.jpg)
ស៊ីណុន ឡូរ៉េស្កា និងសិស្សសាលាជ្រោយចង្វារ។ ហ្វេសប៊ុក
ភ្នំពេញ: រាងកាយពោរពេញដោយសាច់ដុំ ដើមទ្រូងដុះរោម តែដំណើរល្វតល្វន់ជាងនារីភេទទៅទៀតនោះ ស្ដេចដើរម៉ូដហ្វីលីពីន ស៊ីណុន ឡូរ៉េស្កា (Sinon Loresca) មានអ្នកគាំទ្រមកពីគ្រប់ទិសទីក្នុងពិភពលោក ពិសេសក្នុងទ្វីបអាស៊ី ដោយសារតែទេពកោសល្យជាម៉ូដែល និងទង្វើសប្បុរសធម៌ជាច្រើននាពេលកន្លងមក។
ដំណើរមកដល់ទឹកដីកម្ពុជា កាលពីថ្ងៃទី ១៨ ខែឧសភា ឆ្នាំ ២០១៨ របស់ស្ដេចដើរម៉ូដ (King of Catwalk) សម្បុរស្រអែម សាច់ដុំធំៗ តែកាយវិការទន់ភ្លន់មិនចាញ់មនុស្សស្រីនោះ បានទាក់ទាញអ្នកគាំទ្រខ្មែរតាំងពីនៅអាកាសយានដ្ឋាន រហូតដល់ឆាកបង្ហាញម៉ូដ នៃកម្មវិធីសម្ពោធក្រុមហ៊ុន Arise Agency Entertainment នៅសណ្ឋាគារណាហ្គាវើល នាថ្ងៃទី ២០ ខែឧសភា។
ក្នុងនាមជាអ្នកផ្ដល់ប្រឹក្សាដល់បេក្ខភាពបវរកញ្ញាកម្ពុជា តារាទូរទស្សន៍ភេទទី ៣ ស៊ីណុន ឡូរ៉េស្កា បាននិយាយថា៖ «សម្រស់របស់នារីខ្មែរពិតជាស្រស់ស្អាតមែន ដោយស្នាមញញឹមស្រស់ស្រាយ ហើយម្យ៉ាងទៀតគឺភាពរួសរាយទាក់ទាក់»។
ស្ដេចដើរម៉ូដវ័យ ២៩ ឆ្នាំរូបនេះបានផ្ដល់យោបល់ដល់បេក្ខភាពរាជិនីសម្រស់ខ្មែរទាំងអស់ថា៖ «ខ្ញុំចង់ឲ្យនារីទាំងអស់នៅខាងមុខនេះ ឲ្យមានភាពជឿជាក់លើខ្លួនឯងក្នុងការធ្វើអ្វីមួយ។ ការជឿជាក់នោះជំរុញឲ្យក្ដីសុបិនរបស់យើងនឹងក្លាយជាការពិតនៅថ្ងៃណាមួយ។ ឧទាហរណ៍ដូចជារូបខ្ញុំនេះ ដែលខ្ញុំតែងតែស្រមៃក្លាយជាបវរកញ្ញា ឬក៏តារាម៉ូដែលនៅលើឆាកដ៏ធំមួយ។ ក៏ប៉ុន្តែដោយសារតែខ្លួនខ្ញុំមានរាងកាយជាប្រុស អ៊ីចឹងឪពុកម្ដាយគឺហាមឃាត់មិនឲ្យធ្វើសកម្មភាពជាស្រីទេ ព្រោះពួកគាត់ចង់ឲ្យកូនប្រុសគាត់មានប្រពន្ធមានកូន ធ្វើការជាបុរសពិត។ យ៉ាងណាក្ដីស្រមៃរបស់ខ្ញុំនេះនៅតែបានសម្រេច ដោយសារតែខ្ញុំពុះពារ ធ្វើឲ្យឪពុកម្ដាយខ្ញុំឃើញថាខ្ញុំអាចធ្វើបាន ល្បីដូចបច្ចុប្បន្ននេះ»។
ក្នុងដំណើរមកប្រទេសកម្ពុជាជាលើកដំបូង ស្ដេចដើរម៉ូដហ្វីលីពីន ក៏មិនរំលងសកម្មភាពមនុស្សធម៌ ដែលលោកតែងតែធ្វើតាំងពីនៅទឹកដីកំណើតរបស់ខ្លួន នៅប្រទេសហ្វីលីពីន ដូចជា ការចែកចំណីអាហារដល់ក្មេងរើសសំរាម និងចាស់ជរារស់នៅតាមផ្លូវគ្មានផ្ទះសំបែង។
ក្រៅពីធ្វើទានដល់ជនទុរគត ស៊ីណុន ឡូរ៉េស្កា ក៏មិនភ្លេចឡើយនូវការសម្ដែងបង្ហាញម៉ូដ និងកាយវិការកំប្លុកកំប្លែង ដើម្បីផ្ដល់ភាពរីករាយដល់អ្នកទាំងអស់នោះផងដែរ។
ដូចគ្នានេះ នៅប្រទេសកម្ពុជា ស៊ីណុន ឡូរ៉េស្កា បានឆ្លៀតឱកាសចូលរួមកម្មវិធីមនុស្សធម៌នៅសាលាបឋមសិក្សាជ្រោយចង្វារ ជាមួយបវរកញ្ញាចក្រវាឡកម្ពុជា និងកញ្ញាឯកដទៃទៀត ដោយការចែកសម្ភារសិក្សា និងចំណីអាហារដល់សិស្សានុសិស្ស។
ដំណើរមកដល់ចំរដូវកាលនៃទិវាឥន្ទធនូ ស្ដេចដើរម៉ូដ ស៊ីណុន ឡូរ៉េស្កា ក៏បានចូលរួមក្នុងកម្មវិធីរបស់សហគមន៍ស្រឡាញ់ភេទដូចគ្នា (LGBT) នៅភ្នំពេញផងដែរ។
គួររំឭកថាតារាសាច់ដុំធំ រោមពេញទ្រូង និងពូកែចំទើតលើស្បែកជើងកែងខ្ពស់ៗ ស៊ីណុន ឡូរ៉េស្កា បានទទួលភាពល្បីល្បាញ នៅពេលដែលប្រទេសហ្វីលីពីនត្រូវបានជ្រើសរើសជាម្ចាស់ផ្ទះរៀបចំព្រឹត្តិការណ៍រាជិនីសម្រស់ បវរកញ្ញាចក្រវាឡ ឆ្នាំ ២០១៦ ដោយពេលនោះ លោកបានថតវីដេអូស្លៀកតែខោទ្រនាប់នារី ហើយពាក់ស្បែកជើងកែងចោតដើរហាត់ប្រាណ ហើយវីដេអូនោះមានអ្នកទស្សនាជិត ៣ លាននាក់។ លោកតែងផលិតវីដេអូដើរម៉ូដថ្មីៗ ទាក់ទាញអ្នកទស្សនាកើនឡើងរហូត។
យ៉ាងណាមិញ តារាភេទទី ៣ ដែលមានចរិតម្ញ៊ិកម្ញ៉ក់ផ្ទុយពីមាឌដ៏ធំមាំបែបបុរសភេទនោះ ក៏តែងតែរងនូវការរិះគន់ជារឿយៗ ប៉ុន្តែលោកតែងឆ្លើយតបវិញថា៖ «មនុស្សមានសិទ្ធិបញ្ចេញមតិទៅតាមការគិតរបស់គេបាន គឺដូចជាខ្ញុំដែលមានសិទ្ធិ ធ្វើអ្វីទៅតាមការស្រឡាញ់របស់ខ្ញុំដែរ»៕
