The Phnom Penh Post Search

Search form




Logo of Phnom Penh Post newspaper Phnom Penh Post - សេវានាំ​បរទេស​ដើរ​ភ្លក្ស​ចំណី​តាមផ្លូវ​នៅ​សៀមរាប​




សេវានាំ​បរទេស​ដើរ​ភ្លក្ស​ចំណី​តាមផ្លូវ​នៅ​សៀមរាប​

Content image - Phnom Penh Post
ភ្ញៀវ​ទេសចរ​បរទេស​អង្គុយ​ទទួលទាន​អាហារ​តាមផ្លូវ​បែបខ្មែរ​ នៅ​ខេត្ដ​សៀមរាប​។ រូប សហការី

សេវានាំ​បរទេស​ដើរ​ភ្លក្ស​ចំណី​តាមផ្លូវ​នៅ​សៀមរាប​

សៀមរាប: ​ក្រៅពី​ទស្សនា​ប្រាសាទ ​ភ្ញៀវ​ជាតិ​ និង​អន្តរជាតិ​មិនសូវ​បាន​សាកល្បង​ការ​កម្សាន្ត​ប្លែកៗ​ដូចជា ​ការរៀន​ចម្អិន​ម្ហូបខ្មែរ បរទេស​ជាមួយ​ចុងភៅ​ចំណាន ជិះខ្សែ​រ៉តមើល​ទេសភាព​ ជិះកង់ ជិះ​ម៉ូតូ​ធំកង់​បួន ​ទៅ​ទស្សនា​តាមភូមិ ជិះរទេះ​គោ និង​សកម្មភាព​ជាច្រើន​ទៀត។

អ្វីដែល​ថ្មីមួយ​ទៀត​នោះ​គឺការ​ដើរ​ញ៉ាំម្ហូប​តាមផ្លូវ​ជាមួយ​អ្នក​ជំនាញ​ហូបចុក​ប្រចាំ​ខេត្ត​តែម្តង ដែល​មាន​ឈ្មោះថា Angkor Street Eats ជា​កម្មវិធី​ដើរ​កម្សាន្ត​ជាលក្ខណៈ​ញ៉ាំតាម​ផ្លូវ ដោយ​មាន​ម្ហូបជាង ៣៥ មុខ​ខុសៗគ្នា​នៅក្នុង​ខេត្ត​សៀមរាប។

ស្ថាបនិក​ពីរនាក់​គឺ​អ្នកនាង Tram Macdouall និង​លោក សេង ផល្គុន ​ចាប់ដៃ​គ្នា​បង្កើត​ជាកម្មវិធី​ដើរ​កម្សាន្ត​ និង​ញ៉ាំ​ម្ហូបតាម​ចិញ្ចើមផ្លូវ​ ដែល​មាន​ការពេញ​និយម​ពី​ប្រជាជន​ខ្មែរ ដើម្បី​បង្ហាញ​ដល់​ភ្ញៀវ​ទេសចរ​ទាំងអស់​ ​​នៅ​ទឹកដី​អង្គរនេះ​បានស្គាល់​រសជាតិ​ម្ហូបម្ហា និងចំណី​ចំណុក​ប្រចាំថ្ងៃ​របស់​អ្នកស្រុក​សៀមរាប។

លោក​ ផល្គុន​ និយាយ​ទាំងទឹក​មុខរួស​រាយ​នៅលើ​ម៉ូតូថា ៖ «បានជា​ខ្ញុំបង្កើត​កម្មវិធី​នេះឡើង​គឺ​ដោយសារ​តែខ្ញុំ​ចូលចិត្ត​ដើរ​ញ៉ាំ​ម្ហូប​នៅតាម​ផ្លូវ​ជាច្រើន​កន្លែង​ប្លែកៗ​ពីគ្នា ហើយ​កន្លែង​ទាំង​នោះ​សុទ្ធតែ​កន្លែង​ដែល​លក់​នូវម្ហូប​តាមផ្លូវ​ល្បីៗ និង​មាន​រសជាតិ​ឆ្ងាញ់​ មានការ​ពេញ​និយម​ចូលចិត្ត​ញ៉ាំ​ពីអ្នក​ស្រុក​សៀមរាប​តែម្តង។ អ៊ីចឹង​ហើយខ្ញុំ​មានគំនិត​បង្កើត​កម្មវិធី​ញ៉ាំ​តាមផ្លូវ​នេះជូន​ដល់​ភ្ញៀវ​បរទេសឲ្យ​គាត់បាន​ភ្លក្ស​​នូវរស​ជាតិ​ម្ហូប​របស់ខ្មែរ​ដែល​ពួកគាត់​ពិបាករក​ញ៉ាំ​ដោយ​ខ្លួនឯង»។

Content image - Phnom Penh Post
កន្លែង​សំចត​ចុះញ៉ាំ​អាហារឲ្យ​ភ្ញៀវ​បរទេស​ភ្លក្ស​​សាច់​គោអាំង​​ល្បី​ជិត​វត្ដ​ដំណាក់​​។ ឈឹម ស្រីនាង

លោក​ ផល្គុន ដែល​ចូលចិត្ត​និយាយ​លេងសើច​កំប្លែង​ជាមួយ​ភ្ញៀវ ពន្យល់ពី​ប្រវត្តិ​ម្ហូបនៅ​តាម​តំបន់ នាំ​ភ្ញៀវ​ចូលទៅ​ដល់ទី​កន្លែង​អ្នកភូមិ​ចូលចិត្ត​ញ៉ាំ​អាហារ​ជុំគ្នាជា​លក្ខណៈ​គ្រួសារ​បែប​ខ្មែរ​ ដើម្បីឲ្យ​ពួកគាត់​ទទួល​នូវ​បទពិសោធ​ថ្មី។

លោក​បាន​បន្តទៀត​ថា៖ «ការដើរ​ញ៉ាំ​តាមផ្លូវ​នេះ​គឺមាន​ពីរពេល​នៅពេល​ព្រឹក និង​ពេល​ល្ងាច ដោយ​ខាង​ក្រុម​ការងារ​យក​ម៉ូតូ​កង់បី​ទៅ​ទទួល​ភ្ញៀវ​ពី​សណ្ឋាគារ រួច​ចាប់ផ្តើម​ធ្វើ​ដំណើរ​​ចេញ​ទៅ​ញ៉ាំ​អាហារ តែ​ម្តង ដោយ​មាន​អ្នកជំនាញ​ខ្មែរ​ម្នាក់​នៅចាំ​ពន្យល់​និង​ប្រាប់ពី​ម្ហូប​នីមួយៗ។

ពេល​ទៅ​ដល់​កន្លែង​ញ៉ាំគឺ​ខាងក្រុម​ការងារ​ម្នាក់​គាត់​រៀបចំ​ជាស្រេច​ដើម្បី​ទទួល​ភ្ញៀវ ដោយឲ្យ​ភ្លក្សតែ​បន្តិចៗ​ប៉ុណ្ណោះ ពី​ព្រោះ​ខ្លាច​ភ្ញៀវញុំា​ឆ្អែត​ពេក​មិនអាច​បន្ត​ដំណើរ​ទៅមុខ​ភ្លក្ស​ម្ហូប​ជាច្រើន​ទៀត​នៅ​កន្លែង​ខុសៗគ្នា។ ភ្ញៀវ​បរទេស​ទាំងអស់​គឺចុះ​ញ៉ាំ​អាហារ​ជាមួយ​ប្រជាជន​ដែរគាត់​កំពុងតែ​ញ៉ាំ​តែម្តង ដើម្បី​ឲ្យគាត់​បាន​យល់ដឹង​ពីទម្លាប់​របស់​ខ្មែរ​នៃការហូ​បចុក។

Content image - Phnom Penh Post
លោក ផល្គុន ស្ថាបនិក​ Angkor Street Eats។ ឈឹម ស្រីនាង

លោកបាន​បន្តថា៖ «​យើង​បាន​នាំពួក​គាត់​ចូល​ផ្សារ​ញ៉ាំ​លតឆា បាយ​សាច់ជ្រូក អាកោ​ត្នោត នំបញ្ចុក ជាដើម។ បន្ទាប់​មក​យើង​ក៏នាំ​គាត់ទៅ​ញ៉ាំ​សាច់គោ​អាំង​ល្បី​ប្រចាំ​ខេត្ត​សៀមរាប​ជិតវត្ត​ដំណាក់ ពង​ទាកូន​ឆ្ងាញ់ នំ​បញ្ចុក​សម្លការី​ ដែល​លក់​តាំងពី​ឆ្នាំ ១៩៨០ នំបុ័ងប៉ាតេ ទឹក​ក្រឡុក​បែប​ខ្មែរ ទៅភ្លក្ស​ម្ហូបនៅ​ផ្លូវ ៦០ ដែលមាន​ដូចជា​នំគ្រក់ មី​ស៊ុប ណែម ទឹក​ក្រូចថ្លុង ហើយ​បន្តទៅ​ញ៉ាំ​ម្ហូបខ្មែរ​នៅ​ភោជនីយដ្ឋាន​ចុង​ក្រោយ​គេគឺ​ Siem Reap Brew Pub ឲ្យគាត់​ភ្លក្ស​ស្រាបៀរ​ខ្មែរ​ ដែល​បង្កើត​ដោយ​ខ្លួនឯង ជាមួយ​នឹង​អាពីង តាឡនតន ចង្រិត កន្ទុំរុយលីង ដុកឌឿ ជាដើម។ និយាយ​រួមទៅ​គឺ​យើង​នាំទៅ​កន្លែង​ខុសៗគ្នា​ដើម្បី​ឲ្យភ្លក្ស​នូវមុខ​ម្ហូប​ប្លែកៗ​ពីគ្នា ៣៥ មុខ​ជាមួយ​អ្នកភូមិ​សៀមរាប​តែម្តង»។

កញ្ចប់នៃ​ការដើរ​ញ៉ាំ​នេះ​មាន​តម្លៃពី ៧០ ដុល្លារ​ដល់ ១២០ ដុល្លារ​ក្នុងម្នាក់ ដោយ​បូក​បញ្ចូល​ទាំងការ​ទៅ​ទទួលពី​សណ្ឋាគារ មគ្គុទេ្ទស​ក៍ម្នាក់ ​ការ​ហូបចុក និង​ភេសជ្ជៈ។ តម្លៃ ១២០ ដុល្លារ​មានថែម​កាដូ​អនុ​ស្សាវរីយ៍ អាវយឺត ក្រមា​ និង​អាហារ​ពិសេស​ពេល​ថ្ងៃត្រង់​ ឬល្ងាច​ស្នាដៃ​ចុងភៅ​លំដាប់​ផ្កាយ​ប្រាំ។

លោក​ណែនាំ​ថា៖ «សម្រាប់​ខ្ញុំគឺ​ផ្តល់​យោបល់​ឲ្យ​គាត់​យក​កញ្ចប់​តម្លៃ ៧០ ដុល្លារ​ទៅ ៨៥ ដុល្លារ​ពីព្រោះ​ថា​ ពួកគាត់​នឹង​ឆ្អែត​បន្ទាប់ពី​ដើរ​ភ្លក្ស​អាហារ​នៅតាម​ផ្លូវ​ហើយ​គ្មាន​ពោះ​ទទួល​ទាន​អាហារ​ចុងភៅ​លំដាប់​ផ្កាយ​ប្រាំ​នោះទេ»។

Angkor Street eats ស្ថិតនៅ​ផ្ទះលេខ ១៩១ សង្កាត់​ស្វាយ​ដង្គុំ ទូរស័ព្ទ​លេខ ០៨៧ ៦៨៦ ៨៧២៕

អត្ថបទគួរចាប់អារម្មណ៍