.jpg)
តារាចម្រៀង និងសម្តែងស្រីស្រស់ រ៉េត ស៊ូហ្សាណា បង្ហាញផ្ទះវីឡាដែលខ្លួនខំសន្សំប្រាក់តាំងវ័យ ១៦ ឆ្នាំ។ រូប អុីនស្តាក្រាម, តារាចម្រៀងស្រីវ័យក្មេង ស្រស់សោភា កញ្ញា រ៉េត ស៊ូហ្សាណា។ រូបថត ហុង មិនា
ភ្នំពេញ៖ អតីតបេក្ខនារីប្រឡងកម្មវិធី The Voice Cambodia នារដូវកាលទី២ ឆ្នាំ ២០១៦ កញ្ញា រ៉េត ស៊ូហ្សាណា ស្រីស្រស់វ័យក្មេងសម្រស់កាន់តែស្រស់សោភា កាក់កបនឹងទីផ្សារឡើងច្រៀងឆាកតន្ត្រីតាមខេត្តជាប់យ៉ាងរដឹក មមាញឹកកើបលុយដុំនឹងអាជីពថតស្ប៉តពាណិជ្ជកម្ម និងជាតារាទូតសុច្ឆន្ទៈនៃផលិតផលនានាជាច្រើន បង្កើតភាពភ្ញាក់ផ្អើលដោយបានបង្ហាញផ្ទះវីឡា សាងសង់ជិតរួចជាសមិទ្ធផលក្រោយពីប្រឡូកសិល្បៈកាលពីវ័យ ១៦ ឆ្នាំ។
តារាចម្រៀង និងតារាសម្តែងស្រីនៅផលិតកម្មហង្សមាសកញ្ញា រ៉េត ស៊ូហ្សាណា ដែលមានរូបសម្ផស្សកាន់តែស្រស់ស្អាត រាងស្រឡូនជាងមុន ដែលជាអតីតជាសិស្សរៀននៅសាលាអន្តរជាតិសិង្ហបុរី (SIS) និងជាកូនក្រុមរបស់ ឱក សុគន្ធកញ្ញា ជាគ្រូបង្វឹកនៃកម្មវិធី The Voice Cambodia រដូវកាលទី២ គ្រាន់តែចូលដល់ឆ្នាំថ្មី ២០២១ រំលងបានប៉ុន្មានថ្ងៃសោះ ក៏បង្ហោះសារតាមអ៊ីនស្តាក្រាមថា៖ «ម៉ាក់ប៉ាប្រាប់ថា កូនខំឱ្យហើយទៅ ទាន់នៅក្មេងក្រែងចាស់ទៅសំណាង! ការខិតខំតាំងពីអាយុ ១៦ ឆ្នាំ រហូតដល់ពេលនេះ បានចេញជារូបរាងបណ្ដើរហើយ! See you soon in 2021 baby!»។
គ្រាន់តែឃើញសារបង្ហោះរូបផ្ទះ ២ ជង់ មានកម្ពស់ ២ ជាន់ របស់តារាកញ្ញា រ៉េត ស៊ូហ្សាណា មិនត្រឹមតែមហាជនជាអ្នកគាំទ្រទេ ដែលផ្ទុះការកោតសរសើរដោយភ្ញាក់ផ្អើល សូម្បីតែអ្នកសិល្បៈដូចគ្នា ក៏លាន់មាត់សរសើរដែរ ចំពោះសមិទ្ធផល ដែលតារាចម្រៀងស្រីវ័យ ២០ ឆ្នាំ ជាតារាចម្រៀងប្រចាំផលិតកម្មហង្សមាសរូបនេះ។
ប្រិយមិត្តអ្នកគាំទ្របានកោតសរសើរថា៖ «អ៊ីយ៉ា! មិននឹកស្មានថា ស្រីស្រស់វ័យក្មេង ជាតារាចម្រៀង និងសម្តែងរលកក្រោយ រ៉េត ស៊ូហ្សាណា អាចសន្សំបានប្រាក់ពីសិល្បៈប្រមាណ ៣-៤ ឆ្នាំ សោះ ទិញផ្ទះវីឡា ២ ជង់ កម្ពស់ ២ ជាន់បាន!»។
ខណៈសូម្បីតែតារាសម្តែងស្រីស្អាត កញ្ញា ស៊ីន យូប៊ីន ក៏បានលាន់មាត់សរសើរកញ្ញា រ៉េត ស៊ូហ្សាណា ភ្លាមដែរថា៖ «អូនជាក្មេងដែលពូកែ និង talented ជូនពរឱ្យជោគជ័យអូន!»។
ចំពោះផ្ទះ ២ ជង់ កម្ពស់ ២ ជាន់ ដែលបង្ហាញក្នុងរូប អមដោយសារនោះថា ជាប្រាក់បានពីកម្លាំងញើសឈាមក្នុងអាជីពសិល្បៈខ្លួន បានសន្សំតាំងពីមានវ័យ ១៦ ឆ្នាំ ទាំងអស់ ឬក៏មានការចូលរួមពីប៉ាម៉ាក់របស់កញ្ញា ឬយ៉ាងណានោះទេ ខាង ភ្នំពេញ ប៉ុស្តិ៍ ក៏មិនអាចទទួលបានការបកស្រាយបន្ថែមពីកញ្ញា រ៉េត ស៊ូហ្សាណា ឡើយ ដោយប្រព័ន្ធទូរស័ព្ទធ្លាប់ទំនាក់ទំនងចូលពីមុននោះ នាពេលនេះពុំអាចទាក់ទងបាន។
គួរបញ្ជាក់ថា ទោះបីជាទើបតែបានចូលប្រឡូកសិល្បៈចម្រៀងមែនក្តី តែតារាចម្រៀងស្រីរលកក្រោយ កញ្ញា រ៉េត ស៊ូហ្សណា ស្រូបបានប្រជាប្រិយភាពពីមហាជនយ៉ាងរហ័ស និងកំពុងតែកាក់កបរកលុយបានច្រើន ដោយក្តោបបានយ៉ាងណែននូវតំណែងជាទូតសុច្ឆន្ទៈនៃផលិតផលនានាដូចជាក្រុមហ៊ុនទូរស័ព្ទ Cellcard ក្រុមហ៊ុនទូរស័ព្ទ OPPO ក្រុមហ៊ុន Charles & Keith ជាដើម៕
