The Phnom Penh Post Search

Search form




Logo of Phnom Penh Post newspaper Phnom Penh Post - សែ​ជំនាន់​ទី ៦ ចច វ៉ា​ស៊ីន​តោន​ គ្រោង​បង្កើត​មូលនិ​ធិ​ជួយ​ខ្មែរ




សែ​ជំនាន់​ទី ៦ ចច វ៉ា​ស៊ីន​តោន​ គ្រោង​បង្កើត​មូលនិ​ធិ​ជួយ​ខ្មែរ

Content image - Phnom Penh Post
ក្រុម​អង្គ​ការ​ពអក និង​និស្សិត សាស្រ្តា​ចារ្យ បុគ្គលិក​នៃ​សាកល​វិទ្យាល័យ GMU អាមេរិក។ អង្គការពអក

សែ​ជំនាន់​ទី ៦ ចច វ៉ា​ស៊ីន​តោន​ គ្រោង​បង្កើត​មូលនិ​ធិ​ជួយ​ខ្មែរ

ភ្នំពេញៈ បន្ទាប់​ពីបាន​ធ្វើបទ​បង្ហាញ​បាឋ​កថា​មួយ​ស្តីពី «ព្រះ​ពុទ្ធ​សាសនាផ្សារ​ភ្ជាប់​នឹងសង្គម» ក្នុង​ប្រទេស​កម្ពុជា ដល់​និស្សិត​ សាស្រ្តា​ចារ្យ​ និង​ថ្នាក់​ដឹកនាំ​នៅ​សាកល​វិទ្យាល័យ George Mason University​ (GMU) នៅឯ​ទីក្រុង ហ្វែរ​ហ្វាក់ នៃ​រដ្ឋវើជី​នៀ សហរដ្ឋ​អាមេរិក​ កាលពី​ថ្ងៃទី ២ ខែឧសភា​ឆ្នាំ ២០១៦ កន្លងមក​ នោះ ព្រះ​ភិក្ខុ​ធម្ម​សេនា​ ហាក់​ សៀងហៃ ជាប្រធាន​អង្គការព្រះ​ពុទ្ធសា​សនា​ដើម្បី​ការ​អប់រំ​នៃកម្ពុជា (ពអក) ក៏បាន​ជួបនឹង​លោក​ ចន្នី ប៊ី អាស្តុន (Johnny Bee Ashton​) និង​លោក​ស្រី ម៉ារីប៊ែល អាស្តុន (Marybelle Ashton) មានវ័យ ៩៨ ឆ្នាំ ជា​ជំនាន់ទី ៦ នៃ​ត្រកូល​ប្រធានា​ធិបតី​អាមេរិក​ទី ១ គឺ​លោក ចច វ៉ាស៊ីន​តោន។

អតីត​ជាស្រ្តី​ជំនួយ​ការ​កងទ័ព​អាមេរិកនៃ​សម័យ​សង្គ្រាម​លោកលើកទី ២ និង​ជាសាច់​ឈាម​ជំនាន់ទី ៦ នៃវង្ស​ត្រកូល​ប្រធានាធិបតី​អាមេរិក​ទី ១ នោះ ក៏បង្ហើប​ពី​ចំណាប់​អារម្មណ៍​ខ្លាំង​ទៅលើ​បាឋកថា​របស់​អង្គការ​ពអក។

Content image - Phnom Penh Post
លោកស្រី ម៉ារីប៊ែល អាស្តុន កូនប្រុស និង​ព្រះភិក្ខុ ហាក់ សៀងហៃ។

ព្រះភិក្ខុ​ ហាក់ សៀង​ហៃ​ ក៏ ប្រាប់ពី​ចំណាប់​អារម្មណ៍​របស់​លោកស្រី ម៉ារីប៊ែល អាស្តុន និង​លោក ចន្នី ប៊ី អាស្តុន ដែល​ជា​ម្តាយ​ និងកូន​ ដែលមាន​គម្រោង​នៃការ​បង្កើត​មូលនិធិ​ជួយអង្គ​ការ​ខ្លួនថា៖ «ពួក​គាត់កោត​សរសើរ​នឹង​សកម្មភាពជួយ​សង្គម​របស់​អង្គការ​យើង ព្រមទាំង​មាន​គម្រោង​ចង់​បង្កើត​មូលនិធិ (ពអក) ប្រចាំ​សហរដ្ឋ​អាមេរិក​ សម្រាប់​ជួយស្រុក​ខ្មែរនៅ​ថ្ងៃខាង​មុខ»។​

លោក​ស្រី​ ម៉ារីប៊ែល អាស្តុន បង្ហាញ​ចំណាប់​អារម្មណ៍​ខ្លួនថា៖ «សម្រាប់​យើង​ទាំង​អស់គ្នា ការរៀន​សូត្រ​មិនអាច​កំណត់​បាននៅ​ត្រឹមអាយុ​កាល​នោះ​ឡើយគឺ​យើង​រៀន​រហូត​ទោះបីជា​ក្នុងវ័យ​ក៏​ដោយ។​ ខ្ញុំពិត​ភ្ញាក់ផ្អើល​ខ្លាំងណាស់​ ពេលបាន​ចូល​ស្តាប់​នូវ​បាឋកថា​របស់​ព្រះ​តេជ​គុណ​ ប្រធាន​អង្គការ​ ដែល​ជា​មិត្តភក្តិ​កូន​ប្រុស​នាងខ្ញុំ​នៅសាកល​វិទ្យាល័យ GMU មក។ យល់ឃើញ​ថា អង្គការ​នេះ​មិនត្រឹមតែ​មាន​នូវសកម្មភាព​ជួយផ្នែក​អប់រំ​ប៉ុណ្ណោះ​ទេ ថែមទាំង​ឃើញមាន​ការ​ជួយ​សាងផ្ទះ​សំបែង​ជូនដល់​ពប្រជលរដ្ឋ​ក្រីក្រ​ជាច្រើន​គ្រួសារ​ និងជួយ​សម្រួល​ទុក្ខធុរៈ​ដល់ចាស់​ជរា​ទៀត​ផងដែរ»។

ស្រ្តី​វ័យ ៩៨ ឆ្នាំនេះ​ ខណៈបាន​ជួប​នឹងក្រុម​អង្គការ​ពអក​របស់​ភិក្ខុ​ ហាក់ សៀងហៃ និងបាន​ទៅទស្សនា​វត្ត​ខ្មែរមួយ​នៅ​សហរដ្ឋ​អាមេរិក​រយៈពេល​មួយថ្ងៃ​មកនោះ​បន្ត​ថា៖ «​មុនព្រះ​តេជ​គុណ​និមន្ត​ទៅ​វិញ ចង់ចំណាយ​ពេល​វេលា​នៅជាមួយ​ឲ្យបាន​យូរ​បន្តិច។ សប្បាយ​ចិត្ត​បាន​ជួប​ព្រះសង្ឃខ្មែរ ព្រោះ​ធ្លាប់តែ​ទៅវត្ត​ថៃ​ក្បែរផ្ទះ លើក​ក្រោយ​នឹង​ទៅវត្តខ្មែរ​ម្តង​ដែល​ទើបស្គាល់ ​ទោះ​ជាឆ្ងាយ​ពីផ្ទះ​ជិះជិត ២ ម៉ោង​ក៏ដោយ»។

រំឮក​ថា ពអក​គឺ​ជាអង្គការ​មិនរក​ប្រាក់កម្រៃ អព្យា​ក្រិត និង​មនុស្ស​ធម៌​ មានទី​តាំង​នៅភូមិ​កម្មករ សង្កាត់​ស្វាយប៉ោ​ ក្រុង និង​ខេត្ត​បាត់ដំបង៕​

អត្ថបទគួរចាប់អារម្មណ៍