ភ្នំពេញៈ ទើបតែផ្អើលរឿងតារាសម្តែងសិចស៊ី កញ្ញា ដេននី ក្វាន់ ដែលបង្ហោះរូបឡានទំនើបថ្មីសន្លាង ១ គ្រឿងដែលទើបទិញម៉ាកឡង់គ្រីស័រពណ៌ខ្មៅស៊េរី ឆ្នាំ ២០១៨ មានតម្លៃក៏មិនក្រោម ២០ ម៉ឺនដុល្លារកាលចុងឆ្នាំមុននោះសោះក៏ស្រាប់តែពេលនាងបង្ហើបរឿងថ្មីបើករបររកស៊ីម៉ូតែលបង្កការភ្ញាក់ផ្អើលសាជាថ្មី។
ការបង្ហើបឲ្យដឹងពីការប្រកបមុខរបររកស៊ីថ្មីសន្លាងនេះត្រូវបានគេដឹងដោយសារតែតារាសម្តែងស្រីសិចស៊ីដែលទើបតែរួចផុតពីការពិន័យក្រសួងវប្បធម៌ និងវិចិត្រសិល្បៈ ១ ឆ្នាំដោយសារតែចំហាយនៃការបង្ហាញភាពសិចស៊ីតាមបណ្តាញសង្គមគឺកញ្ញា ដេននី ក្វាន់ សរសេរប្រាប់បែបដូចជាទើបតែមានកំហឹងនឹងអ្នកណាម្នាក់ដៀលនាងរួចថា៖ «មនុស្សដូចខ្ញុំគេដៀលថាអន់ គេថាខ្ញុំក្រ ត្រូវហើយព្រោះខ្ញុំគ្មានលទ្ធភាពឯណាទៅទិញពេជ្រតម្លៃរាប់ម៉ឺនដុល្លារ ទិញឡាន 570 តម្លៃថ្លៃៗដូចគេទេ សម្រាប់ខ្ញុំគឺមានលទ្ធភាពត្រឹមបើកម៉ូតែលផ្ទាល់ខ្លួននៅខេត្តដែលជាលុយចេញពីកម្លាំងញើសឈាមផ្ទាល់មិនបានទៅពឹងផ្អែកលើនរណាម្នាក់។ សម្រាប់ ដេននី ខ្វាន់ គឺរស់នៅក្នុងភាពជាការពិត មិនមែនក្លែងក្លាយក្រដឹងក្រមានដឹងមានអរគុណសម្រាប់ការមើលងាយ ព្រោះតែពាក្យមើលងាយរបស់អ្នកហ្នឹងហើយដែលធ្វើឲ្យខ្ញុំមានថ្ងៃនេះ!»។
គ្រាន់តែឃើញរូបបណ្តុំរូបថតនៃប្លង់ម៉ូតែលត្រួសៗរបស់កញ្ញា ដេននី ក្វាន់ ភ្លាម ក៏ធ្វើឲ្យមហាជនចូលចិត្តតាមដានពីជីវិតឯកជនតារាស្រីសិចស៊ីរូបនេះ បន្លឺថា៖ «អីយ៉ា!ដេននី ក្វាន់ អស់ពីទិញឡានថ្មីចុងឆ្នាំ ២០១៨ ដើម្បីខ្លួនឯងសោះ ឥឡូវមកថានាងមានលទ្ធភាពបើកម៉ូតែលដោយប្រើលុយផ្ទាល់ខ្លួនទៀត។
តើការបើកមុខរបរថ្មីនេះមិនមានចំណែកចូលរួមពីគូស្នេហ៍របស់នាងគឺលោក ចាន់ មករា ដែលជាម្ចាស់ហាងលក់ឡានឈ្មោះ CMR ទេឬ?»។
ទោះជាយ៉ាងណាការបើករបរថ្មីនោះត្រូវចំណាយអស់ប្រាក់ប៉ុន្មាន និងមានទំហំផ្ទៃដីប៉ុន្មានហិកតា និងប្រើពេលប៉ុន្មានឆ្នាំហើយទើបបានលេចចេញជាគម្រោងបើកមុខរបរមួយនេះឡើងនោះ មិនត្រូវបានបកស្រាយផ្ទាល់ពីតារាសម្តែងស្រី សាច់សខ្ចីល្វក់ ចូលចិត្តបង្ហាញដើមទ្រូងដ៏សិចស៊ីកញ្ញា ដេននី ក្វាន់ ឡើយដោយសារប្រព័ន្ធទូរស័ព្ទរបស់នាង ទូរស័ព្ទចូលតែគ្មានអ្នកលើក។
តែបើតាមការបង្ហើបប្រាប់ខ្លះៗពីគូស្នេហ៍របស់នាងលោក ចាន់ មករា នោះឲ្យដឹងថា៖ «ម៉ូតែលនោះគឺជាការប្រើលុយរបស់គាត់ផ្ទាល់ក្នុងដំណើររកស៊ី ដែលស្ថិតនៅក្នុងខេត្តព្រះវិហារដែលជាស្រុកកំណើតរបស់គាត់ [ដេននី ក្វាន់] តែដោយសារពេលនេះទើបតែដំណើរការបានប្រមាណត្រឹមតែចំនួន ៦០ ភាគរយប៉ុណ្ណោះ យើងសុំមិនទាន់ធ្វើការបរិយាយអ្វីទៅលើរឿងនេះឡើយ សូមចាំទៅដល់ពេលពួកយើងសម្រេចបាននូវគម្រោងការនោះបាន ១០០ ភាគរយសិននឹងជម្រាបប្រាប់គ្រប់រឿងតែម្តងដូចជាការចំណាយប្រាក់អស់ប៉ុន្មានជាដើម»៕