.jpg)
រ៉េត ស៊ូហ្សាណា ជាប់ក្នុងបញ្ជី Top 100 Most beautiful asian women 2019។ រូបថត អីុនស្តាក្រាម
ភ្នំពេញ៖ ទើបតែបានបកស្រាយពីដំណឹងល្បីរឿងថា ចាប់បានឱកាសកើបប្រាក់ធំមួយតំណែងជាតួឯកស្រីក្នុងកុនឲ្យផលិតកម្មចិនមួយ ដែលសម្តែងជាមួយនឹងតារាចម្រៀង និងតារាសម្តែងចិនហុងកុង ជើងចាស់ដ៏ល្បីលោក Dicky Cheung មុននេះសោះ ស្រាប់តែតារាចម្រៀងស្រីវ័យក្មេងស៊ីដាច់គេខាងច្រៀងភាសាអង់គ្លេសនៅហង្សមាសកញ្ញា រ៉េត ស៊ូហ្សាណា លេចវត្តមានក្នុងបញ្ជីកំពូលស្រីស្អាត ១០០ រូប ប្រចាំតំបន់អាស៊ីនៅឆ្នាំ ២០១៩ ធ្វើឲ្យភ្ញាក់ផ្អើលមហាជនសាជាថ្មី។
មិនត្រឹមធ្វើឲ្យភ្ញាក់ផ្អើលពីមហាជនគាំទ្រប៉ុណ្ណោះទេ សូម្បីតែសាមីខ្លួន រ៉េត ស៊ូហ្សាណា ក៏មិនបានដឹងខ្លួនផងថា បានជាប់ក្នុងបញ្ជីស្រីស្អាត ១០០ រូប ប្រចាំតំបន់អាស៊ីនោះ នេះបើតាមការឆ្លើយតបទាំងមានភាពងឿងឆ្ងល់ប្រាប់ភ្នំពេញប៉ុស្តិ៍ នារសៀលម្សិលមិញ។
តារាចម្រៀងស្រីវ័យ ១៩ ឆ្នាំ កំពុងតែសាងឈ្មោះល្បីលើវិថីសិល្បៈតាមរយៈសូរសំនៀងដ៏ពីរោះជាភាសាអង់គ្លេស កាលពីប្រឡងមានរាសីឡើងក្រឺតៗ ដោយបានក្លាយជាតារាសុច្ឆន្ទៈ ២ ឆ្នាំជាប់គ្នា របស់ក្រុមហ៊ុនទូរស័ព្ទស្មាតហ្វូន OPPO ជាមួយនឹងក្រុមតារារួមអាជីព នៅហង្សមាស គឺ ពេជ្រ សោភា និងលោក Step នោះក៏បញ្ជាក់ថា៖ «អូ! នាងខ្ញុំពិតជាអត់បានដឹងដំណឹងនេះឡើយ ហើយក៏នៅមិនទាន់បានឃើញនៅឡើយមកទល់ពេលនេះ ព្រោះថាមួយរយៈនេះ ខ្ញុំរវល់នឹងការងារសិល្បៈពេក ទើបមិនបានតាមដានមើល។ ប្រសិនបើមិនបានបងទូរស័ព្ទសួរនាងខ្ញុំរឿងនេះទេ គឺពិតជាអត់បានដឹងមែន!»។
ដំណឹងបង្ហាញឈ្មោះសិល្បករ-សិល្បការិនីមានសម្រស់ស្អាតប្រចាំ នៅតំបន់អាស៊ីក្នុងឆ្នាំ ២០១៩ នេះ ត្រូវទម្លាយចេញពីក្នុងអ៊ីនស្តាក្រាមឈ្មោះថា 50mostbeautifulasianwomen ខណៈក្រៅពីកញ្ញា រ៉េត ស៊ូហ្សាណា នោះក៏មានតារាស្រីប្រុសខ្មែរមួយចំនួនទៀតដែរ រួមមានដូចជាកញ្ញា ស៊ីន យូប៊ីន កញ្ញា ឈៀង ហ៊ុយឡេង កញ្ញា ម៉េលីយ៉ា កញ្ញា ដា ដាវ កញ្ញា ប៊ី សុធារី កញ្ញា រឿន ណាត កញ្ញា សំណាង អេលីណា និងលោក នីកូ ជាដើម។
ទោះជាយ៉ាងណា កញ្ញា រ៉េត ស៊ូហ្សាណា ក៏សម្តែងពីអារម្មណ៍សប្បាយចិត្តប្រាប់ថា៖ «ទោះបីជានាងខ្ញុំ នៅមិនទាន់បានដឹងដំណឹងនេះក្តី តែគ្រាន់តែបងសួរនាំ និងបង្ហើបភ្លាម នាងខ្ញុំពិតជារំភើបចិត្តខ្លាំង ដែលខ្លួនឯងអាចទទួលបានលទ្ធផលបែបនេះ»។
គួរបញ្ជាក់ថា រ៉េត ស៊ូហ្សាណា តារាចម្រៀងស្រីជាបេក្ខនារីប្រឡង The Voice Cambodia រដូវកាលទី ២ ត្រឹមវគ្គពាក់កណ្តាលផ្តាច់ព្រ័ត្ររូបនេះ មានភាពមមាញឹកខ្លាំងក្នុងសិល្បៈហើយក្រៅពីច្រៀង គឺនាងក៏ជាទូតសុច្ឆន្ទៈឲ្យក្រុមហ៊ុន Cellcard នៅក្រុមហ៊ុនទូរស័ព្ទម៉ាក OPPO ក្រុមហ៊ុន Charles & Keith ជាដើម៕
