ក្រុងញូវយ៉ក: អ្នកច្នៃម៉ូដក្រចកតារារ៉េប Cardi B មិនខ្លាចនឹងលាតត្រដាងជីវប្រវត្ដិ និងដំណើរជីវិតវិវត្ដពីជីវភាពក្រីក្រតោកយាកទៅជាអ្នកមានទ្រព្យស្ដុកស្ដម្ភដោយពឹងអាស្រ័យលើការតស៊ូរបស់ខ្លួនបានប្រាប់វិបសាយព័ត៌មានល្បីៗមាន Dailymail, Metro និង Insider Edition ជាដើម។
ចេន្នី ប៊ុយ (Jenny Bui) ទទួលរហស្សនាមថាជា «រាជិនីក្រចក» ពេលនេះជាថៅកែហាងក្រចកល្បី ២ នៅទីក្រុងញូវយ៉ក និងជាប់ប្រជាប្រិយភាពខ្លាំង ដោយមានការគាំទ្រពីតារាល្បីៗថែមទៀត។
បច្ចុប្បន្នអ្នកស្រីជាបុគ្គលល្បីចំពោះការឌីហ្សាញម៉ូដក្រចកមានដាំគ្រឿងអលង្ការឲ្យតារាចម្រៀងរ៉េប Cardi B។ វិថីជោគជ័យរបស់អ្នកស្រី ប៊ុយ ហាក់មិនកើតឡើងដោយសារតោងអាលីបប្រជាប្រិយភាពតារាល្បីៗឡើយ។ ជាក់ស្ដែងអ្នកស្រីនៅចងចាំពីការរត់ភៀសខ្លួនសម័យសង្គ្រាមតាំងពីកុមារភាព។
អ្នកស្រី ប៊ុយ បានរំឭកថា៖ «កុមារភាពរបស់ខ្ញុំពិតជាលំបាកលំបិនណាស់។ ខ្ញុំធ្លាប់ឃើញមនុស្សជាច្រើនជាន់មីន និងស្លាប់នៅចំពោះមុខ។ វាពិតជាអាណោចអាធ័មណាស់។ ទោះបីជាពេលនេះជួនកាលខ្ញុំនៅតែសុបិនឃើញរឿងអតីតកាលនៅនឹងភ្នែក»។
អ្នកស្រីប្រសូតក្នុងប្រទេសកម្ពុជានៅចុងទសវត្សរ៍ឆ្នាំ ១៩៧០។ ឪពុករបស់អ្នកស្រីគឺជាចុងភៅ ហើយអ្នកម្ដាយលក់ភេសជ្ជៈតាមដងផ្លូវ។ អ្នកស្រីមានបងប្អូនរហូតដល់ ៨ នាក់។
ពេលអ្នកស្រី អាយុ ៥ ឆ្នាំខ្មែរក្រហមបានគ្រប់គ្រងប្រទេស និងធ្វើឲ្យឆាកជីវិតក្រឡាប់ចាក់ ។ អ្នកស្រី ប៊ុយ បាននិយាយថា៖ «ខ្ញុំគ្មានជម្រកជ្រកកម្ដៅ និងភ្លៀងឡើយ។ ខ្ញុំរស់នៅក្រោមលម្ហមេឃសុទ្ធសាធ។ យើងគ្មានសូម្បីតែស្បែកជើង និងសម្លៀកបំពាក់គ្របកាយសោះឡើយ។ អង្ករ ១ ស្លាបព្រា យើងត្រូវញ៉ាំគ្នា ៣០ នាក់។ យើងញ៉ាំដើមចេក យើងកាប់វារួចបកយកស្រទាប់ខ្ចីខាងក្នុងញ៉ាំ។ យើងឆ្លងមេរោគជាច្រើន»។
ទើបអាយុ ៨ ឆ្នាំអ្នកស្រីរត់ភៀសខ្លួនទៅកាន់ប្រទេសថៃ និងត្រូវបានគេទម្លាក់ចោលនៅភ្នំដែលពោរពេញដោយគ្រាប់មីនមរណៈ។
អ្នកស្រីបានប្រាប់ពីបទពិសោធជីវិតដ៏សែនវេទនាបំផុតដែលបានឃើញមនុស្ស ៧ នាក់បានស្លាប់ ព្រោះតែដណ្ដើមគ្នាផឹកទឹក។
អ្នកស្រី ប៊ុយ បានធ្វើអន្ដោប្រវេសន៍ទៅកាន់ប្រទេសកាណាដាតាំងពីក្មេងជំទង់ ដែលមានការឧបត្ថម្ភដោយបងប្រុសម្នាក់ និងចាប់ផ្ដើមអាជីពជាអ្នករត់តុ និងបេះផ្លែស្ដ្រូប៊ឺរីចិញ្ចឹមជីវិត។
ពេលអ្នកស្រី អាយុ ២២ ឆ្នាំអ្នកស្រីបានប្ដូរមករស់នៅខណ្ឌ Bronx ទីក្រុងញូវយ៉កជាមួយស្វាមី ។ អាយុ ២៥ ឆ្នាំអ្នកស្រីបានរៀនផ្នែកសម្អាង។
អ្នកស្រីបានបន្ដថា៖ «ខ្ញុំបានចូលធ្វើការនៅហាងសាឡនជាច្រើនដោយគ្រាន់តែឈរមើល។ ខ្ញុំចាប់ផ្ដើមកាត់ក្រចកខ្លួនឯង និងកាត់ដាច់សាច់ស្បែកដាច់ចេញឈាមកក្លាក់»។
អ្នកស្រីបានបើកហាងសាឡនដំបូងក្នុងសង្កាត់ Bronx រួចប្ដូរមកទីតាំងថ្មីនៅតំបន់ Harlem អស់រយៈពេល ១៦ ឆ្នាំ។ អ្នកស្រី ប៊ុយ បានឲ្យដឹងថាអ្នកស្រីជួបការលំបាកក្នុងការប្រកបរបរនេះពេលចាប់ផ្ដើមដំបូង។ អតិថិជនរិះគន់ និងមើលងាយអ្នកស្រីចំពោះបញ្ហាកង្វះបទពិសោធ។
ស្ដ្រីខ្មែរដែលខិតខំតស៊ូលើទឹកដីអាមេរិករូបនេះបានបន្ដថា៖ «ខ្ញុំនៅតែបន្ដពុះពារ ពីព្រោះខ្ញុំដឹងថា ខ្ញុំត្រូវតែចិញ្ចឹមកូន។ ខ្ញុំមានកូន ៣ នាក់ពេលនោះពិតជាលំបាក ពីព្រោះខ្ញុំជាស្ដ្រីមេម៉ាយចិញ្ចឹមកូនតែឯង»។
អ្នកស្រីមានទេពកោសល្យផ្ទាល់ខ្លួន និងយកលំនាំរចនាម៉ូដក្រចកតាមជប៉ុន ដែលនាំឲ្យអ្នកស្រីល្បីខ្លាំង។
អ្នកស្រី ប៊ុយ បានបញ្ជាក់ថា៖ «មិត្ដភ័ក្ដិខ្ញុំម្នាក់នៅជប៉ុន គាត់បានផ្ញើសៀវភៅ ១ ក្បាលបង្ហាញពីម៉ូដក្រចកស្អាតៗ។ ខ្ញុំតបថា អូ! ខ្ញុំគួរតែសាកល្បងធ្វើបែបនេះដែរ ពីព្រោះនៅសហរដ្ឋអាមេរិកអត់មានបែបនេះទេ។ តាំងពីពេលនោះខ្ញុំក៏ជាប់ងារជា រាជិនីក្រចក ដ៏ភ្លឺផ្លេក»។
អ្នកស្រីបានក្លាយជាបុគ្គលល្បីចំពោះស្នាដៃរចនាម៉ូដក្រចករហូតដល់តារាល្បី Yandy Smith ដែលជំរុញឲ្យអ្នកស្រីបង្ហោះរូបស្នាដៃក្នុងអ៊ីនស្តាក្រាមដែលបច្ចប្បន្នមានអ្នកគាំទ្រ ជិត ២០ ម៉ឺននាក់។
យ៉ាងណាក្ដី អ្នកស្រី ប៊ុយ នៅតែមានអ្នកមិនចូលចិត្តដែលអ្នកស្រីបាននិយាយលេងក្នុងវីដេអូសម្ភាសថា៖ «ដឹងទេថា បើគ្មានអ្នកស្អប់ យើងក៏មិនល្បីដែរ»៕ HR