The Phnom Penh Post Search

Search form




Logo of Phnom Penh Post newspaper Phnom Penh Post - សោភា និង​ដេវីត​ មិន​បាន​ទទួល​រង្វាន់​ ៤ ម៉ឺន​ដុល្លារ​ពី​លោក ហ៊ុន សែន ទេ​




សោភា និង​ដេវីត​ មិន​បាន​ទទួល​រង្វាន់​ ៤ ម៉ឺន​ដុល្លារ​ពី​លោក ហ៊ុន សែន ទេ​

Content image - Phnom Penh Post
ហ្វេសប៊ុក «សិល្បករ​កម្ពុជា​» បង្ហោះ​រឿង​ប្រាក់​រង្វាន់ $ ៤ ម៉ឺន។ FB

សោភា និង​ដេវីត​ មិន​បាន​ទទួល​រង្វាន់​ ៤ ម៉ឺន​ដុល្លារ​ពី​លោក ហ៊ុន សែន ទេ​

ភ្នំពេញៈ ក្រោយ​ពីបទ​ចម្រៀង​ថ្មី Original នៃផលិត​កម្ម​ហង្សមាស​ ដែល​មាន​ចំណង​ជើងថា «រាំញី​កែង​ជើង» របស់​ដៃគូ​ចម្រៀង​ដ៏​ស័ក្តិសម​ពីរដួង​គឺអ្នក​នាង ពេជ្រ សោភា និង​លោក​ ងួន ចាន់ដេវីត បាន​ធ្វើឲ្យ​កក្រើក និង​ជក់ចិត្ត​ស្លុង​អារម្មណ៍​ដល់​មហាជន​ខ្មែរគ្រប់​ស្រទាប់ និងវ័យ​ ជា​ពិសេសនោះ​សូម្បីតែ​ថ្នាក់​ដឹកកំពូល​ប្រទេស​កម្ពុជា​លោក ហ៊ុន សែន​ ក៏បាន​ចាប់​អារម្មណ៍​ដែរ​ដោយ​លោក​បានរាំ​បទនេះ នា​ឱកាស​ពិធី​បុណ្យអង្គរ​សង្ក្រាន្ត​នៅ​ខេត្តសៀមរាប​នាថ្ងៃ​ប្រារព្ធ​អបអរ​សាទរ​ពិធី​បុណ្យ​ចូល​ឆ្នាំថ្មី​ប្រពៃណី​ខ្មែរ​ឆ្នាំ ២០១៦ កន្លង​មក។

ថ្មីៗ​នេះ ស្រាប់​តែលេច​នូវ​ដំណឹង​បែប​ចចាម​អារ៉ាម​ពីសង្គម​អ្នកសិល្បៈ​តៗគ្នា​ ក៏ផ្ទុះ​ឡើងបង្ក​ជាខ្យល់​រលកបោក​បក់​ពេញ​ក្នុងបណ្តាញ​ទំនាក់​ទំនង​សង្គម​ថា តារា​ចម្រៀង​ពីររូប​គឺអ្នកនាង ពេជ្រ សោភា និង​លោក ងួន ចាន់ដេវីត បាន​ទទួល​ប្រាក់​រង្វាន់​លើកទឹក​ចិត្តពី​លោក​នាយក​រដ្ឋ​មន្រ្តី​ ហ៊ុន សែន ចំនួន ៤ ម៉ឺន​ដុល្លារ ជាការ​លើក​ទឹកចិត្ត​ដល់​តារា​ទាំងពីរ​រូបនេះ​ក្នុង​ការដែល​ខិតខំ​ប្រឹង​តែងនិពន្ធ​ និង​ច្រៀង​បទថ្មី​មិន​ចម្លង​ពី​បរទេស។

ដើម្បី​បញ្ជាក់ឲ្យ​កាន់តែ​ច្បាស់ថា តើតារា​ទាំងពីរ​ខាងលើ​នោះ​គឺពិតជា​បាន​ទទួល​ប្រាក់​រង្វាន់ចំនួ​ន ៤ ម៉ឺនដុល្លារ​ ពិត ឬ​មិនពិត​ និង​បាន​ទៅ​ដល់​ដៃ​របស់​ពួកគេហើយ​មែន ឬក៏​មិនមែន​នោះ ភ្នំពេញ​ ប៉ុស្តិ៍​ ក៏បាន​​សាក​សួរ​តារា​ចម្រៀង​ស្រីនៃ​ផលិតកម្ម​ហង្សមាស​ នាង ពេជ្រ សោភា ភ្លាមៗ​តែម្តង​។

ពេជ្រ សោភា​ ក៏បាន​​ប្រាប់​ភ្នំពេញប៉ុស្តិ៍​ នៅ​រសៀល​ថ្ងៃ​មិ្សលមិញ​តាម​ទូរស័ព្ទ​ដោយ​លាយឡំ​សំណើច​តិចៗ​ផងដែរ​ថា៖ «ថានោះ​មិន​ពិត​ទេបង​! គឺនាង​ខ្ញុំមិន​បាន​​ទទួល​រង្វាន់​លើកទឹក​ចិត្ត​ចំនួន ៤ ម៉ឺនដុល្លារ​ពីថ្នាក់​ដឹក​នាំកំពូល ដូចជា​គេ​បាន​ផ្សព្វផ្សាយ​តាម​បណ្តាញ​សង្គម​នោះទេ​»។

ឆ្លៀត​ពេល​នោះ​អ្នក​នាង ពេជ្រ សោភា លើក​ឡើង​ថា៖ «អ្នកថា​នោះ គឺចេះ​តែថា​ហើយ​!ពួក​យើង​មិនបាន​ប្រាក់រង្វាន់​លើក​ទឹក​ចិត្តនោះ​ទេ។ សម្រាប់​ពួកយើង​ គឺគ្រាន់​តែ​ទទួល​នូវការ​ចាប់អារម្មណ៍ និង​រាំអំពី​សំណាក់​លោក [លោក​ ហ៊ុន សែន] នឹង​បទ​ចម្រៀង​នោះ​គឺ​សប្បាយ​ខ្លាំង​ណាស់​ហើយ។ យើង​មិនប្រាថ្នា​ថា​ទាល់តែ​បាន​ទទួល​បាន​រង្វាន់​ជាប្រាក់​បែបនេះ​ទើប​បាន​សប្បាយ​ចិត្ត​នោះទេ!»។

តែតារា​ចម្រៀង​ស្រី ដែល​មាន​ប្រវត្តិ​ធ្លាប់ជា​អ្នកលក់​ទឹក​អំពៅ និង​មាន​ជីវិតត​ស៊ូ​មិនចុះ​ញ៉មនឹង​ការលំបាក​ក្នុង​វិស័យ​សិល្បៈ​ចម្រៀង​ នាង ពេជ្រ សោភា ហាក់ដូចជា​បាន​បង្ហើប​ប្រាប់​ថា នៅ​ក្នុង​ករណីដែល​នាង និង​ដេវីត បានទទួល​ប្រាក់​រង្វាន់​យ៉ាង​ច្រើន​ដូច្នោះ​មែន​សម្រាប់​រូបនាង​នឹង​ប្រើ​យកទៅ​ជួយ​សង្គម។

នាងបាន​ព្រលយ​ពាក្យ​ថា៖ «​តែ​ប្រសិន​ជា​បានប្រាក់​នោះ​មែន​ សម្រាប់​រូបនាង​ខ្ញុំ​នឹងយក​ប្រាក់​ទាំងនោះ​ទៅ​បម្រើ​ឲ្យជា​ប្រយោជន៍​ជួយទៅ​ដល់​សង្គម​​អ្នកជួប​ការ​លំបាក​មិនខាន»។ ​

​ដោយឡែក​ ព័ត៌មាន​ដែលបាន​លេចឮ​ថា​ តារា​ចម្រៀង​ផលិត​កម្ម​ហង្សមាស​អ្នកនាង ពេជ្រ សោភា និង​លោក​ ងួន ចាន់​ដេវីត ទទួល​បាន​នូវប្រាក់​រង្វាន់​លើកទឹក​ចិត្តចំនួន ៤ ម៉ឺន ដុល្លារ​នោះ​ក៏ត្រូវ​បង្ហោះ​នៅក្នុ​ង​ទំព័រ​ហ្វេសប៊ុក​ដែលមាន​ឈ្មោះជា​ភាសា​ជាតិ​ថា «សិល្បករ​កម្ពុជា» ផង​ដែរ៕​

អត្ថបទគួរចាប់អារម្មណ៍