.jpg)
ស្វាមីតារាចម្រៀងស្រី សួស វីសា យកចិត្តប្រពន្ធខ្លាំងធ្វើខួបឲ្យមុន ១ សប្ដាហ៍។ រូបថត ហ្វេសប៊ុក
ភ្នំពេញ៖ ក្រោយពីទទួលបានដំណឹងល្អថា មានបុត្រដំបូង ដើម្បីរឹតបន្តឹងចំណងស្នេហ៍កាលពីកុម្ភៈ ឆ្នាំ ២០២០ មកនោះ តារាចម្រៀង សួស វីសា និងស្វាមី កាន់តែបង្ហាញភាពនូវផ្អែមល្ហែមលើសកាលពីនៅជាគូស្នេហ៍នឹងគ្នាទៅទៀត ធ្វើឲ្យមហាជនកត់សម្គាល់ និងភ្ញាក់ផ្អើលខ្លាំងពីទង្វើ របស់គូស្នេហ៍អ្នកសិល្បៈទាំង ២។
ជាក់ស្តែងថ្មីៗនេះលោក ប៊ុនថុល ប៊ុនថង ហៅ ថមមី ដែលជាស្វាមី សួស វីសា បានរៀបចំខួបកំណើតឲ្យប្រពន្ធបង្កើតនូវភាពភ្ញាក់ផ្អើលមុនកំណត់រហូតដល់ទៅ ១ សប្តាហ៍ឯណោះ ដើម្បីជាការលួងលោមចិត្តម្តាយ និងកូនក្នុងផ្ទៃឲ្យសប្បាយរីករាយនារដូវកាលបុណ្យចូលឆ្នាំថ្មីឆ្នាំជូតនេះផងដែរ។
អារម្មណ៍សប្បាយចិត្តលាយឡំនឹងភាពភ្ញាក់ផ្អើលរបស់តារាចម្រៀងស្រីទ្រនំហង្សមាស សួស វីសា បង្ហើបតាមហេ្វសប៊ុកថា៖ «អត់ទាន់ដល់ថ្ងៃទេ តែគ្រួសារខ្ញុំ គឺតែងតែបែបនេះ គឺដឹងតែនំ cake មកហូរហែ រហូតទាល់តែដល់ថ្ងៃពិតប្រាកដ! ជួនកាលលើសថ្ងៃខួប ហើយក៏នៅតែមាន cake មកដែរ។ ថ្ងៃខួបខ្ញុំគឺ 20.04.2020 តែឆ្នាំនេះ ក្រៅពីមនុស្សក្នុងផ្ទះខ្ញុំ គឺសូមមិត្តភក្តិ បងប្អូនមិនបាច់មក Surprise ផ្ទាល់ដូចរាល់ដងទេណា គ្រាន់តែជូនពរតាមរយៈឆាត ឬខលមកជូនពរ ខ្ញុំអរគុណហើយ! ធ្វើនេះ គឺដើម្បីសុវត្ថិភាពរបស់យើងទាំងអស់គ្នា ចៀសវាងពីជំងឺ covid19! លក្ខណៈគ្រួសារសាមញ្ញៗ តែរីករាយចុងក្រោយសូមអរគុណដល់មនុស្សពិសេស គឺប្តីសម្លាញ់ Tommy Real ឆ្នាំនេះមិនដូចឆ្នាំមុនទេ ឆ្នាំនេះអូនប៉ោង!។
ក្រោយពីយកនំខួបកំណើតទៅជូនប្រពន្ធធ្វើឲ្យសប្បាយចិត្តហើយលោក ថមមី ក៏សរសេរថា៖ «រីករាយជាមួយរាត្រីនៃការស៊ើប្រាយមុនថ្ងៃខួបកំណើតម៉ាក់ៗ Mommy សួស វីសា Sous Visa ហេតុតែប្តីចង់ឃើញប្រពន្ធបងសប្បាយចិត្តឲ្យច្រើន កុំឲ្យចាញ់តទៀត បងក៏ខំលួចធ្វើខួបជូនអូន ឲ្យសប្បាយចិត្ត ចង់ប្រាប់អូនថា ប្តីស្រឡាញ់អូន និងកូនខ្លាំងណាស់ បងអាចធ្វើគ្រប់យ៉ាងបានសម្រាប់គ្រួសារយើង ជាពិសេសនោះ បងចង់ឲ្យអូនមានស្នាមញញឹមបែបនេះជារៀងរហូតដូចដែលបងសន្យាកាលពីពេលយើងទាំង ២ ស្រឡាញ់គ្នាដំបូង បងមិនចង់បានពាក្យថា ស្រឡាញ់បានតែដំបូងទេ តែបងនឹងធ្វើវាជារៀងរហូតតទៅ I Love You Mommy #Sousvisa #Tommy #Family»។
លើសពីនេះ អ្នកនាង សួស វីសា ក៏ចេញសារបង្ហើបពីរឿងប្តីប្រពន្ធចេញចម្រៀងច្រៀងជាមួយគ្នា ដើម្បីត្រៀមឱកាសថ្ងៃបុណ្យចូលឆ្នាំថ្មីឆ្នាំជូតនេះដែរដោយបានបង្ហើរថា៖ «អបអរបុណ្យចូលឆ្នាំថ្មី សុំប្តូរ Cover ថ្មី លាភជ័យហេងៗ ជាមួយនឹងបទមានចំណងជើងថា «រាំអែបកៀន»៕
