ភ្នំពេញៈ ថ្មីៗនេះស្រាប់តែបង្កការភ្ញាក់ផ្អើលខ្លាំងពេញបណ្តាញសង្គមទៅនឹងសារទម្លាយការពិតខ្លួនថា បានយល់ព្រមទទួលយកនូវក្តីស្រឡាញ់ពីបុរសស្មោះស្នេហ៍ម្នាក់ដែលតាមសុំស្នេហ៍នាង ៨ ឆ្នាំមកហើយទើបអ្នកនាង ស៊ិន ឧត្តមផល្លា សម្រេចចិត្តនាពេលនេះក្រោយពីបានរស់នៅក្នុងសភាពជាស្ត្រីមេម៉ាយកូន ៣ ជាង ១០ ឆ្នាំមកនោះ។
តារាចម្រៀងស្រីមានបន្ទុកចិញ្ចឹមកូន ៣ នាក់ ខណៈចាប់តាំងពីស្វាមីបានចែកឋានចោលអស់ពេលប្រមាណ ៧-៨ ឆ្នាំមកហើយ ព្រោះតែជួបឧបទ្ទវហេតុគ្រោះថ្នាក់ចរាចរណ៍ និងបច្ចុប្បន្ននេះក្លាយជាថៅកែលក់គ្រឿងស្បង់ចីពរ និងសម្ភារបុណ្យនានា ហើយក៏ទើបតែបានប្រកាសវិលត្រឡប់មករកទ្រនំចាស់វិថីសិល្បៈចម្រៀងបានជាង ២ ឆ្នាំ បន្ទាប់ពីបាត់មុខរយៈពេលជាង ១០ ឆ្នាំមកនោះ។
ក្រោយពីបានវិលចូលសិល្បៈវិញនោះមហាជនឃើញថា រាសីរបស់តារាចម្រៀងស្រីមេម៉ាយកូន ៣ កាន់តែមានសម្រស់ផូរផង់ ចង់ខ្លាំងជាងកាលពីនៅលីវទៀត ខណៈទីផ្សារសិល្បៈវិញនោះគឺអ្នកនាង ស៊ិន ឧត្តមផល្លា មិនត្រឹមតែសម្បូរកន្លែងច្រៀងនោះទេ ថែមទាំងក្តោបបានឱកាសថតកុនភាគជាហូរហែរហូតមកដោយការស្វាគមន៍កុនភាគដំបូងត្រូវផលិតកម្មហង្សមាស ហៅថតកុនរឿង «រាជិនីភូមិគ្រឹះ» និងក្រោយមកនៅទូរទស្សន៍ប៉ុស្តិ៍លេខ ៥ ទូរទស្សន៍បាយ័ន និងទូរទស្សន៍ PNN ជាដើម។
ដោយចង់ដឹងពីគម្រោងការបន្ទាប់ក្រោយពីឃើញការទម្លាយសារការពិតខ្លួនឯងមកនោះ ភ្នំពេញប៉ុស្តិ៍ក៏បានទាក់ទងច្រើនលើកទៅលេខទូរស័ព្ទនាងនារសៀលម្សិលមិញដែរដើម្បីសុំបញ្ជាក់ការពិត ដ្បិតអាចជាសារក្លែមល្បោយរូបភាពក្នុងឈុតថតកុនណាមួយរបស់អ្នកនាង តែគ្មានអ្នកលើកទូរស័ព្ទឡើយ។
យ៉ាងណាគូស្នេហ៍ថ្មី ឬម្ចាស់ចិត្តទី ២ នេះជាបុរសជាតិខ្មែរ ឬបរទេស ឬក៏ជាអាណិកជនខ្មែររស់នៅក្រៅប្រទេសនោះ និងមានផែនការចូលរោងជ័យពេលណា មិនត្រូវបានតារាចម្រៀងស្រីវ័យឈានចូល ៤០ ឆ្នាំ និងមានកូន ៣ អ្នកនាង ស៊ិន ឧត្តមផល្លា បង្ហើបប្រាប់នោះឡើយ ដោយសារមើលទៅគឺមានចេតនាចង់រក្សាការសម្ងាត់សិន។
បើតាមពិនិត្យសារឆ្លើយឆ្លងរបស់ប្រិយមិត្តតាមបណ្តាញសង្គមដែលបានចូល Comment ទៅនឹងសារទម្លាយការពិតនោះបានចោទសួរយ៉ាងក្តៅគគុក និងសួរចំៗថា៖ «តើជាការពិតឬទេ?» និងសារទៀតថា៖ «តើជាសារសម្រាប់ការសម្តែងកុន ឬជារឿងពិតប្រាកដ?»។
ខណៈអ្នកនាង ស៊ិន ឧត្តមផល្លា បានតបវិញថា៖ «គឺជាការពិត។ មិនមែនសម្រាប់សម្តែងកុននោះទេ ហើយក៏សុំលាក់ទុកវាជាការសម្ងាត់ឯកជនសិន ចាំថ្ងៃណាមួយនឹងបង្ហាញការពិត ឬលោកអ្នកនឹងបានដឹងនៅថ្ងៃណាមួយជាមិនខាននោះទេ»៕