ភ្នំពេញៈ គ្រាន់តែរដូវកាលបុណ្យភ្ជុំបិណ្ឌតាមទំនៀមនៃគន្លងព្រះពុទ្ធសាសនា មកដល់ភ្លាមក៏ស្រាប់តែគេឃើញតារាសម្តែង និងចម្រៀងមេម៉ាយកូន ៣ តែសម្រស់នៅស្រស់ស្អាតមិនចាញ់ក្មេងអ្នកនាង ស៊ិន ឧត្តមផល្លា ហាក់តាំងចិត្តខ្លាំងក្នុងការកើបប្រាក់ដុំលើអាជីពខ្លួនទាំង ២ ដើម្បីឆាប់ក្លាយជាអ្នកមានស្របពេលទីផ្សារសិល្បៈឡើងស្រឺតៗនាពេលមានវ័យកាន់តែជ្រេ។
បើតាមដានពិនិត្យមើលទើបចាប់តាំងពីប្រកាសវិលចូលសិល្បៈវិញ ក្រោយបាត់មុខជាង ១០ ឆ្នាំមក តារាចម្រៀងដែលនិយមបង្ហើរសូរសំនៀងបទចម្រៀងជាភាសាបរទេស និងទឹកដមសមសួនច្រើននឹងបទចម្រៀងចិនអ្នកនាង ស៊ិន ឧត្តមផល្លា រាសីឡើងក្រឺតៗតែម្តង ដោយកបទាំងការថតកុនភាគ និងមានភាពមមាញឹកខ្លាំងនឹងកម្មវិធីសិល្បៈច្រៀងអាហ្វែរ និងក្លិបរាត្រីនានាទៀតផង។
ជាក់ស្តែងថ្មីៗនេះ គេឃើញតារាស្រីទើបផុស-ភាពល្បីក្នុងពិភពសម្តែងកុន ខណៈពេលមានវ័យជិត ៤០ ឆ្នាំទៅហើយនោះ បានបង្ហោះសាររៀបរាប់ពីភាពមមាញឹករបស់ខ្លួនក្នុងមួយថ្ងៃៗថា៖ «ទើបតែថតរឿងចប់មកដល់កន្លែងលក់វិញ ត្រូវវេចខ្ចប់សាដកមួយថ្ងៃវាស់ល្ងាចទៀត ហើយម៉ោង ៨ ពេលយប់ ខ្ញុំត្រូវទៅច្រៀងនៅពិភពរាត្រីចប់នៅម៉ោង ១២ កន្លះ អាធ្រាត្រ។ បន្ទាប់មកព្រឹកស្អែកនេះ ខ្ញុំត្រូវងើបពីម៉ោង ៥ ភ្លឺ រៀបចំថតឲ្យ PR ទៀត ចាំមើល៍ថា តើខ្ញុំរស់បានដល់ពេលណា? ហើយបើថាប៉ុណ្ណឹងហើយ នៅតែធ្វើជាអ្នកមានមិនបានទៀតគឺ ចប់ហើយណាខ្លា»។
តារាចម្រៀងដែលមានបន្ទុកចិញ្ចឹមកូន ៣ នាក់ ខណៈស្វាមីបានចែកឋានចោលជាង ១០ ឆ្នាំ ដែលនៅបច្ចុប្បន្ននេះ គឺក្លាយជាថៅកែលក់គ្រឿងស្បង់ចីវរ និងសម្ភារបុណ្យទាននានា ហើយក៏ទើបតែវិលត្រឡប់មករកទ្រនំសិល្បៈចម្រៀងវិញជិត ១ ឆ្នាំ ក៏បានឲ្យភ្នំពេញប៉ុស្តិ៍ដឹងទៀតដែរ ពីភាពកាក់កបខ្លាំងសម្រាប់ទីផ្សារសិល្បៈរបស់ខ្លួន ខណៈពេលមានវ័យកាន់តែជ្រេទៅវិញ គួរឲ្យឆ្ងល់។
តារាចម្រៀងស្រីកំពុងល្បីមានសមត្ថភាពខ្លាំងជាងមុនក្នុងការបកស្រាយបទចម្រៀងដ៏ពីរោះបានច្រើនភាសា ដើម្បីបំពេញតាមតម្រូវការទីផ្សារប្រិយមិត្តអ្នកស្តាប់ អ្នកនាង ស៊ិន ឧត្តមផល្លា ក៏បានគូសបញ្ជាក់ទាំងចិត្តឆ្ងល់ស្មានមិនដល់រឿងរាសីឡើងពេលវ័យជ្រេនេះដែរថា៖ «ពិតជាអាចបកស្រាយបានច្រើនភាសាមែន ប៉ុន្តែ ១ ភាសាអាចបានតែ ៣-៤ បទតែប៉ុណ្ណោះ មិនអាចច្រៀងច្រើនដូចជាបទជាភាសាអង់គ្លេស និងចិននោះឡើយ។ ពេលថ្មីៗនេះ នាងខ្ញុំក៏ទៅច្រៀងនៅកន្លែងថ្មីឈ្មោះពិភពថ្មី គឺសម្បូរភ្ញៀវចម្រុះជាតិសាសន៍ អ៊ីចឹងត្រូវតែចេះឲ្យច្រើនសាសន៍ទៅទាន់គេកំពុងត្រូវការយើង។ ចំពោះការថតកុនវិញ បានថតកុនភាគ ៤ រឿងជាប់គ្នាតែម្តងឲ្យទូរទស្សន៍ហង្សមាសគឺ ២ រឿង និងផលិតកម្ម PR ក៏ ២ រឿងដែរ»៕