.jpg)
កន្ទុយក្ងោកបើកត្រដាងរំលេចភ្លើងពណ៌ និងហ្វារ ដែលរចនាឡើងដោយអ្នកឌីហ្សាញ និងស្ថាបត្យករខ្មែរ។ ហុង មិនា
ក្រុងសៀមរាប: វេលាសុរិយាផ្ដើមអស្ដង្គត ជំនួសដោយស្បៃរាត្រីលើវេហាហ៍ពន្លឺភ្លើងហ្វារពណ៌សផ្ដើមរេរាឆ្លុះមេឃា ចេញពីដំបូលអគារ ដែលរចនាអំពូលភ្លើងមូលៗបីដូចជាដួងខែរាប់រយ។ នៅទីនេះ បារ៍កន្ទុយក្ងោកអន្ទងចិត្ដភ្ញៀវឲ្យមក ទស្សនាទិដ្ឋភាពទីក្រុងនាពេលរាត្រី និងភ្លក្សភេសជ្ជៈ ក្រោមជំនោរត្រជាក់លើអាកាសវេហាស៍។
អំពូលភ្លើងក្រហមផ្កាឈូកនៅចុងរោមស្លាបនីមួយៗ ឆ្លុះពន្លឺពណ៌បៃតង រំលេចរូបរាងកន្ទុយក្ងោកត្រដាងយ៉ាងធំចេញពីបង្គោលស្នូល ជាទីកន្លែងដែលមានការតាំងដបស្រាជារង្វង់ថ្នាក់ៗ គ្របលើតុបារ៍ និងតុភ្ញៀវអង្គុយទទួលទានភេសជ្ជៈក្រឡុក គ្រឿងក្លែមជាច្រើនប្រភេទ។
វីដេអូ៖
កន្ទុយក្ងោក សង់ឡើងពីដែក ក្រោមស្នាដៃអ្នកឌីហ្សាញខ្មែរទទួលបានការស្ញប់ស្ញែងពីអតិថិជនគ្រប់រូបចំពោះភាពប៉ិនប្រសប់ក្នុងការរចនាម៉ូដ Sky Bar ដ៏គួរឲ្យទាក់ទាញនេះ។
ភេសជ្ជៈ Five Color Syringe មានតម្លៃ ៨ ដុល្លារ។ ហុង មិនា
លោក តោ សីហា ម្ចាស់ The Moon Sky Bar ស្ថិតនៅដំបូលអគារ Asia Plaza ជាន់ទី ៤ លើវិថីព្រះសង្ឃរាជទេពវង្ស ក្រុងសៀមរាបបាននិយាយថា៖ «អ្នកឌីហ្សាញជនជាតិខ្មែរ ដែលគាត់រស់នៅស្រុកពួកនេះឯង បានដាក់គម្រោងរចនាប័ទ្ម ២-៣ ឲ្យខ្ញុំជ្រើសរើស ហើយខ្ញុំក៏ចាប់អារម្មណ៍នឹងម៉ូដកន្ទុយក្ងោកនេះដើម្បីធ្វើជាសំណង់ Sky Bar នេះ»។
ដោយចាប់អារម្មណ៍អំពីម៉ូដកន្ទុយក្ងោក ច្នៃពីដែកដែលក្រុមការងារត្រូវការពេលវេលា និងភាពអត់ធ្មត់ខ្ពស់ ម្ចាស់បារ៍លើអាកាសរូបនេះ បានបញ្ជាក់ថា៖ «នេះជាស្នាដៃរបស់ខ្មែរយើង ទាំងអ្នកឌីហ្សាញក៏ខ្មែរ និងអ្នកសាងសង់ក៏ជាខ្មែរ»។
លោកប្រាប់ថា៖ «ស្ថិតនៅកណ្ដាលបេះដូងក្រុងសៀមរាបនេះ បើមានការ-ឌីហ្សាញណាស្អាត វាក៏ធ្វើឲ្យទីក្រុងយើងមានភាពស្រស់ស្អាតផងដែរ»។
នៅបរិវេណដ៏ធំទូលាយ ដែលត្រូវបានបែងចែកជាថ្នាក់ ៣ ជាន់ និងមានប្រភេទតុខ្ពស់ តុទាបកៅអីផ្អែក និងតុទាបកៅអីពោងខ្យល់ដ៏ទន់ល្មើយ ភ្ញៀវអាចអង្គុយស្ដាប់អ្នកចម្រៀងដើរច្រៀងនៅជិតបង្កើយនឹងវត្ដមានរបស់ភ្ញៀវដ៏ពីរោះរណ្ដំ និងមិនរំខានដល់ការជជែកគ្នាលេងឡើយ។
ម្ហូបដ៏ពេញនិយម ឆ្អឹងជំនីរកូនចៀម តម្លៃ ១២,៥ ដុល្លារ។ ហុង មិនា
Sky Bar ម៉ូដកន្ទុយក្ងោកកណ្ដាលក្រុងនេះ មិនត្រឹមតែមានភេសជ្ជៈស្រាក្រឡុកពេញនិយម Pretty Moon រំលេចពណ៌បៃតងក្នុងបំពង់កែវវែងចំណុះ ៣ លីត្រ មានតម្លៃ ២៥ ដុល្លារនិង Five Color Syringe តម្លៃ ៨ ដុល្លារប៉ុណ្ណោះទេ តែវាក៏សម្បូរទៅដោយម្ហូបអាហារចាប់ពីម្ហូបខ្មែរ ចិន និងអឺរ៉ុប ដែលចម្អិនចេញពីផ្ទះបាយភោជនីយដ្ឋាននៅជាន់ទី ២។
លោក សីហា បានឲ្យដឹងថា៖ «នៅទីនេះ អតិថិជនកោតសរសើរចំពោះរសជាតិ Lamb Chop (ឆ្អឹងជំនីរ កូនចៀម តម្លៃ ១២,៥០ ដុល្លារ) ធូរថ្លៃ និងមានរសជាតិឆ្ងាញ់»។
នៅមិនឆ្ងាយពីតំបន់កម្សាន្ដផ្សាររាត្រី ផាប់ស្ទ្រីត The Moon Sky Bar បើកពីម៉ោង ៥ ល្ងាចដល់ម៉ោង ២ រំលងអាធ្រាត្រ ទូរស័ព្ទ ០១៧ ៩៩៩ ០២៣៕
