ភ្នំពេញ៖ ថ្មីៗនេះ ស្រាប់តែបង្កើតភាពភ្ញាក់ផ្អើលពីមជ្ឈដ្ឋានមហាជន ដោយស្ងាត់ៗ តារាចម្រៀងស្រី ល្បីឈ្មោះជ្រកនៅទ្រនំហង្សមាសកញ្ញា វី ឌីណែត ដែលត្រូវជាកូនស្រីសំណព្វចិត្តរបស់តារាចម្រៀងជើងចាស់សំឡេងស្អកលោក ហួរ ឡាវី បង្ហាញរូបភាពស្និទ្ធនឹងបុរសកំបាំងមុខម្នាក់ តាមបណ្តាញសង្គម។
តារាចម្រៀងស្រីវ័យ ២៤ ឆ្នាំ ដែលជារឿយៗ មិនធ្លាប់លេចឮដំណឹងមានគូស្នេហ៍ ស្រាប់តែថ្មីៗនេះបង្ហាញរូបភាពកៀកកើយ តែមិនបង្ហាញមុខពិត ធ្វើឲ្យមានការចាប់អារម្មណ៍យ៉ាងខ្លាំងពីអ្នកប្រើប្រាស់បណ្តាញសង្គមជាពិសេស ជាមួយនឹងសារជាភាសាអង់គ្លេស ១ ឃ្លា ដែលសម្រួលជាភាសាខ្មែរថា៖ «អរគុណ ដែលបងតែងតែនៅក្បែរអូនរហូតមក!»។
ក្រៅពីការចុច Like មានរូបបេះដូង ដែលតំណាងភាពត្រេកអរ ស្រឡាញ់នឹងអ្នកទាំង ២ យ៉ាងច្រើននោះ ក៏មានអ្នកបញ្ចេញវាចារ ចោទសួរ ដេញដោលចំពោះម្ចាស់រូបខាងប្រុសដែរថា៖ «អីយ៉ា! បងណែត! ប្រហែលជិតបានដំណឹងល្អហើយ! សូមមើលមុខតិចមើល៍ តើជាអ្នកណាគេដែរ?»។
តែយ៉ាងណាបុរស ដែលកំពុងត្រូវបានតារាចម្រៀងស្រីកញ្ញា វី ឌីណែត ព្រមទទួលក្តីស្រឡាញ់នោះ នៅមិនទាន់ដឹងច្បាស់ថាជាអ្នកណាដដែល ដោយស្រីស្រស់កូនស្រីបណ្តូលចិត្តលោក ហួរ ឡាវី មិនទាន់ហ៊ានបង្ហើបប្រាប់នៅឡើយទេ ទោះបីជាមានអ្នកគាំទ្រទទូចសួររកមុខពិតយ៉ាងណាក្តី ខណៈភ្នំពេញ ប៉ុស្តិ៍ ក៏មិនអាចសុំបានការបកស្រាយលម្អិតពីកញ្ញាផងដែរតាមប្រព័ន្ធទូរស័ព្ទ ព្រោះមិនអាចទំនាក់ទំនងបាន។
ក្រៅពីមានសមត្ថភាព និងមានទេពកោសល្យផ្នែកចម្រៀង និងសម្ដែងហើយកញ្ញា វី ឌីណែត ក៏ជាតារាចម្រៀងពន្លកថ្មីម្នាក់ដែលពូកែរកនឹកស្ទីលស្លៀកពាក់ និងម៉ូដសក់ប្លែកៗគួរឲ្យកត់សម្គាល់នាពេលបង្ហាញខ្លួនលើឆាកតន្រ្តីម្តងៗ ដោយកញ្ញាមិនត្រាប់តាមការតុបតែងខ្លួនរបស់តារាដទៃ នៅថ្មីៗនេះ ឌីណែត បានបង្ហាញខ្លួនយ៉ាងលេចធ្លោនៅក្នុងឈុតសម្លៀកបំពាក់បែបប្រពៃណី ឥណ្ឌា ដែលពិតស្រស់ស្អាត និងទាក់ទាញទៀតផង។
តាមការកត់សម្គាល់សម្រាប់ជំនាន់ក្រោយលោក ហួរ ឡាវី ក្នុងសិល្បៈកញ្ញា វី ឌីណែត កំពុងតែបោះជំហានយ៉ាងរលូនលើអាជីពចម្រៀងរបស់ខ្លួនតែប៉ុណ្ណោះទេ នាពេលថ្មីៗនេះ កញ្ញា វីឌីណែត ក៏បានវិវឌ្ឍក្លាយជាតារាសម្ដែងមួយទៀត ក្រោយពីទូរទស្សន៍ហង្សមាសបានជ្រើសរើសនាងឲ្យដើរតួឯកក្នុងភាពយន្តភាគថ្មីមួយ ជាមួយនឹងតារាចម្រៀងប្រុសលោក នី រតនា គឺរឿង «រាជបុត្រកង្កែប» ទោះបីជាតារាចម្រៀងស្រីរូបស្រស់រូបនេះ មិនទាន់ក្ដាប់តំណែងជាគណៈកម្មការក្នុងកម្មវិធីលំដាប់ពិភពលោកដូចជា តារាស្រីរៀមច្បងរួមទ្រនំមាន អ្នកនាង ឱក សុគន្ធកញ្ញា អ្នកនាង សុខ ស្រីនាង កញ្ញា សុខ សីឡាលីន កញ្ញា សួស វីហ្សា និងអ្នកនាង ពេជ្រ សោភា ជាដើម៕