.jpg)
យុវតីម្នាក់កំពុងតែសាកល្បងទាញយកកម្មវិធីបណ្ដាញសង្គម សេរី មកប្រើប្រាស់។ ស្រេង ម៉េងស្រ៊ុន
ភ្នំពេញៈ ខណៈបណ្តាញសង្គមហ្វេសប៊ុកជាមធ្យោបាយទំនាក់ទំនងដ៏ពេញនិយមនៅកម្ពុជាជាមួយចំនួនអ្នកប្រើប្រាស់ជាង ៦,៨ លាននាក់ថ្មីៗនេះយុវជនកម្ពុជាមួយក្រុមក៏បានបង្កើតនូវកម្មវិធីទំនាក់ទំនងសង្គមមួយ ឈ្មោះថា សេរី (Serey) ដែលមានលក្ខណៈខុសប្លែកពីបណ្តាញទំនាក់ទំនងសង្គមដទៃ។
សេរីជាបណ្តាញទំនាក់ទំនងសង្គមមួយដែលមានការប្រើប្រាស់ស្រដៀងនឹងហ្វេសប៊ុកដែរ ប៉ុន្តែចំណុចពិសេសគឺសេរី ប្រើប្រាស់ប្រព័ន្ធ Decentralization (blockchain)។
បង្កើតឡើងនៅដើមខែមីនា ឆ្នាំ ២០១៨ ដោយមានស្ថាបនិកចំនួន ៦ នាក់ដោយមានស៊ឺវឺ (server) ចំនួន ២០ កន្លែងនៅក្នុងកម្ពុជា និងហូឡង់ពេលនេះ សេរី មានអ្នកចុះឈ្មោះប្រើប្រាស់ជាង ១០០០ នាក់។
បច្ចេកវិទ្យាថ្មីជាប្រព័ន្ធគ្រប់គ្រងទិន្នន័យមានសុវត្ថិភាពខ្ពស់បំផុតក្នុងការការពារពីការចូលលួចទិន្នន័យរបស់អ្នកប្រើប្រាស់ពីសំណាក់ចោរព័ត៌មានវិទ្យា (Hacker)។
លោក លឹម ឆៃឡែម ស្ថាបនិកបណ្ដាញសង្គម សេរី។ហេង ជីវ័ន
ចំណុចពិសេសមួយទៀត សេរី គឺខុសប្លែកពីបណ្តាញទំនាក់ទំនងសង្គមដទៃដែលអ្នកប្រើប្រាស់បង្ហោះ រូបភាព ឬវីដេអូទៅគឺមិនទទួលបានអ្វីមកវិញឡើយ។ ប៉ុន្តែចំពោះ សេរី គ្រប់រូបភាព និងវីដេអូដែលបានបង្ហោះលើបណ្តាញនេះអ្នកប្រើប្រាស់អាចទទួលបានប្រាក់ត្រឡប់មកវិញ។
ស្ថាបនិក លោក លឹម ឆៃឡែម បញ្ជាក់ប្រាប់ ភ្នំពេញ ប៉ុស្តិ៍ ថា៖ «ពេលណាយើងផូស្តអីមួយ កាលណាគេ Like គេ vote យើងបានលុយ blockchain នឹងគិតប្រាក់ឲ្យយើងស្រាប់តែម្តង ហើយកាលណាគេ vote ច្រើនយើងទទួលបានលុយច្រើន ហើយមួយទៀតបើអ្នក vote ហ្នឹងមានប្រាក់សេរីច្រើន យើងក៏ទទួលបានប្រាក់ច្រើនតាមហ្នឹងដែរ ហ្នឹងគេមាន ២ របៀប»។
អតីតនិស្សិតពាណិជ្ជកម្មមកពីប្រទេសហូឡង់រូបនេះបានឲ្យដឹងទៀតថា៖ «គោលដៅរបស់ សេរី គឺយើងចង់ចែករំលែកចំណេះដឹង និងអប់រំប្រជាពលរដ្ឋនៅស្រុកខ្មែរ។ យើងជឿថាមនុស្សមួយៗដឹងពីអ្វីតិចៗ ជួនកាលស្គាល់ក៏ច្រើនដែរ ប៉ុន្តែពេលយើងចែករំលែកចំណេះដឹងតិចៗហ្នឹងជាមួយគ្នាគឺយើងកើនចំណេះដឹង យើង Educate (បង្រៀន) ខ្លួនឯងបានល្អ»។
ប្រាក់ដែលទទួលបានពីបណ្តាញទំនាក់ទំនងសង្គមនេះមានឈ្មោះថា SRY (ប្រាក់សេរី ឬ Serey Coin) ដែលអ្នកប្រើប្រាស់អាចយកប្រាក់សេរីទៅប្តូរតាមរយៈកម្មវិធី Serey Exchange ប្តូរទៅជា bitcoin បានដោយ bitcoin គឺជាប្រាក់កាក់ដែលកំពុងចរាចរណ៍នៅជុំវិញពិភពលោក។
ក្រោយពីដំណើរការបាន ៩ ខែ លោក លឹម ឆៃឡែម បញ្ជាក់ថា៖ «អ្នកលេងសេរីមុនដំបូងគេសប្បាយចិត្តមកពីកាលណាគេបង្ហោះព័ត៌មានទិន្នន័យ ឬអត្ថបទអ្វីមួយគេបានលុយហើយអ៊ីចឹងគេសប្បាយចិត្តមកពីគេមានអារម្មណ៍ថា អ្វីដែលគេធ្វើគឺកំពុងមានតម្លៃ។ ម្យ៉ាងគេអ្នកចូលចិត្តលេងសេរីហ្នឹងមកពីគេដឹងថា អ្នកបង្កើតសេរីហ្នឹងជាកូនខ្មែរជនជាតិខ្មែរ»។
នាថ្ងៃអនាគតលោកក៏រំពឹងដែរថា សេរី មិនត្រឹមតែផ្តោតទៅលើប្រទេសកម្ពុជាប៉ុណ្ណោះទេគឺពិភពលោកតែម្តងដើម្បីចែករំលែកចំណេះដឹងក្នុងឧស្សាហកម្មប្រព័ន្ធផ្សព្វផ្សាយនៅក្នុងពិភពលោក៕
