្ស កុំមើលងាយអ្នកក្រ ធ្វើតែល្អៗទៅ ព្រោះរឿងវាសនាមនុស្ស វាមើលមិនឃើញទេ ម្តងគេម្តងយើងទេ Lexus 570 KURO 2020! »។
កាលពីប៉ុន្មានខែមុន មហាជនក៏បានភ្ញាក់ផ្អើលម្តងហើយ នាឱកាសខួបកំណើតគូស្នេហ៍ខ្លួន គឺលោក ថមមី ក្រៅពីមាននំខួបកំណើត រៀបចំនៅផ្ទះវីឡាទំនងជាទ្រនំរួមស្នេហ៍ក្រោយពីពួកគេបានរៀបការរួចនោះ ក៏ស្រាប់តែលេចវត្តមានរថយន្តថ្មីសន្លាងម៉ាក Lexus NX 200t ដែលមានតម្លៃខ្ទង់ ៣-៤ ម៉ឺនដុល្លារ សម្រាប់កាដូខួបកំណើតរបស់ម្ចាស់ចិត្ត ខណៈរថយន្តថ្មីសន្លាងនោះក៏ត្រូវលេចឮថា កញ្ញា សួស វីសា មានចំណែកទិញជូនគូស្នេហ៍នាងផងដែរ៕