.jpg)
លោក ដួង សុខគា តារាចម្រៀងពហុជំនាញចេះច្រៀងអាយ៉ៃ ភ្លេងការ ចាប៉ីដងវែង និងសម្តែងល្ខោនបាសាក់។ រូបថត ហ្វេសប៊ុក
ភ្នំពេញៈ ខណៈមហាជនបានជ្រាបហើយថា លោក ដួង សុខគា គឺជាពិធីករពូកែខាងវោហារស័ព្ទបែបកំប្លុកកំប្លែងស្ងួត និងតារាចម្រៀងចាប៉ីដងវែង ច្រៀងអាយ៉ៃឆ្លើយឆ្លងក៏ជាតារាចម្រៀងប្រពៃណីច្រៀងកាត់សក់នៅពិធីថ្ងៃសិរីមង្គលនានា តែថ្មីៗនេះក៏ស្រាប់តែលេចវត្តមាននៅក្នុងវង់ល្ខោនបាសាក់មួយបង្កការភ្ញាក់ផ្អើលសាជាថ្មី។
ក្នុងឈុតជាតួល្ខោនបាសាក់ លោក ដួង សុខគា ក៏បានបន្លឺសារឡើងថា៖ «ខ្ញុំចង់ គឺខ្ញុំប្រឹង! អរគុណបងៗ (ភីសុគន្ធី) ដែលជួយណែនាំ ទោះខ្ញុំមានកំហុសខ្លះៗ ក៏បងៗនៅតែលើកទឹកចិត្តដដែល! នេះមិនមែនជាអាជីពទេ! សង្ឃឹមថាថ្ងៃក្រោយបងប្អូនអាចកុម្ម៉ង់តួបាន! ខិខិ ពេញចិត្តនឹងការងារនេះណាស់!»។
រំពេចនោះក៏មានការលើកឡើងពីមហាជនភ្លាមថា៖ «អីយ៉ា!តើលោក ដួង សុខគា គ្រាន់តែជាការថតសម្តែងល្ខោនបាសាក់ក្នុងកម្មវិធីទូរទស្សន៍ ឬក៏លោកពិតជាបន្ថែមនូវអាជីពជាតួល្ខោនបាសាក់មួយទៀតមែន?»។
ពិធីករដ៏ល្បីទាំងមានទេពកោសល្យ និងពូកែវោហារស័ព្ទ ដួង សុខគា ក៏តបតទៅនឹងសំណួរពីមហាជនជាអ្នកគាំទ្រលោកខាងលើតាមរយៈការបង្ហើបប្រាប់ភ្នំពេញប៉ុស្តិ៍ឲ្យដឹងពីរឿងលេចវត្តមានក្នុងវង់ល្ខោនបាសាក់ថា៖ «អូ!តាមពិតទៅខ្ញុំពិតជាបានសម្តែងល្ខោនបាសាក់មែនទែនកាលពីរាត្រីម្សិលមិញក្នុងពិធីបុណ្យឆ្លងស្ពានមួយនៅតាមខេត្តក្នុងវង់ល្ខោនភីសុគន្ធី។ ដោយសារគេដឹងថា ខ្ញុំចូលចិត្ត និងស្រឡាញ់វិស័យល្ខោនបាសាក់នេះ ហើយនៅពេលនោះក្រុមគាត់ខ្វះតួសម្តែងប្រុសមួយក៏សួរនាំខ្ញុំឲ្យទៅលេង។ ខ្ញុំក៏ព្រមទៅលេងតែម្តងទៅគឺដើរតួឯកប្រុសផ្នែកជាតួអង្គបែបវ័យចាស់»។
ពិធីករដ៏ល្បីដោយសារមហាជនខ្មែរគាំទ្រច្រើនតាមរយៈទេពកោសល្យនៃការប្រើសូរស័ព្ទពូកែវោហារស័ព្ទ និងមានភាពលេចធ្លោខ្លាំងជាលើកដំបូង នៅក្នុងកម្មវិធីកម្សាន្តទូរទស្សន៍ CTN ឈ្មោះ «សុខគា លក្ខិណា ប៊ីអាយជី» កម្មវិធី «សំណើចតាមភូមិ» កម្មវិធី «ផ្ទះអ្នកតា» និងកម្មវិធីប៉ុស្តិ៍ទូរទស្សន៍ My TV ឈ្មោះថា «ប្តីខ្ញុំខ្លាំង» ចាប់ដៃគូជាមួយពិធីការិនីចាស់វស្សា គង់ សុជាតិ នោះបានបន្តថា៖ «តាមពិតទៅពីមុនមកក៏ខ្ញុំធ្លាប់លេងល្ខោនបាសាក់ដែរ តែដោយសារមួយរយៈក្រោយមកជាប់រវល់តែខាងចម្រៀងប្រពៃណី ពិធីករទូរទស្សន៍ និងវិទ្យុនោះទើបខ្ញុំខានបានលេង។ ព្រោះតែការស្រឡាញ់ចូលចិត្ត នាពេលនេះក៏ចង់សាកឡើងវិញដែរ ប្រសិនបើបងប្អូនពុកម៉ែ គាំទ្រការសម្តែងរបស់ខ្ញុំ ហើយប្រសិនបើមានសំណូមពរចង់ឲ្យរូបខ្ញុំទៅសម្តែងតាមរយៈវង់ល្ខោននានាដូចជា ក្រុមល្ខោនបាសាក់ភីសុគន្ធីក្តី និងតាមក្រុមនាយផ្លយក្តី ឬក្រុមល្ខោនផ្សេងៗទៀតក៏ដោយគឺ ខ្ញុំបាទសប្បាយចិត្តរីករាយ ហើយនឹងឆ្លៀតលៃលកពេលតាមការគួរជាមិនខាននោះឡើយ»។
តារាចម្រៀងប្រុសប្រពៃណី និងពិធីករដ៏ល្បីមានទេពកោសល្យ ពូកែខាងវោហារស័ព្ទលោក ដួង សុខគា ក៏បញ្ជាក់បន្ថែមពីចំណូលចិត្តក្នុងការសម្តែងល្ខោនបាសាក់នេះដែរថា៖ «បាទ!ខ្ញុំក៏មិនហ៊ានអះអាងថារូបខ្ញុំមានភាពទាក់ទាញពីមហាជនរហូតចង់បានវត្តមានខ្ញុំទៅសម្តែងក្នុងវង់ល្ខោននោះទេ! តែប្រសិនបើអាចមែននោះ គឺខ្ញុំពិតជាត្រេកអរទៅនឹងការសម្តែងទម្រង់សិល្បៈបែបបុរាណមួយនេះផងដែរ និងជាការរួមចំណែករក្សាមរតកវប្បធម៌ផង»៕
