.jpg)
អ្នកនាង សុត លីណា អ្នកគូររូបអប្សរាតូចដែលមានរូបរាងគួរឲ្យស្រឡាញ់ ។ ហេង ជីវ័ន
ភ្នំពេញៈ ត្រូវបានឆ្លាក់ចេញពីក្រដាសសៀវភៅពណ៌សបន្ថែមពណ៌ និងក្បាច់រចនាសម្លៀកបំពាក់រូបអប្សរាតូចៗ មុខមាត់ឃ្យូតៗដូចតុក្កតាគួរឲ្យស្រឡាញ់កំពុងទទួលបានការពេញនិយមប្រើជាកន្លាស់អាវ ស្ទិកឃ័របិទសៀវភៅ និងរូបលម្អអាវយឺតយ៉ាងស្រស់ស្អាត។
អ្នកនាង សុត លីណា វ័យ ២៨ ឆ្នាំគឺជាអ្នកផលិតអប្សរាតូចបានថ្លែងមក ភ្នំពេញ ប៉ុស្តិ៍ថា៖ «ដំបូងខ្ញុំគ្រាន់តែជាស្ត្រីមេផ្ទះម្នាក់ និងជួយគ្រប់គ្រងអាជីវកម្មរបស់គ្រួសារ ប៉ុន្តែពេលទំនេរខ្ញុំឆ្លៀតគូររូបដែលជាប្រភេទតុក្តតាឃ្យូតៗបែបកូនក្មេងដែលគួរឲ្យស្រឡាញ់ និងឈុតរបាំ។ ដោយសារតែខ្ញុំចូលចិត្តគូររូបតុក្តតាកូនក្មេងអ៊ីចឹងហើយ ទើបរូបអប្សរាដែលខ្ញុំបានគូរសុទ្ធតែជាប្រភេទតុក្កតាទាំងអស់ ហើយក្នុងនោះក៏មានការគោរព និងស្រឡាញ់រូបអប្សរាដើម ដែលជាវប្បធម៌ខ្មែរយើងផងដែរ»។
Little Apsara មានលក់ដូចជា ស្ទិកឃ័របិទលើសៀវភៅ ឬកុំព្យូទ័រ អាវយឺត កន្លាស់អាវ បន្តោងសោធម្មតា និងបន្តោងសោកុម្ម៉ង់ដាក់ Logo ក្រុមហ៊ុន ក្នុងតម្លៃចាប់ពី ២ ដុល្លារដល់ ៩ ដុល្លារ។ រូបទាំងអស់ត្រូវបានគូរឡើងក្នុងរូបរាងជាអប្សរា អ្នករបាំឈុតទេវតា ហនុមាន និងយក្សជាដើម។
ស្ទិកឃ័រ និងកន្លាស់អាវមានរូបអប្សរា និងយក្ស។ ហេង ជីវ័ន
ស្ថាបនិក Little Apsara អ្នកនាង សុត លីណា ក៏បានបង្ហាញពីរបៀបធ្វើអាវយឺតបិទរូបអប្សរាដូច្នេះថា៖ «ជ្រើសរើសរូបអប្សរាតូចមួយដែលមានភាពទាក់ទាញរួចគិតពីទម្រង់រូបភាព ខ្នាត ទីកន្លែងដែលត្រូវដាក់រូបអប្សរាតូចនៅលើក្រណាត់អាវយឺត និងរៀបចំព្រីនចេញដាក់លើក្រដាសទ្វេសម្រាប់អ៊ុតលើអាវយឺតរួចប្រើម៉ាស៊ីនអ៊ុតក្នុងសីតុណ្ហភាពខ្ពស់ ដើម្បីអ៊ុតអាវយឺត និងទុករហូតដល់អាវយឺតត្រជាក់ពិនិត្យមើលគុណភាពនៃរូបអប្សរាតូចដែលបានបិទនៅលើអាវយឺតបន្ទាប់ពីអ៊ុតរួច»។
Little Apsara ទើបតែមានលក់នៅក្នុងបណ្តាញសង្គមហ្វេសប៊ុកតែប៉ុណ្ណោះ ហើយអ្នកគាំទ្រគំនូរអប្សរានេះមានច្រើនទាំងភ្ញៀវជាតិដូចជាតាមបណ្ដាអាជីវកម្មដូចជាក្រុមហ៊ុន DHL Cambodia និងទឹកអំពៅខ្មែរ Cocane។
លើសពីនេះក៏មានអាណិកជនខ្មែររស់នៅប្រទេសបារាំងកំពុងទាក់ទងយកផលិតផលទាំងនេះទៅលក់បន្តនៅទឹកដីអឺរ៉ុបនោះផងដែរ។
អាវយឺតរំលេចរូបតុក្កតាអប្សរាតម្លៃ ៩ ដុល្លារ។ហេង ជីវ័ន
អ្នកច្នៃរូបអប្សរាតូចបានបន្តថា៖ «ដោយសារការស្រឡាញ់គំនូរតាំងពីតូច ដូច្នេះខ្ញុំព្យាយាមហ្វឹកហាត់សឹងតែរាល់ថ្ងៃ។ សរុបមកគឺខ្ញុំចេះច្នៃប្រឌិតរាល់គំនូរទាំងឡាយដោយខ្លួនឯងផ្ទាល់។ ខ្ញុំក៏សង្ឃឹមថានឹងអាចជួយទាក់ទាញកុមារជំនាន់ក្រោយៗមានការចាប់អារម្មណ៍ ស្រឡាញ់ ចង់ដឹងចង់ស្គាល់ពីលក្ខណសម្បត្តិរបស់អប្សរារបស់ប្រទេសយើងផងដែរ»។
បើសិនជា Little Apsara មានភ្ញៀវគាំទ្រកាន់តែច្រើន អ្នកនាងក៏មានបំណងបើកទីតាំងដាក់បង្ហាញរូបភាព និងគុណភាពនៃអប្សរាតូចឲ្យភ្ញៀវបានមកមើលផ្ទាល់ផងដែរ។
ទន្ទឹមនឹងមោទនភាពមានភ្ញៀវគាំទ្រច្រើន អ្នកនាង សុត លីណា ក៏បានបង្ហាញក្ដីបារម្ភផងដែរថា៖ «ខ្ញុំមានការបារម្ភជាខ្លាំងសម្រាប់ខ្លួនខ្ញុំផ្ទាល់ គឺខ្លាចមតិរបស់បណ្តាញសង្គម ឬមនុស្សមួយចំនួនយល់ច្រឡំ និងមិនទាន់យល់ច្បាស់ពីគោលបំណងដែលខ្ញុំគូររូបតុក្កតាកុមារឃ្យូតៗទាំងនេះឡើង ហើយខ្លាចថា ខ្ញុំមើលងាយ និងមិនឲ្យតម្លៃវប្បធម៌ជាតិយើង បែរជាយករូបអប្សរាមកច្នៃជាតុក្កតាទៅវិញ»៕
