.jpg)
កញ្ញា សេង រដ្ឋា Miss Grand Cambodia 2020 ជាតំណាងសម្រាប់ការប្រកួតអន្តរជាតិ។ រូប សហការី, កញ្ញា សេង រដ្ឋា មកពីខេត្តកំពង់ធំក្លាយជាកញ្ញា Miss Grand Cambodia 2020។
ភ្នំពេញ៖ សម្រាប់បេក្ខនារីជាម្ចាស់មកុដថ្មីលេខ ១ ពីកម្មវិធី Miss Grand Cambodia 2020 កញ្ញា សេង រដ្ឋា កំពុងតែត្រៀមខ្លួនយ៉ាងស្វិតស្វាញ ក្នុងការធ្វើជាតំណាងឱ្យកម្ពុជា ដើម្បីទៅចូលរួមប្រកួតបន្តក្នុងកម្មវិធីអន្តរជាតិ Miss Grand International 2020 ដែលគម្រោងនឹងត្រូវធ្វើនៅប្រទេសវេណេស៊ុយអេឡា តែដោយសារវិបត្តិកូវីដ ១៩ ការប្រកួតអាចនឹងប្តូរមកធ្វើនៅប្រទេសថៃ ដែលជាម្ចាស់ Franchise វិញ ក្នុងខែកុម្ភៈ ឆ្នាំ ២០២១ ខាងមុខនេះ។
កញ្ញាឯក Miss Grand Cambodia 2020 ឆ្នាំនេះ រកឃើញបេក្ខនារីដ៏ស័ក្តិសមបំផុតជាបេក្ខនារីតំណាងខេត្តកំពង់ធំ មានវ័យ ២០ ឆ្នាំ មានកម្ពស់ ១,៧៣ ម៉ែត្រ មានទម្ងន់ ៥៤ គីឡូ ដោយកញ្ញា សេង រដ្ខា គឺជានិស្សិតស្រីរៀនជំនាញគណនេយ្យ រៀននៅវិទ្យាស្ថានវ៉ាន់ដា ខណៈកញ្ញាមានរូបសម្ផស្សស្រស់ស្អាត និងមានចំណេះដឹងរូបនេះក៏ធ្លាប់ឈ្នះជយលាភីចំណាត់ថ្នាក់លេខ ១ ផងដែរ នៅក្នុងការប្រកួតបវរកញ្ញា Miss Yellow 2018។
បេក្ខនារីរូបស្រស់ កម្ពស់ ១,៧៣ ម៉ែត្រ វ័យ ២០ ឆ្នាំ កញ្ញា សេង រដ្ឋា តំណាងមកពីខេត្តកំពង់ធំ បានគ្រងមកុដ Miss Grand Cambodia Cambodia 2020 នៃការប្រកួតផ្តាច់ព្រ័ត្រ កាលពីរាត្រីថ្ងៃទី ២៦ ខែ កញ្ញា ឆ្នាំ ២០២០ នៅក្នុងចំណោមបេក្ខនារីចំនួន ២៨ រូប។
បើតាមលោក ង៉ែត សីហា ដែលជាអ្នករៀបចំគម្រោងនៃកម្មវិធីប្រកួត Miss Grand Cambodia ឆ្នាំ ២០២០ ក៏បានបង្ហើបឱ្យដឹងពីការត្រៀមខ្លួនទាំងក្រុមការងារ ព្រមទាំងម្ចាស់មកុដកញ្ញា សេង រដ្ឋា ផងដែរថា៖ «ទោះជាយ៉ាងណាខាងយើងជាអ្នករៀបចំរបស់កម្ពុជា នៅតែត្រៀមខ្លួន ដោយគោរពទៅតាមគោលការណ៍សុវត្ថិភាពជានិច្ច សម្រាប់បង្ហាញខ្លួនលើឆាកអន្តរជាតិនៅក្នុងពេលឆាប់ៗនេះ ទោះបីឮដំណឹងថា ការប្រកួតប្រជែង Miss Grand International 2020 នឹងត្រូវប្តូរមកធ្វើក្នុងប្រទេសថៃ ដែលជាម្ចាស់ Franchise វិញ នៅខែកុម្ភៈ ឆ្នាំ ២០២១ ខាងមុខក្តី។ ចំពោះកញ្ញា សេង រដ្ឋា ដែលជាម្ចាស់មកុដនោះ កញ្ញាក៏បានត្រៀមលក្ខណៈគ្រប់យ៉ាងដែរ សម្រាប់ការបង្ហាញខ្លួនអន្តរជាតិនេះ ខណៈផ្នែកភាសាបរទេសវិញ ខ្ញុំគិតថា មិនមែនជាឧបសគ្គរបស់ កញ្ញា រដ្ឋា នោះឡើយ»។
គួរបញ្ជាក់ផងដែរថា ការប្រកួតវគ្គផ្តាច់ព្រ័ត្រ Miss Grand Cambodia ឆ្នាំ ២០២០ បានរកឃើញបេក្ខនារីស័ក្តិសមជាម្ចាស់ជយលាភីចំនួន ៥ រូប (Top 5) លេខ ១ កញ្ញា សេង រដ្ឋា វ័យ ២០ ឆ្នាំ លេខ ២ កញ្ញា លឹម សុធាវី ខេត្តព្រះសីហនុ វ័យ ២៥ ឆ្នាំ កម្ពស់ ១,៦៨ ម៉ែត្រ លេខ ៣ កញ្ញា លីវ ជីលី ខេត្តបន្ទាយមានជ័យ វ័យ ២៤ ឆ្នាំ កម្ពស់ ១,៧០ ម៉ែត្រ លេខ ៤ កញ្ញា វុធ ធីដាវិន ខេត្តបាត់ដំបង វ័យ ២៤ ឆ្នាំ កម្ពស់ ១,៧៥ ម៉ែត្រ និងលេខ ៥ កញ្ញា សារុំ ចន្ថា តំណាងខ្មែរនៅបារាំង៕
