ភ្នំពេញ: អាណាព្យាបាល និងកុមារតូចៗដែលស្រឡាញ់ផ្នែកតូរ្យតន្ដ្រីលំនាំតាមតន្ដ្រីករល្បីៗជុំវិញពិភពលោក អាចចាប់ផ្ដើមក្ដីស្រមៃមួយនេះនៅសោនស្គូល (SoundsKool)។
ក្រោយពីសម្ពោធយីហោជាលើកដំបូងនៅកណ្ដាលក្រុងភ្នំពេញអស់រយៈពេល ៤ ឆ្នាំ សោនស្គូលសាលាតូរ្យតន្ដ្រី និងលក់ឧបករណ៍តន្ដ្រី បានពង្រីកខ្លួនទៅកាន់មួយកន្លែងទៀតក្បែរផ្សារទួលទំពូង ដើម្បីបំពេញបំណងអ្នកចង់ស្វែងសិក្សាជំនាញតន្ដ្រី និងទិញឧបករណ៍នៅជិតបង្កើយ។
ថ្លែងនៅថ្ងៃបើកសម្ពោធសាខាសាលាតូរ្យតន្ដ្រី និងហាងលក់ឧបករណ៍តន្ដ្រីថ្មី លោក ហ្កាប៊ី ហ្វាចា នាយកគ្រប់គ្រងក្រុមហ៊ុន សោនស្គូល បានឲ្យដឹងថា៖ «យើងពិតជារំភើបណាស់ដែលបាននាំយកសោនស្គូលទៅទួលទំពូង»។
លោកបង្ហាញពីប្រយោជន៍នៃតន្ដ្រីថា៖ «បេសកកម្មរបស់យើងគឺ ដើម្បីបម្រើអារម្មណ៍និងធ្វើឲ្យមានការរួបរួមគ្នាតាមរយៈតន្ត្រី។ជាមួយនឹងសាលារៀននានានៅក្នុងតំបន់ និងគ្រួសារវ័យក្មេងជាច្រើនដែលកំពុងរស់នៅក្នុងសង្កាត់នេះយើងគិតថាវានឹងក្លាយជាកន្លែងដ៏ល្អឥតខ្ចោះ ក្នុងការតភ្ជាប់ទំនាក់ទំនងជាមួយសហគមន៍»។
ផ្ដើមពីការទទួលចុះឈ្មោះចូលរៀនរបស់កុមារតូចៗ សោនស្គូល ផ្ដល់នូវវគ្គសិក្សាគ្រប់កម្រិតចាប់ពីថ្នាក់ដំបូងរហូតដល់ថ្នាក់ជំនាញ។
កញ្ញា គី ម៉េងហៀង បុគ្គលិក ផ្នែកទំនាក់ទំនងបាននិយាយថា៖ «យើងផ្ដើមទទួលសិស្សពីអាយុ ៣ ឆ្នាំកន្លះឡើង ដែលមានបំណងចង់ក្លាយជាតន្ដ្រីករអាជីព និងផ្សារភ្ជាប់ទំនាក់ទំនងជាមួយសហគមន៍»។
Group Play វគ្គសិក្សាឧបករណ៍តន្ដ្រីព្យ៉ាណូ និងហ្គីតាដែលទទួលសមាជិកពី ២ ទៅ ៤ នាក់ តម្លៃ ៣០០ ដុល្លារក្នុងមួយវគ្គ សិស្សនឹងទទួលការសិក្សា ១២ មេរៀនរយៈពេល ១២ សប្ដាហ៍។
ស្ថិតនៅវិថី ១៣៥ កែងផ្លូវ ៤៥៦ សង្កាត់ទួលទំពូង សោនស្គូល មានលក់ឧបករណ៍តន្ដ្រី ម៉ាកល្បីៗដូចជា Fender, Roland, Aria និង Conn-Selmer ជាដើម។
នៅក្នុងឱកាសបើកសម្ពោធជាមួយស្នាមញញឹមដ៏រីករាយពីសំណាក់អាណាព្យាបាល និង កុមារតូចៗ ព្រមទាំង លោកគ្រូ អ្នកគ្រូផ្នែកតូរ្យតន្ដ្រី និងតារាចម្រៀងកិត្ដិយស កញ្ញា រ៉ុន ស៊ីរ៉ា អ្នកសម្របសម្រួលកម្មវិធី សោនស្គូល កញ្ញា អេវី អេវែនស៍ បានលើកឡើងថា៖ «ខ្ញុំស្រឡាញ់ការពិតដែលថា ការអប់រំមុខវិជ្ជាតូរ្យតន្ត្រីកំពុងតែកើនឡើង និងចាប់អារម្មណ៍ខ្លាំងនៅប្រទេសកម្ពុជាហើយតាមរយៈ សោនស្គូលខ្ញុំនឹងអាចរួមចំណែកជួយដល់សិល្បករជំនាន់ក្រោយ»៕