.jpg)
សារ និងរូបថតតារាសម្ដែង ស៊ីន យូប៊ីន ត្អូញត្អែរពីការរកប្រាក់ទៅមើលជំងឺនៅមន្ទីរពេទ្យ។ រូបថត ហ្វេសប៊ុក
ភ្នំពេញ: តារាសម្តែងស្រីដែលមានប្រជាប្រិយភាពទាក់ចិត្តអ្នកគាំទ្រដោយសារសម្រស់ និងសមត្ថភាពកញ្ញា ស៊ីន យូប៊ីន មានភាពមមាញឹកខ្លាំងក្នុងការសម្តែងកុនភាគជាច្រើនជាបន្តបន្ទាប់ និងមានការអញ្ជើញចូលរួមកម្មវិធីតូចធំជាច្រើនមិនដាច់ដូចគ្នា ស្រាប់តែតារាស្រីរូបនេះបានបង្ហោះសារនៅក្នុងបណ្តាញសង្គមដោយត្អូញត្អែរថាខំធ្វើការ ដើម្បីតែយកលុយទៅព្យាបាលជំងឺនៅពេទ្យទៅវិញ។
ភ្ជាប់ជាមួយរូបថតអង្គុយលើកៅអី ដៃមានភ្ជាប់ឧបករណ៍ពិនិត្យតាមដានសុខភាព តារាសម្តែងស្រីរាងតូចច្រឡឹងមុខគួរឲ្យស្រឡាញ់ កញ្ញា ស៊ីន យូប៊ីន បានរំលេចអារម្មណ៍ត្អូញត្អែរតាមបណ្តាញសង្គមយ៉ាងដូច្នេះថា៖ «ខំធ្វើការរកប្រាក់មកចិញ្ចឹមពេទ្យ ស្រឡាញ់ពេទ្យខ្លាំង»។
តារាស្រីមានសមត្ថភាពក្នុងការសម្តែងថែមទាំងមានសំនៀងពីរោះមិនចាញ់តារាចម្រៀងអាជីព កញ្ញា ស៊ីន យូប៊ីន ជាតារាស្រីដែលស្ថិតនៅក្នុងចិត្តរបស់មហាជន។ ពិសេសនេះបានស្រង់យកភាពល្បីតាមរយៈការសម្តែងធ្វើជាតួឯក ជាពិសេសចាប់ដៃគូសមឥតខ្ចោះជាមួយតារាសម្ដែងប្រុសសង្ហា ខាត់ វ៉ៃហាំង ដោយទើបតែបានបញ្ចប់ការថតរឿងថ្មីឲ្យទូរទស្សន៍ភីអិនអិនរឿង «អាថ៌កំបាំងត្រីសូល៍» ដែលបានចាប់ផ្តើមចាក់បញ្ចាំងនៅពេលថ្មីៗនេះដែរ។
ជាមួយការងារថតភាពយន្ត និងផលិតផលដ៏មមាញឹកដែលប្រាក់បានមកពីកិច្ចការទាំងនេះបែរជាត្រូវទូទាត់ថ្លៃពេទ្យនោះអ្នកគាំទ្រនាងក៏មានការងឿងឆ្ងល់ដែរថា តើកញ្ញា ស៊ីន យូប៊ីន មានជំងឺអ្វី និងធ្ងន់ធ្ងរដល់ថ្នាក់ណាទើបធ្វើឲ្យនាងឡើងចុះពេទ្យញឹកញាប់ដូច្នេះ។
ជុំវិញស្ថានភាពសុខភាពរបស់នាង ខណៈសាមីខ្លួនពុំអាចទំនាក់ទំនងបាន ជំនួយការរបស់ ស៊ីន យូប៊ីន បានបង្ហើបប្រាប់ ភ្នំពេញ ប៉ុស្ដិ៍ ថា៖ «គាត់ (ស៊ីន យូប៊ីន) មានជំងឺរលាកក្រពះតិចតួចទេ ប៉ុន្តែក្នុង ៦ ខែគាត់ត្រូវទៅពិនិត្យសុខភាពម្តងទាំងក្នុងស្រុក និងស្រុកថៃ»។
ជំនួយការរបស់តារាសម្តែងស្រីរូបនេះក៏បានរៀបរាប់ពីមូលហេតុធ្វើឲ្យនាងធ្លាក់ខ្លួនឈឺបែបនេះទៀតថា៖ «ដូចបងដឹងស្រាប់ហើយគាត់ជាតារាសម្តែង ពេលខ្លះមិនបានញ៉ាំបាយ ឬក៏ញ៉ាំមិនទៀងពេល ហើយពេលខ្លះទៀតត្រូវថតរហូតដល់យប់ ជួនកាលថតពេញ ១ យប់មិនបានគេងក៏មាន ទើបធ្វើឲ្យឈឺបែបហ្នឹងទៅ»។
គួរបញ្ជាក់ដែរថាតារាស្រីរូបនេះទើបតែបានបង្ហើរសំនៀងតាមបណ្តាញសង្គមយ៉ាងពីរោះជាបទរបស់អធិរាជសំឡេងមាសលោកតា ស៊ីន ស៊ីសាមុត ដែលធ្វើឲ្យអ្នកគាំទ្រនាងសន្និដ្ឋានថា ស៊ីន យូប៊ីន ទំនងជាចង់ចាប់អាជីពចម្រៀងបន្ថែមដើម្បីពង្រីកខ្ទង់ចំណូលឲ្យកាន់តែក្រាស់ បើទោះជាការងារសិល្បៈសម្ដែងរបស់នាងមមាញឹកស្ទើរដកឃ្លាពុំរួចនោះក្ដី។
ប៉ុន្តែជំនួយការកញ្ញា ស៊ីន យូប៊ីន បានបញ្ជាក់ប្រាប់ដែរថា៖ «គាត់ (ស៊ីន យូប៊ីន) មិនមានបំណងចង់ធ្វើជាតារាចម្រៀងអាជីពទេ គ្រាន់តែមានចិត្តស្រលាញ់បទលំនាំដើមក៏យកមកបកស្រាយទុកស្តាប់លេងប៉ុណ្ណោះ»។
រយៈពេលចុងក្រោយនេះកញ្ញា ស៊ីន យូប៊ីន កំពុងតែមមាញឹកក្នុងការថតកុនរឿងថ្មីឲ្យទូរទស្សន៍ភីអិនអិនចំនួន ២ រឿងបន្ថែមទៀតក្រោយពីបានបញ្ចប់រឿង «អាថ៌កំបាំងត្រីសូល៍» តែសុំមិនទាន់បង្ហើបចំណងជើងនោះទេ ដោយសារខាងទូរទស្សន៍សុំឲ្យលាក់សិន ព្រោះរឿងទើបតែចាប់ផ្តើមថតបាន ១ សប្ដាហ៍ប៉ុណ្ណោះ៕
