.jpg)
តារាចម្រៀង ស៊ុន ស្រីពេជ្រ និងបុរសជាស្វាមីដែលរីករាយនឹងស្វាគមន៍កំណើតកូនស្រីក្នុងគ្រួសារ។ រូបថត ហ្វេសប៊ុក
ភ្នំពេញៈ ក្រោយសម្រាកពីការងារសិល្បៈមួយរយៈពេលនេះតារាចម្រៀងមនោសញ្ចេតនាបែបស្រគត់ស្រគំ អ្នកនាង ស៊ុន ស្រីពេជ្រ ខណៈកំពុងតែមមាញឹកថតបទចម្រៀងដាក់ឆានែលយូធូបផ្ទាល់ខ្លួនត្រៀមសម្រាប់ឱកាសពិធីបុណ្យចូលឆ្នាំប្រពៃណីជាតិខ្មែរខាងមុខនេះក៏ស្រាប់តែនាងរងនូវការលេចឮព័ត៌មានរសើបថា តារាស្រីល្បីខាងបទចម្រៀងទេសចរណ៍អ្នកនាង ស៊ុន ស្រីពេជ្រ ស្ងាត់ៗទើបតែសម្រាលបានកូនស្រីដ៏ស្រស់ស្អាតមួយវ័យជិត ១ ខែទាំងពុំធ្លាប់មានដំណឹងចូលរោងការក្រាបផ្ទឹមតាមប្រពៃណីខ្មែរជាមួយបុរសម្ចាស់ស្នេហ៍ទាល់តែសោះ។
បណ្ដាញព័ត៌មានជាច្រើនបានផ្សព្វផ្សាយថាអ្នកនាង ស៊ុន ស្រីពេជ្រ ជ្រើសយកជីវិតបែបទាន់សម័យដូចបស្ចិមប្រទេសដោយមានកូនមិនបាច់រៀបការ។
ទាក់ទិននឹងបញ្ហានេះតារាចម្រៀងសើចស្រស់នឹងធ្មេញច្រពើស អ្នកនាង ស៊ុន ស្រីពេជ្រ ដោយលើកហេតុផលថារវល់ជាប់ថតនោះ អ្នកនាងបានបកស្រាយប្រាប់ឲ្យភ្នំពេញប៉ុស្តិ៍ឲ្យដឹងក្នុងការសន្ទនាតាមទូរស័ព្ទរយៈនាទីដ៏ខ្លីថា៖ «ខ្ញុំការហើយមួយសាហើយការតាំងពីឆ្នាំទៅប្រហែល ១ ឆ្នាំជាងហើយ»។
យ៉ាងណាមិញ ភ្នំពេញ ប៉ុស្ដិ៍ ពុំអាចសុំការបរិយាយលម្អិតពីអ្នកនាង ស៊ុន ស្រីពេជ្រ ឡើយ។
គួររំឭកដែរថាកន្លងមកតារាចម្រៀងត្រូវជាកូនស្រីតារាកំប្លែង សងស៊ីស រូបនេះធ្លាប់បានបង្ហោះសារធ្វើឲ្យអ្នកគាំទ្រភ្ញាក់ផ្អើលថា៖ «ចាស់ហើយពេលណាមាននឹងគេ» ដោយភ្ជាប់នូវរូបក្មេងស្រីតូចម្នាក់មានមុខមាត់ស្អាតគួរឲ្យក្នាញ់យកចេញពីប្រព័ន្ធអ៊ីនធឺណិតមកបង្ហោះក្នុងបណ្ដាញសង្គម។
ពេលនេះក្ដីប្រាថ្នាចង់បានកូនស្រី របស់តារាចម្រៀងល្បីខាងបទទេសចរណ៍ អ្នកនាងស៊ុន ស្រីពេជ្រ បានសម្រេចហើយដោយអ្នកនាងទទួលបានចំណងដៃកូនស្រីជាមួយស្វាមីសមបំណង។
ចំណងស្នេហ៍ជាមួយស្វាមីនេះគឺបន្ទាប់ពីតារាចម្រៀងចាកទ្រនំហង្សមាសមកផលិតកម្មថោន រូបនេះបានផ្តាច់ចំណងស្នេហ៍ជាមួយមន្ត្រីម្នាក់បម្រើការងារនៅក្រសួងសង្គមកិច្ចអស់រយៈជាងមួយឆ្នាំមកហើយ។
គួររំឭកដែរថា តារាចម្រៀងនិយមបែបស្រគត់ស្រគំ និងច្រៀងបទប្រពៃណី អ្នកនាង ស៊ុន ស្រីពេជ្រ ជាកូនម្នាក់ក្នុងចំណោម ៨ នាក់នៃក្រុមគ្រួសារតារាកំប្លែងជើងចាស់នាយ សង់ ស៊ីស។ ក្នុងនោះបងប្អូននាងដែលប្រឡូកក្នុងវិស័យសិល្បៈមាននាយ សង់ សេត និងអ្នកនាង កាឆយ។
អ្នកនាង ស៊ុន ស្រីពេជ្រ បានប្រឡូកក្នុងវិស័យសិល្បៈចម្រៀងជាច្រើនឆ្នាំមកហើយ ដោយអ្នកនាងទទួលបានការគាំទ្រខ្លាំងតាមរយៈចម្រៀងពីទេសចរណ៍នៅកម្ពុជា។
ក្រោយពីរំដោះគ្រួសារចេញពីជីវភាពទីទ័លជួលផ្ទះគេ និងបានធូរធារមួយរយៈមក គ្រួសារអ្នកនាងក៏ជួបបញ្ហាបន្តបន្ទាប់គឺលោក សង់ស៊ីស ជាឪពុកនាងចេញចូលមន្ទីរពេទ្យញឹកញាប់ ហើយប្អូនប្រុសក៏ត្រូវជំងឺធ្វើទុក្ខបញ្ជូនទៅវៀតណាម។ ឆ្នាំមុនគ្រួសាររបស់អ្នកនាងក៏ទើបតែប្រកាសលក់ផ្ទះជាបន្ទាន់ ដើម្បីដោះស្រាយតម្រូវការភ្លាមៗផងដែរ៕
