ភ្នំពេញ៖ តារាសម្តែង ២ ដួង ដែលតែងតែបង្ហាញវត្តមានជាមួយគ្នាគ្រប់កម្មវិធីសិល្បៈនានាក្នុងស្រុក កញ្ញា ស៊ិន យូប៊ីន និងលោក ខាត់ វ៉ៃហាំង ដឹកដៃគ្នាដើរលើកម្រាលព្រំក្រហម នៅក្រៅស្រុកលើកទី ២ ជាប់គ្នាក្នុងកម្មវិធីមហោស្របភាពយន្តអន្តរជាតិមួយឈ្មោះ Silk Road International Film Festival នៅខេត្តហ្វូជៀន ប្រទេស ចិន ខែក្រោយនេះ។
នេះជាកិត្តិយសដ៏ធំមួយ សម្រាប់តារាសម្តែងប្រុសស្រីរបស់កម្ពុជាទាំង ២ នាក់ គឺកញ្ញា ស៊ិន យូប៊ីន និងលោក ខាត់ វ៉ៃហាំង ដែលថ្មីៗនេះ ត្រូវបានរដ្ឋាភិបាលចិនអញ្ជើញចូលរួមក្នុងកម្មវិធីធំមួយនេះ នៅប្រទេស ចិន ហើយនេះគឺជាវត្តមានលើកទី ២ របស់លោក ខាត់ វ៉ៃហាំង តែជាលើកទី ៣ របស់ស្រីស្រស់ ស៊ិន យូប៊ីន ក្នុងនាមសិល្បករកម្ពុជាក្នុងកម្មវិធីខាងលើ។
យ៉ាងណាការបញ្ជាក់បន្ថែមពីអារម្មណ៍ក៏ដូចជាដើមចមនៃការអញ្ជើញតារាប្រុសស្រីណាខ្លះទៅចូលរួមក្រៅពីវត្តមានដៃគូ គឺលោក ខាត់ វ៉ៃហាំង និងខ្លួន មិនត្រូវបានកញ្ញា ស៊ិន យូប៊ីន បញ្ជាក់ឲ្យដឹងឡើយដោយសារកញ្ញា កំពុងមានវត្តមាននៅប្រទេស ថៃ ហើយបិទទូរស័ព្ទ។
តែបើតាមការបញ្ជាក់ពីកញ្ញា លក្ខិណា ដែលជាជំនួយការផ្ទាល់របស់កញ្ញា ស៊ិន យូប៊ីន បានបង្ហើបឲ្យដឹងថា៖ «តាមពិតទៅការទៅចូលរួមកម្មវិធីមហោស្រពភាពយន្តនៅចិននោះ មិនមែនជាលើកទី ១ របស់គាត់ទេគឺជាលើកទី ៣ ហើយ ខណៈជាលើកទី ២ សម្រាប់វត្តមានគាត់ និងលោក ខាត់ វ៉ៃហាំង បានទៅចូលរួមជាមួយគ្នានោះ និងមានក្រុមប្រតិភូជាតំណាងកម្ពុជាមកពីនាយកដ្ឋានភាពយន្តផងដែរ»។
កម្មវិធីមហោស្រពភាពយន្តខាងលើ នៅប្រទេស ចិន ដែលតារាខ្មែរទាំង ២ នឹងទៅចូលរួមនោះ នឹងប្រារព្ធឡើងចាប់ពីថ្ងៃទី ១៥ ទៅដល់ថ្ងៃទី ២០ ខែ តុលា ឆ្នាំ ២០១៩ ខណៈតារា ២ ដួង លោក ខាត់ វ៉ៃហាំង និងកញ្ញា ស៊ិន យូប៊ីន នឹងចេញដំណើរពីស្រុកខ្មែរនៅថ្ងៃទី ១៥ ខែតុលា ហើយនឹងត្រឡប់មកវិញ នៅថ្ងៃទី ១៩ ខែ តុលា ឆ្នាំ ២០១៩។
ដោយឡែកកញ្ញា ស៊ិន យូប៊ីន ក៏បានឲ្យដឹងពីអារម្មណ៍ផ្ទាល់ខ្លួនតាមរយៈបណ្តាញសង្គមដែរថា៖ «សូមគោរពអរគុណដល់ the government of the republic of China សម្រាប់ការផ្តល់កិត្តិយស អញ្ចើញនាងខ្ញុំចូលរួមជាលើកទី ៣ ក្នុងកម្មវិធីកម្រាលព្រំក្រហម the 6th Silk Road international film festival នៅ fujian ប្រទេស ចិន ក៏ដូចជាអរគុណទៅដល់ក្រសួង និងស្ថាប័នពាក់ព័ន្ធទាំងអស់ ដែលទុកចិត្ត Yubin to represent Cambodia លើឆាកអន្តរជាតិរហូតមក»៕