ភ្នំពេញៈ បន្ទប់ផ្ទះល្វែងនៅលើដងផ្លូវ ៣៩០ ផ្ទុកទៅដោយប្រអប់កេសជាច្រើនតម្រៀបគ្នាជាជាន់ថ្នាក់ និងបន្ទប់ធ្វើការមានសមាជិក ៣ នាក់ កំពុងអង្គុយនៅមុខកុំព្យូទ័រធ្វើការរៀងខ្លួន ក្បែរធ្នើរតាំងចាន ស្លាបព្រា សម កាំបិត កែវទឹក ដែលមិនប៉ះពាល់ដល់សុខភាពរួមទាំងសៀវភៅនិយាយពីបរិស្ថានតាមប្រភេទនីមួយៗ។
អ្នកស្រី សេនឌី ខូថេន (Sandy Kotan) វ័យ ៥៥ ឆ្នាំ មកពីរដ្ឋអារីហ្សូណានៃសហរដ្ឋអាមេរិកជាអ្នកនាំផលិតផលធ្វើពីកាកអំពៅបានប្រាប់មក ភ្នំពេញ ប៉ុស្តិ៍ ថា៖ «ខ្ញុំបានចេញពីប្រទេសកំណើតតាំងពីឆ្នាំ ២០០១ ហើយបានប្រើពេលរស់នៅហុងកុង ៧ ឆ្នាំ សិង្ហបុរី ៧ ឆ្នាំបន្ទាប់មកខ្ញុំក៏រស់នៅប្រទេសកម្ពុជាបាន ៤ ឆ្នាំមកហើយ។ ខ្ញុំស្រឡាញ់កម្ពុជា និងប្រជាជនខ្មែរ ហើយខ្ញុំចង់ជួយពួកគេឲ្យយល់ថា ប្លាស្ទិកមិនមែនគ្រាន់តែប៉ះពាល់ដល់បរិស្ថាននោះទេ ប៉ុន្តែវាក៏ប៉ះពាល់ដល់សុខភាពផងដែរ»។
អ្នកស្រីបានបន្ថែមទៀតថា៖ «ខ្ញុំបាននាំផលិតផលជាច្រើនដែលមិនប៉ះពាល់ ហើយវាអាចលាយបានដោយខ្លួនឯងដូចជា ប្រអប់ដាក់បាយ ចានស្នោ ស្លាបព្រា កាំបិត សម ដែលធ្វើពីកាកអំពៅ ប៉ុន្តែចំពោះស្លាបព្រា កាំបិត និងសម ខ្ញុំមិនលក់មួយៗទេគឺលក់រួមគ្នាចងជាដុំ។ ក្រៅពីនេះក៏នៅមានប្រភេទកំប៉ុងទឹកមានច្រើនខ្នាតកាបូបសម្រាប់ដាក់ម្ហូបអាហារបាន ប្រអប់បាយ និងទុយោបឺត ដែលមើលទៅដូចជាជ័រ ប៉ុន្តែវាមិនប៉ះពាល់ដល់សុខភាពនោះទេ ព្រោះវត្ថុទាំងនេះខ្ញុំបានផ្សំឡើងដោយសារធាតុ ១០ មុខដែលគ្មានជាតិគីមីអាចបង្កមានគ្រោះថ្នាក់ឡើយ»។
ចំពោះផលិតផលដែលធ្វើមកពីកាកអំពៅមានអត្ថប្រយោជន៍ជាច្រើនដល់បរិស្ថាន ព្រោះវាបានធ្វើឡើងដោយកាកអំពៅដែលជារបស់ធម្មជាតិដោយវាអាចរលួយបានដោយខ្លួនឯងដូចជាក្រដាសដែលធ្វើពីកាកអំពៅដូច្នេះដែរ។
ចំណែកឯផលិតផលដែលមានរូបរាងដូចជាជ័រវិញគឺបានផ្សំឡើងពីសារធាតុម្យ៉ាងគឺស៊ីលីកូន និងមិនប៉ះពាល់ដល់មនុស្សក្នុងការប្រើទេ។ វាប្រើបានយូរ ហើយអាចបត់បានធ្វើឲ្យងាយស្រួលយកតាមខ្លួនបាន។
សម្រាប់ផលិតផលទាំងនេះគឺបានដាក់លក់នៅជាច្រើនភោជនីយដ្ឋានជាង ១២០ ភោជនីយដ្ឋាន រីឯដប និងសម្ភារធ្វើពីស៊ីលីកូនមានដាក់នៅ Eleven One Kitchen (TTP and BKK1) ដៃខ្មែរ ហាងកាហ្វេ Mere និង Farm។ នៅសៀមរាប ផលិតផលអ្នកស្រីមាននៅហាង Babel Eco Refill Shop ហាង The New Leaf Eatery និងហាងនំប៉័ងប៉ារីស។
ដោយលោកស្រី សេនឌី ខូថេន បានបញ្ជាក់ថាមានភោជនីយដ្ឋានជាច្រើននៅកម្ពុជាបានសំណូមពរអ្នកស្រីថា «សុំមិនទទួលផលិតផលអ្វីក្រៅពីផលិតផលធ្វើពីកាកអំពៅ និងសុំមិននាំចូលរបស់ដែលធ្វើពីថង់ប្លាស្ទិកបន្តទៀតនោះទេ»។
ម្ចាស់ក្លិប Rothary និងជាអ្នកនាំចូលផលិតផលធ្វើពីកាកអំពៅបានបញ្ជាក់ទៀតថា៖ «ខ្ញុំបាននាំចូលផលិតទាំងនេះមកពីប្រទេសចិន ប៉ុន្តែខ្ញុំក៏មានគម្រោងថា ស្វែងរកអ្នកដែលអាចផលិតផលិតផលទាំងនេះបាននៅក្នុងកម្ពុជាចាប់ដៃគូជាមួយ CamConscious Tourism និងសហគមន៍ដែលពួកគេធ្វើការជាមួយ ហើយខ្ញុំក៏នៅតែបន្តស្វែងរកទំនិញដែលអាចប្រើបានជំនួសប្លាស្ទិក។ ខ្ញុំមានកម្លាំងចិត្ត ព្រោះមនុស្សមួយចំនួនបានស្នើសុំឲ្យខ្ញុំនាំចូលវត្ថុស្នេហាបរិស្ថានកាន់តែច្រើន ដូចជាចាន ដាក់ស៊ុប និងសាលាដដែលងាយរលាយមិនប៉ះពាល់ដល់បរិស្ថាន»៕