.jpg)
រូបភាពផ្សព្វផ្សាយពីពិធីបុណ្យស្ត្រីនិយមដំបូងបង្អស់នៅកម្ពុជា។ រូបថត សហការី
ភ្នំពេញ: ស្ដ្រីខ្មែរ និងបរទេសមួយក្រុមបានស្រាក់ដៃគ្នាប្រារឰពិធីបុណ្យស្ដ្រីនិយមភ្នំពេញ (PFF) នៅកម្ពុជាជាលើកដំបូង។ ជាមួយសកម្មភាពសិល្បៈច្រើនហូរហែ បុណ្យរយៈពេល ៣ ថ្ងៃដែលចាប់ផ្ដើមពីល្ងាចថ្ងៃសុក្រនេះ នឹងត្រូវបានរៀបចំឡើងនៅ Chinese House រាជធានីភ្នំពេញក្នុងបំណងលើកតម្កើងសេរីភាពស្ដ្រីនៅកម្ពុជាក៏ដូចជាបង្កើតសុន្ទរកថាវិជ្ជមានពីសិទ្ធិស្ដ្រី និងសមភាពយេនឌ័រ។
ប្រាក់ចំណូលទាំងអស់ពីការលក់សំបុត្រល្ខោនរឿង «Vagina Monologues» ដែលសម្ដែងដោយអង្គការមិនរកប្រាក់ចំណេញ Phnom Penh Players នឹងប្រគល់ជូនដល់កម្មវិធី «Early Years Behind Bars» របស់អង្គការលីកាដូ ដែលជួយដល់ស្ដ្រី អ្នកម្ដាយ និងកុមារក្នុងពន្ធនាគារ។
«Vagina Monologues» ដែលជាល្ខោនរបស់អ្នកនិពន្ធ Eve Ensler ស្ដីពីរឿងរ៉ាវអាថ៌កំបាំង កំប្លុកកំប្លែង ការឈឺចាប់ អំណាច សេរីភាព កំហឹង និងក្ដីរំភើបរីករាយរបស់ស្ដ្រីនឹងក្លាយជាចំណុចស្នូលក្នុងពិធីបុណ្យនេះ។ ការសម្ដែងដែលត្រូវបានចាត់ទុកជាសសរស្ដម្ភស្ដ្រីនិយមត្រូវបានបកប្រែជា ៤៦ ភាសាហើយពេលនេះល្ខោននិយាយ ២ រឿងនឹងត្រូវបានបង្ហាញជាភាសាខ្មែរផងដែរ។
កញ្ញា សោណា អូ ម៉ាហូនី ជាអ្នករៀបចំ PFF ម្នាក់ដែលផ្ដួចផ្ដើមគំនិតរៀបចំព្រឹត្ដិការណ៍នេះតាំងពីខែវិច្ឆិកាបាននិយាយថា៖ «យើងបានបកប្រែល្ខោននិយាយ ២ ភាគជាភាសាខ្មែរជាលើកដំបូង ហើយនឹងសម្ដែងដោយសិល្បករជាតិទាំងអស់។ នៅថ្ងៃសៅរ៍ទី ១៦ នឹងមានការបង្ហាញពីរឿងល្ខោននិយាយ ការបញ្ចូលសម្ដែង សិក្ខាសាលា គំនូរគូរភ្លាមៗ ស្ដ្រី របាំ ពិព័រណ៍សិល្បៈ និងភាពយន្ដ»។
ដើម្បីឲ្យពិធីបុណ្យស្ដ្រីនិយមនេះបើកទូលាយដល់សាធារណជន តែពិសេសសម្រាប់ពលរដ្ឋខ្មែរ វាពិតជាសំខាន់ណាស់ដែលវាជាឱកាសចូលរួមដោយឥតគិតថ្លៃ។ កម្មវិធីទាំងអស់ក្នុងពិធីបុណ្យនឹងមិនគិតប្រាក់ទាំងអស់ លើកលែងតែការសម្ដែងល្ខោននិយាយ Vagina Monologues ដែលលក់សំបុត្រម្នាក់ ១០ ដុល្លារសម្រាប់ឧបត្ថម្ភដល់អង្គការ។
កញ្ញាបានបន្ដថា៖ «យើងមានជំនឿចិត្ដថា បុណ្យស្ដ្រីនិយមដំបូងនេះនឹងទាក់ទាញភ្ញៀវ ១ ពាន់នាក់ ហើយការផ្សព្វផ្សាយនឹងអាចទៅដល់មនុស្សជាង ១ ម៉ឺននាក់នៅកម្ពុជា»។
ជាផ្នែកមួយនៃយុទ្ធនាការចលនាសកម្មជនទូទាំងសកលលោក V-Day ដែលប្រារឰឡើងស្របទិវានៃក្ដីស្រឡាញ់ បំណងដើម្បីបញ្ចប់ហិង្សាលើស្ដ្រី និងកុមារីក្រោមគំនិតផ្ដួចផ្ដើមរបស់កវី Eve Ensler ស្ដ្រីខ្មែរនឹងត្រូវបានលើកទឹកចិត្ដឲ្យធ្វើបទបង្ហាញពីបទពិសោធខ្លួនឯងដែលបានជួបអំពើហិង្សា និងការជាប់ឃុំឃាំងនៅចុងបញ្ចប់នៃការសម្ដែង។
កញ្ញាបានបន្ដថា៖ «ដោយសារវាស្របពេលនឹងទិវានៃក្ដីស្រឡាញ់ យើងនឹងធ្វើយុទ្ធនាការផ្សព្វផ្សាយលើកស្ទួយសិទ្ធិស្ដ្រី និងការឯកភាពរួមភេទដោយការចែកចាយប៉េងប៉ោងរូបបេះដូង ១០០០ ជាមួយ PFF ឡូហ្គោ ព្រមទាំងព័ត៌មានលម្អិតអំពីពិធីបុណ្យ។ វានឹងក្លាយជាផ្នែកសំខាន់នៃយុទ្ធនាការនៅបណ្ដាញផ្សព្វផ្សាយទៅដល់បុគ្គលមានឥទ្ធិពល និងតារាល្បីៗដែលបង្ហោះលើបណ្ដាញសង្គមបន្ដពីរូបភាពប៉េងប៉ោងទាំងនេះ»។
អ្នករៀបចំព្រឹត្ដិការណ៍រូបនេះបានបន្ថែមថា៖ «V-Day ឆ្នាំនេះ ដែលត្រូវបានបង្កើតឡើងដើម្បីធ្វើការជាមួយស្ដ្រីធ្លាប់ជាប់ពន្ធនាគារ និងសកម្មជននានានឹងផ្ដោតលើស្ដ្រីជាប់ឃុំ និងឃាត់ខ្លួនបណ្ដោះអាសន្ន»។
ចលនា V-Day នឹងអាចបំបាត់ផ្នត់គំនិតរំលោភបំពានផ្លូវភេទ និងបំបែកភាពស្ងៀមស្ងាត់ជុំវិញរឿងរ៉ាវអំពើហិង្សាលើស្ដ្រី និងកុមារី។ ដោយមានការប្រើប្រាស់ភាសាអសុរោះអំពីបញ្ហាផ្លូវភេទ អ្នករៀបចំព្រឹត្ដិការណ៍ក៏បានណែនាំឲ្យអ្នកចូលរួមមានអាយុយ៉ាងតិច ១៦ ឆ្នាំឡើង។
Phnom Fem Fest (PFF) នឹងចាប់ផ្ដើមនៅថ្ងៃសុក្រនេះម៉ោង ៧ យប់នៅថ្ងៃសៅរ៍ ម៉ោង ៥ ល្ងាច និងថ្ងៃអាទិត្យ ម៉ោង ៧ យប់ ឯ Chinese House លើវិថីព្រះស៊ីសុវត្ថិ៕
