.jpg)
កញ្ញា ហ្វាហ្វា បង្ហើបរឿងថតកុនថ្មី ដែលជិតចាក់បញ្ចាំងនៅលើប៉ុស្តិ៍ភីអិនអិន។ រូបថត ហ្វេសប៊ុក, តារាសម្តែង និងម៉ូដែលស្រីស្រស់ កញ្ញា គៀត បេឡា ហៅហ្វាហ្វា។ រូបថត ហ្វេសប៊ុក
ភ្នំពេញ៖ ស្ងាត់ៗនេះ ស្រាប់តែតារាសម្តែងស្រី ពិធីការិនីទូរទស្សន៍ និងតារាម៉ូដែល មានរូបស្រស់ស្អាត សាច់សខ្ចី ឈ្មោះពិត គៀត បេឡា ហៅកញ្ញា ហ្វាហ្វា ដែលមហាជនដឹងថា គឺជាគូស្នេហ៍របស់តារាចម្រៀងនាយ ចឺម ក៏បង្ហើបរឿងខ្លួនត្រៀមបង្ហាញវត្តមានក្នុងភាពយន្តមួយជិតចាក់បញ្ចាំងតាមប៉ុស្តិ៍ទូរទស្សន៍ភីអិនអិន បង្កភាពភ្ញាក់ផ្អើល។
យ៉ាងណាសម្រាប់វត្តមានក្នុងខ្សែភាពយន្តថ្មីនោះ គេមិនទាន់ថា តារាសម្តែងស្រី ពិធីការិនី និងតារាម៉ូដែល រូបស្រស់ស្អាត សាច់សខ្ចី កញ្ញា ហ្វាហ្វា បានតំណែងជាតួឯក ឬតួរងនោះឡើយ ដោយសារតែប្រព័ន្ធទូរស័ព្ទនាងមិនអាចទំនាក់ទំនងបាន ហើយបើតាមរូបថតបង្ហាញនៅលើបណ្តាញសង្គមនោះ ក៏មានវត្តមានតារាសម្តែងស្រីសម្រស់ស្អាតផូរផង់ ដែលបានអភិវឌ្ឍខ្លួនចេញពីតារាម៉ូដែល និងអតីតជាកញ្ញាឯកចក្កវាឡកម្ពុជាប្រចាំ ២០១៨ គឺកញ្ញា រឿន ណាត ផងដែរ។ ខណៈកញ្ញា ហ្វាហ្វា គ្រាន់តែបានបង្ហោះសារខ្លីថា៖ «រឿងផ្កាព្រៃឆាប់ៗនេះ លើកញ្ចក់ទូរទស្សន៍ PNN!»។
កញ្ញា ហ្វាហ្វា អតីតក៏ធ្លាប់ជាបវរកញ្ញាតំណាងឲ្យជាតិកម្ពុជាក្នុងការប្រកួត Miss Cosmos World កាលពីឆ្នាំ ២០១៨ ផងដែរ ដោយបានជាប់ត្រឹមវគ្គជម្រុះ Top8 Miss Cosmos World 2018 ហើយនាពេលថ្មីៗនេះ នាងបានប្រកាសពីក្តីប្រាថ្នាធំខ្លួនស្រឡាញ់ពីក្មេងចង់ក្លាយជាតំណាងកញ្ញាឯកចក្កវាឡកម្ពុជាប្រចាំនៅឆ្នាំ ២០២០ នេះដែរ។
កញ្ញា ហ្វាហ្វា ដែលជាបុប្ផា ១ ទង ដែលមានសម្រស់ស្រស់ស្អាត សាច់សខ្ចី ស្រុកកំណើតនៅកៀនស្វាយ វ័យ ២៣ ឆ្នាំរូបនេះ ក៏ធ្លាប់បង្ហើបថា៖ «ចាស! នេះជាការពិតណាស់! គឺជាក្តីស្រមៃធំមួយសម្រាប់ខ្ញុំ ដែលធ្លាប់មានក្តីបំណងតាំងពីក្មេងមក ហើយវាជាក្តីស្រឡាញ់ខ្លាំងរបស់ខ្លួនដែរ ខណៈឆ្នាំកន្លងមកនោះ ដោយមិនមានពេលគ្រប់គ្រាន់សម្រាប់ប្រកួតប្រជែងនៅក្នុងកម្មវិធីបវរកញ្ញាចក្កវាឡនោះ ទើបនាងខ្ញុំមិនបានដាក់ពាក្យចូលប្រកួត ហើយឆ្នាំនេះ ក៏មានការតាំងចិត្តដាក់ពាក្យចូលប្រកួតឲ្យបាន ដើម្បីផ្តល់ឱកាសខ្លួនឯងដើរលើផ្លូវ ដែលខ្លួនចូលចិត្ត និងចង់ដឹងពីសមត្ថភាពខ្លួនសម្រាប់ការប្រកួតមួយនេះ។
ដូច្នេះទោះបីរវល់យ៉ាងណា ក៏ត្រូវលៃលកសម្រាប់ការប្រកួតបវរកញ្ញាចក្រវាឡឆ្នាំ ២០២០ នេះដែរ ហើយខ្លួនឯងក៏មានក្តីសង្ឃឹមជឿជាក់លើខ្លួនឯង ដើរលើវិថីសិល្បៈដែលស្រឡាញ់តាំងពីក្មេងមកនោះផង»៕
