កំពង់ធំ: ដោយមានកំណើតកើតជាមនុស្សមិនពេញលក្ខណៈ ឆ្អឹងអវយវៈបាក់ក្រិនខ្វេរខ្វង់ កាយរំកិលមិនរួច ដេកក្រាបតែនៅលើគ្រែគ្រប់នាទី ស្ដ្រីដែលកើតជំងឺងាយបាក់ឆ្អឹង ឬភាសាវេជ្ជសាស្ដ្រថា Osteogenesis imperfecta នៅតែមិនត្អូញត្អែរនឹងវាសនា មិនតវ៉ាព្រហ្មលិខិត ដែលបានតាក់តែងរូបខ្លួនជាមនុស្សពិការបែបនេះ តែប្រាថ្នាជម្រកសមរម្យ សម្លៀកបំពាក់ស្អាតបាត និងមានស្រូវពេញជង្រុក។
កញ្ញា សុខ ណេន អាយុ ២៨ ឆ្នាំ រស់នៅក្នុងស្រុកសាមគ្គីមានជ័យ ខេត្ដកំពង់ធំ មានអវយវៈដុះលូតលាស់មិនពេញលក្ខណៈ ដោយកើតមកផ្ទុកនូវជំងឺងាយបាក់ឆ្អឹង មានបងប្អូន ៤ នាក់ សុទ្ធតែជីវភាពក្រីក្រ។
ក្នុងវីដេអូឃ្លីប ដែលត្រូវបានសម្ភាសដោយព្រះតេជគុណនិមន្ដធ្វើសកម្មភាពមនុស្សធម៌គ្រប់ទីកន្លែងទូទាំងប្រទេសនា ពេលនោះ ស្ដ្រីវ័យជិត ៣០ ឆ្នាំដែលបញ្ចេញសំឡេងស្រដៀងនឹងក្មេងស្រីនិយាយមិនច្បាស់ បានរៀបរាប់ប្រាប់អំពីជីវភាពពេលបច្ចុប្បន្ន និងបំណងប្រាថ្នានាពេលអនាគតរបស់ខ្លួន។
គេងនៅលើគ្រែរនាបដៃម្ខាងដាក់កើយក្បាល និងដៃម្ខាងទៀត ឃើញដូចជាបាក់ជា ៣ កំណាត់ សុខ ណេន និយាយប្រាប់តេជគុណ កក្កដា សុភ័ណ្ឌ ដែលលោកបាននិមន្ដទៅជួបផ្ទាល់ក្នុងស្រុកសាមគ្គីមានជ័យថា៖ «ខ្ញុំចង់បានផ្ទះស្អាត ខ្ញុំចង់បានសម្លៀកបំពាក់ស្អាត និងស្រូវក្នុងជម្រុក។ ស្រូវអត់មាន។ ខ្ញុំមានបងប្អូន ៤ នាក់ សុទ្ធតែក្រីក្រ»។
វីដេអូឃ្លីបបន្ដជាមួយសំឡេងសាកសួរព័ត៌មានខ្លះៗពីព្រះតេជគុណ កក្កដា សុភ័ណ្ឌ ថា៖ «សុំឲ្យសប្បុរសជនជួយជាខោអាវ ដែលបងស្រី សុខ ណេន អត់មានសម្លៀកបំពាក់ស្លៀកពាក់សមរម្យ ដោយបងស្រី មានតែខោអាវមួយកុំប្លេជាប់ខ្លួនប៉ុណ្ណោះ»។
ភ្ជាប់ជាមួយនឹងប្រាក់ឧបត្ថម្ភផ្ទាល់ខ្លួនជូនដល់ស្ដ្រីពិការរូបនោះ ព្រះសង្ឃ កក្កដា សុភ័ណ្ឌ បានអំពាវនាវថា៖ «បងស្រីសុំរបស់របរហូបចុក ដោយសារមានជីវភាពខ្វះខាតមែនទែន។ ថ្ងៃនេះ អាត្មាភាពសំណូមពរញាតិញោមទាំងក្នុង និងក្រៅប្រទេសជួយតាមលទ្ធភាព»។
Osteogenesis imperfecta ជាប្រភេទជំងឺហ្ស៊ែនកម្រដែលប៉ះពាល់លើឆ្អឹងពីប្រភេទស្រាលរហូតដល់ធ្ងន់ធ្ងរ រួមមាន ស្នាមជាំខៀវ និងភ្នែកស ក្រិន របូតសន្លាក់ ត្រចៀកធ្ងន់ ពិបាកដកដង្ហើម និងបញ្ហាជំងឺមាត់ធ្មេញជាដើម៕