.jpg)
កញ្ញា លាង ចាន់ឡា លេចមុខច្រៀង នៅក្នុងទ្រនំផលិតកម្មជាមួយលោក ប៊ុត សីហា។ កញ្ញា លាង ចាន់ឡា អតីតបេក្ខនារីធ្លាប់ប្រឡងកម្មវិធី X Factor Cambodia រដូវកាលទី១។ រូបថត ហ្វេសប៊ុក
ភ្នំពេញ៖ នាពេលថ្មីៗនេះ ស្រាប់តែលេចមុខកញ្ញា លាង ចាន់ឡា អតីតជាបេក្ខនារីធ្លាប់ចូលប្រឡងក្នុងកម្មវិធី X Factor Cambodia រដូវកាលទី១ ក្លាយជាតារាចម្រៀងស្រីប្រចាំផលិតកម្មថ្មីមួយឈ្មោះ Life Production និងជាដៃគូច្រៀងឆ្លើយឆ្លងនឹងលោក ប៊ុត សីហា ដែរតាមរយៈបទ «មុខខិលមាត់ខូច» និងបទ «មេម៉ាយក៏មានហាងឆេង»។
ខណៈផលិតកម្មនីមួយៗកំពុងតែសម្រុកចេញបទចម្រៀងបែបប្រពៃណីរបស់តារាចម្រៀងប្រុសស្រីខ្លួន សម្រាប់់ឱកាសអបអរសាទរពិធីបុណ្យចូលឆ្នាំថ្មីប្រពៃណីខ្មែរជិតចូលមកដល់នោះ ផលិតកម្មថ្មី Life Production ក៏ផុសផុលខ្លាំងក្នុងការចេញបទថ្មីៗផងដែរ។ ជាក់ស្តែងដូចជាកញ្ញា លាង ចាន់ឡា គឺជាតារាចម្រៀងស្រីទី២ អតីតជាបេក្ខនារីប្រឡងកម្មវិធី X Factor Cambodia រដូវកាលទី១ នៅទូរទស្សន៍ហង្សមាស បន្ទាប់ពីកញ្ញា ថាន់ នឿថង និងជាតារាចម្រៀងស្រីទី២ ផងដែរ ក្លាយជាដៃគូចម្រៀងស្រីជាមួយលោក ប៊ុត សីហា នៅផលិតកម្ម Life Production ក្រោយពីបាត់មួយរយៈ។
លោក ឈួន សុខលីម នាយកគ្រប់គ្រងផលិតកម្ម Life Production ក៏បង្ហើបឱ្យដឹងលក្ខណសម្បត្តិតារាចម្រៀងស្រីរលកក្រោយនេះផងដែរថា៖ «យើងបានសម្រេចចិត្តជ្រើសយកកញ្ញា លាង ចាន់ឡា មកច្រៀង មានការចុះកុងត្រា រយៈពេល ១ ឆ្នាំ។ ដោយយើងមើលឃើញចំណុចពិសេសរបស់គាត់មួយចំនួនដូចជា មានទឹកដមសំនៀងល្អ ដែលកម្ររកបានជាពិសេសនោះ សំឡេងរបស់គាត់ គឺអាចចាប់ដៃគូជាមួយ ប៊ុត សីហា បាន។ លើសពីនេះ គាត់ គឺជាតារាចម្រៀងស្រីដែលមិនមានជាប់ពាក់ព័ន្ធជាមួយផលិតកម្មផ្សេង»។
ក្រៅពីនេះ គេក៏សង្កេតឃើញដែរថា កញ្ញា លាង ចាន់ឡា បន្ទាប់ពីបាត់មុខអស់មួយរយៈស្រាប់តែលេចមុខនៅក្នុងវីដេអូរឿងអប់រំខ្លីមួយ បង្ហាញឱ្យឃើញពីទិដ្ឋភាពក្នុងសង្គមដោយនាងត្រូវសម្ដែងជាតួអង្គប្រពន្ធដ៏កម្សត់របស់បុរសម្នាក់ ដែលគ្មានចិត្តស្មោះត្រង់នឹងភរិយាខ្លួន ហើយលួចលាក់មានស្រីក្រៅ គឺរឿង «ប្រពន្ធបាយកក» មានរយៈពេល ២៦ នាទី ទៀតផង ដែលនេះ គឺទីផ្សារការងារសិល្បៈបច្ចុប្បន្នរបស់កញ្ញា។
គួរបញ្ជាក់ផងដែរថា Life Production គឺជាផលិតកម្មមួយ ដែលតែងទទួលយកក្រុមតារាចម្រៀងប្រុសស្រីរលកក្រោយដែលមានទេពកោសល្យសិល្បៈ និងមិនទាន់មានជម្រកជ្រកកោននៅឡើយ ហើយអ្វីដែលកាន់តែពិសេសនោះគឺ ផលិតកម្មរមែងប្រមើលមើលចាំត្រងយកក្រុមតារាចម្រៀង ដែលប្រឡងធ្លាក់កម្មវិធីប្រកួតប្រជែងនានា តួយ៉ាងដូចជាកម្មវិធីប្រឡងប្រជែងនៅទូរទស្សន៍ហង្សមាសនាពេលកន្លងមក រួមមានដូចជាកម្មវិធី The Voice Cambodia កម្មវិធី Cambodian Idol និងកម្មវិធី X Factor Cambodia ជាដើម៕
