.jpg)
ថ្មីៗនេះគ្រួសាររបស់តារាចម្រៀងស្រី សុន ស្រីពេជ្រ ប្រកាសលក់ផ្ទះល្វែងមួយជង់ទៀត។ ហ្វេសប៊ុក
ភ្នំពេញៈ ខណៈការប្រកាសលក់ផ្ទះមួយ ២ ល្វែងជាប់គ្នា ដែលតារាចម្រៀងស្រី ម៉ៅដាច់ខាងបង្ហើរសំនៀងវិស័យទេសចរណ៍ កញ្ញា សុន ស្រីពេជ្រ លក់បន្ទាន់ដើម្បីយកប្រាក់ព្យាបាលជំងឺប្អូនប្រុស និងឪពុក កាលពីចុងឆ្នាំមុនមិនទាន់ដាច់ផងនោះស្រាប់តែថ្មីៗនេះ បន្ថែមប្រកាសលក់ផ្ទះមួយជង់ផ្សេងទៀតថ្លៃជាងមុនគោលបំណងដដែលបង្កការភ្ញាក់ផ្អើលសាជាថ្មីដល់មហាជន។
ផូស្តចេញពីគណនីហ្វេសប៊ុករបស់ នាយ សង់សេត ជាបងប្រុសបង្កើតរបស់កញ្ញាសុន ស្រីពេជ្រ បានបង្ហោះរូបផ្ទះល្វែង ២ មានទីតាំងផ្សេងគ្នា និងសារប្រាប់តម្លៃផងដែរថា៖ «យើងខ្ញុំត្រូវការលក់ ២ កន្លែងចាំបាច់ ទី១ ស្ថិតនៅភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ នៅក្នុងរាជធានីភ្នំពេញ តម្លៃ ៣៥ ម៉ឺនដុល្លារ អាចចរចាបាន។ ទី ២ គឺនៅក្នុងភូមិសុពណ៌ សង្កាត់គោករកា ខណ្ឌព្រែកព្នៅ រាជធានីភ្នំពេញ តម្លៃ ២៥ ម៉ឺនដុល្លារ ចរចាបាន»។
កាលពីប្រកាសលក់ផ្ទះលើកដំបូង កញ្ញា សុន ស្រីពេជ្រ បានសរសេរសេចក្តីជូនដំណឹងប្រាប់ថា៖ «ខ្ញុំ សុន ស្រីពេជ្រ ត្រូវការលក់ផ្ទះជាបន្ទាន់ដើម្បីជួយដល់ប្អូនប្រុសនាងខ្ញុំ កំពុងត្រៀមវះកាត់បញ្ចូលខួរឆ្អឹង ដែលមានទីតាំងស្ថិតនៅភូមិសុពណ៌ សង្កាត់គោករកា ខណ្ឌព្រែកព្នៅ រាជធានីភ្នំពេញ មានទំហំ ១០ ម៉ែត្រគុណ ២២ ម៉ែត្រ» ភ្ជាប់ជាមួយរូបផ្ទះមួយជំហរនោះ ក៏មានការសុំដោយទទូចថា៖ «សូមមេត្តាជួយស៊ែរបន្តផង ឲ្យបានលក់ឆាប់ដាច់ ហើយប្អូននាងខ្ញុំនឹងឆាប់បានទៅវះកាត់ផងដែរ»។
នាយ សង់ សេត ត្រូវជាបងប្រុសបង្កើតរបស់កញ្ញា សុនស្រីពេជ្រ បានប្រាប់ថា៖ «ផ្ទះមុននោះយើងលក់មិនដាច់ទេ ហើយតាមពិតទៅពុក គាត់មានផ្ទះ ២ កន្លែងផ្សេងគ្នា ដែលសុទ្ធតែមាន ២ ល្វែងជាប់គ្នា។ ការប្រកាសលក់ផ្ទះបន្ថែមបែបនេះ ក៏ព្រោះតែត្រូវការប្រាក់បន្ទាន់ក្នុងចំណោម ២ កន្លែងនេះ បើដាច់មួយណា គឺគ្រួសារយើងនឹងសម្រេចចិត្តរស់នៅ ១ កន្លែងផ្សេងទៀត ហើយក៏អាចឲ្យជម្រើសទៅដល់បងប្អូនដែលចង់ទិញផ្ទះតាមទីតាំងខ្លួនស្រឡាញ់ផងដែរ»។
នាយ សង់ សេត ក៏បន្តឲ្យដឹងដែរថា៖ «ដោយសារតែក្រុមគ្រួសារ និងបងប្អូនទប់ទល់លែងបានហ្នឹងហើយ ទើបតម្រូវការប្រាក់ជាបន្ទាន់សម្រាប់ព្យាបាលប្អូនប្រុស ដែលត្រូវឡើងចុះថៃ ដើម្បីមើលជំងឺ ២០ ថ្ងៃទៅម្តង អស់ប្រាក់មិនតិចជាង ៣ ពាន់ ដុល្លារ នោះឡើយ»៕
