ភ្នំពេញ៖ ជារឿយៗគេតែងឃើញវត្តមានកញ្ញា សំ ថារ័ត្ន ក្នុងការសម្តែងកីឡាល្បុក្កតោ និងការប្រកួតកីឡាគុនចម្រុះ ONE Championships កម្រិតពិភពលោក និងធ្លាប់ថតកុនបែបវាយប្រហារប្រើក្បាច់គុនយ៉ាងរស់រវើក រួមផ្សំនឹងទេពកោសល្យ ដែលជាជំនាញរបស់ខ្លួនធ្លាប់ស្រូបបានការគាំទ្រពីប្រិយមិត្តដ៏ច្រើនសន្ធឹក។
តែថ្មីៗនេះ តារាសម្តែងស្រីខាងយុទ្ធគុន ដែលផ្ទុះភាពល្បីក្នុងខ្សែភាពយន្តខ្នាតធំរឿង «ការពារឧក្រិដ្ឋជន-Jailbreak» និងរឿងដឹកនាំសម្តែងលំដាប់ហូលីវូដ អ្នកនាង អេនជេលីណា ជោលី គឺរឿង «ដំបូងពួកគេសម្លាប់ប៉ារបស់ខ្ញុំ» កីឡាការិនី សំ ថារ័ត្ន នឹងលេចមុខក្នុងកុនខ្នាតធំមួយ មានលក្ខណៈខុសប្លែកពីកុនមុនៗ ដែលមហាជនខ្លះអាចខកបំណងក៏ថាបានព្រោះមិនមែនជាការសម្តែងបែបវាយតប់ ប្រើក្បាច់គុនដូចមុននោះទេ គឺជាកុនបែបព្រឺព្រួចអារម្មណ៍ទៅវិញ។
ដោយសារតែជាលក្ខខណ្ឌរបស់ផលិតកម្មសុំមិនទាន់ឲ្យប្រាប់ចំណងជើងកុនថ្មី កញ្ញា សំ ថារ័ត្ន កំពុងតែថតជាមួយនឹងតារាសម្តែងប្រុសមានប្រជាប្រិយភាពផងដែរ គឺលោក អ៊ុន សុធា ខណៈការថតកុនបានចាប់ផ្តើមថតបានចំនួន ៣-៤ ថ្ងៃមកហើយ រហូតមកដល់ត្រឹមថ្ងៃទី ៧ ខែ តុលា ឆ្នាំ ២០១៩។
អ្នកលេងកីឡាប្រយុទ្ធចម្រុះដ៏លេចធ្លោ សំ ថារ័ត្ន បានក្លាយជាកីឡាការិនី តែម្នាក់គត់ និងដំបូងគេដែលត្រូវបានជ្រើសរើសឲ្យចេញទៅប្រកួតស៊ីហ្គេមលើកទី ៣០ នៅប្រទេស ហ្វីលីពីន លើប្រភេទកីឡាគុនខ្មែរ ឬហៅថា «កីឡាមួយ» តំណាងឲ្យកម្ពុជា នៅចុងខែវិច្ឆិកា និងដើមខែ ធ្នូ ឆ្នាំ ២០១៩ នេះ បានបង្ហើបប្រាប់ភ្នំពេញប៉ុស្តិ៍ខណៈពេលសម្រាកពីការថតកុនបន្តិច នាកាលពីរសៀលពីម្សិលមិញថា៖ «ចាសបង! ខ្ញុំពិតជាកំពុងថតកុនដុំខ្នាតធំថ្មីមួយទៀតមែន! តែសុំអធ្យាស្រ័យផង ដែលមិនទាន់អាចជម្រាបបងបានឡើយកុននោះរឿងអ្វីបាននៅឡើយ ដោយសារជាលក្ខខណ្ឌរបស់ផលិតកម្ម។ តែគ្រាន់តែអាចជម្រាបបង និងទស្សនិកជន ទាំងអស់ពេលនេះបានថា ជាខ្សែភាពយន្តមួយមិនមែនមានឈុតវាយប្រហារ ឬវាយតប់ប្រើក្បាច់គុនដូចរឿងមុនៗឡើយ។ វាជាប្រភេទរឿងថ្មីមួយសម្រាប់នាងខ្ញុំ ពេលចាប់ថតកុននេះដែរ ហើយអ្នកដឹកនាំរឿងក៏បានប្រាប់ដែរ រឿងនេះគឺចង់ឲ្យខ្ញុំទទួលបានពិសោធថ្មីមួយទៀតដែរសម្រាប់វិស័យថតកុនរបស់ខ្ញុំ ពោលគឺគាត់ចង់ឲ្យខ្ញុំមានទេពកោសល្យសម្តែងកុនបានច្រើន គឺមិនចង់ឲ្យថតតែជារឿងកុនមានឈុតវាយតប់នោះឡើយ»។
កញ្ញា សំ ថារ័ត្ន បន្តថា៖ «រឿងនេះដែរ តម្រូវឲ្យខ្ញុំសម្តែងអារម្មណ៍ជាមនោសញ្ចេតនាច្រើនជាងឈុតវាយតប់។ ដូច្នេះ សម្រាប់ទស្សនិកជនខ្លះអាចនឹងមានការខកចិត្តនៅពេលកុនមួយនេះចេញបញ្ចាំងនោះផងដែរ ព្រោះថាវាជាកុនមួយប្រភេទមានលក្ខណៈព្រឺព្រួច»៕