.jpg)
ស្ងាត់ៗ ស្រាប់តែ សាឡាត់ ស្រីឡាង បង្ហើរសារបែបសោកសៅខកចិត្តនឹងរឿងស្នេហា។ រូបថត ហ្វេសប៊ុក
ភ្នំពេញ៖ មហាជនទើបភ្ញាក់ផ្អើលនឹងបណ្តុំរូបថតដ៏ផ្អែមល្ហែមជាគូស្នេហ៍យល់ចិត្តយល់ថ្លើមគ្នា រវាងតារាសម្តែងស្រីរាងខ្ពស់កញ្ញា សាឡាត់ ស្រីឡាង និងបុរសម្នាក់ល្បីឈ្មោះរឿងធ្វើសកម្មភាពជួយសង្គមឈ្មោះលោក សាន ដារ៉ាវីត ខណៈមជ្ឈដ្ឋានក្រៅហៅ «ក្រុមយុវជនសំរាម» នោះ ឥឡូវនេះស្រាប់តែនាងមកបង្ហើរសារហាក់មានការខូចចិត្តខ្លាំង នឹងរឿងស្នេហាអ៊ីចឹង។
ផ្ទៃមេឃក៏ប្រែពណ៌មកស៊ីជម្ពូវិញ ក្រោយពីមានទំនាក់ទំនងស្នេហ៍ នឹងបុរសល្បីឈ្មោះ រឿងធ្វើសកម្មភាពជួយសង្គមលោក សាន ដារ៉ាវីត ដែលមជ្ឈដ្ឋានខាងក្រៅហៅរហស្សនាមគាត់ថា យុវជនសំរាមមកនោះ ខណៈកញ្ញា សាឡាត់ ស្រីឡាង ហាក់ស្ងាត់ទីផ្សារថតកុន តែមកសកម្មនឹងការងារជួយសង្គម ដូចជាការយកសម្ភារសិក្សាចែកសិស្សក្រីក្រនៅឯតំបន់ដាច់ស្រយាលជាកុមាររងគ្រោះ និងជនពិការ។
នារយៈពេលប៉ុន្មានខែ នាដើមឆ្នាំ ២០២០ នេះ គេឃើញបណ្តុំរូបភាពដើរលេងតែ ២ នាក់ ប្រកបដោយសេចក្តីសុខខ្លាំង ដែលភាគច្រើនបានទៅលម្ហែកាយ នៅតំបន់សមុទ្រនោះ តារាស្រីវ័យ ២៥ ឆ្នាំ សាឡាត់ ស្រីឡាង ក៏បានបង្ហោះសារជាហូរហែ និងវែងអន្លាយថា៖ «ចេះប្រើពេល ទើបជីវិតមានន័យ។ អង្គុយមើលសមុទ្រ ជិះទូក ស្ទូចត្រី ស្តាប់សំឡេងទឹកភ្លៀងជាក្តីសុខ ដែលមនុស្ស ២ នាក់ ចេះចែករំលែកឲ្យគ្នា។ មិនត្រូវការពេលពេញម៉ោង របស់នរណាម្នាក់មកក្បែរខ្លួនទេ គេមានពេលរវល់របស់គេ ខ្ញុំក៏ត្រូវការពេលវេលារបស់ខ្ញុំ តែអ្វីដែលសំខាន់យើងបានចែកពេលខ្លះឲ្យគ្នា ដើម្បីចាក់បំពេញស្នាមញញឹម និងផ្តល់ភាពកក់ក្តៅឲ្យគ្នា»។
តែថ្មីៗនេះ ស្រាប់តែគេឃើញតារាសម្តែងស្រី ដែលផ្តើមភាពល្បីមហាជនស្គាល់នៅក្នុងកុនដំបូងរឿង «ខ្មោចអាសង្ហា» កញ្ញា សាឡាត់ ស្រីឡាង បែរជាមកបង្ហោះសារបែបសោកសៅនៅក្នុងចិត្តថា៖ «ចាយពេលវេលាខុសអស់ជាច្រើនឆ្នាំខ្ញុំបានបោះបង់ពេលវេលាការងារ ដើម្បីនៅក្បែរមនុស្សដែលខ្ញុំស្រឡាញ់ (មនុស្សប្រុសម្នាក់នោះ) ចុងក្រោយសល់ត្រឹមការឈឺចាប់ ខ្ញុំបានបោះពេលវេលាដែលធ្វើការបានលុយច្រើនទៅជួយការងារមិត្តភក្តិដោយប្រើកម្លាំង និងបេះដូងរបស់ខ្ញុំទៅទាំងស្រុងតែអ្វី ដែលខ្ញុំទទួលបានគឺការបំផ្លាញទឹកចិត្តមួយដែលពិបាកនឹងនិយាយខ្ញុំបានចំណាយពេលវេលារបស់ខ្ញុំទៅធ្វើការងារមួយ ដែលខំប្រឹងធ្វើនៅពេលដែលបានល្អហើយគេក៏ឈប់ទទួលទាំងមិនប្រាប់អ្វីទាំងអស់នៅពេលដែលដាក់ចិត្តថាស្រឡាញ់ គឺបានមកវិញតែការឈឺចាប់តែប៉ុណ្ណោះ។ ខ្ញុំជាមនុស្សខ្ញុំមានសាច់ក្នុងខ្លួនខ្ញុំក៏មានឈាមវាក៏ចេះឈឺក្នុងភ្នែករបស់ខ្ញុំ ក៏មានទឹកពេលវាហូរម្ដងៗ គឺពិបាកណាស់ Hmmm គ្រប់យ៉ាងខ្ញុំអ្នករើសខ្ញុំទទួល តែខ្ញុំក៏នឹងមិនទទួលឲ្យខ្លួនឯងឈឺចាប់ម្ដងទៀតឡើយ»។
មុនពេលមានទំនាក់ទំនងនឹងបុរសល្បីជា «ក្រុមយុវជនសំរាម» កញ្ញា សាឡាត់ ស្រីឡាង ក៏ធ្លាប់ល្បីរឿងបែកធ្លាយមានទំនាក់ទំនងស្នេហានឹងលោក លៀក លីដា ជាម្ចាស់ផលិតកម្ម LD ដែរ ដោយត្រូវភរិយាលោកមានគណនីហ្វេសប៊ុកឈ្មោះ «Panhchaka June» បង្ហោះសាររៀបរាប់ពីការផិតក្បត់របស់ស្វាមីខ្លួន ជាមួយនឹងតារាស្រី សាឡាត់ ស្រីឡាង៕
