ភ្នំពេញ៖ បណ្តុំរូបថតនានា ដែលបានថតផ្តិតចេញពីសំណៅដើម ផ្តល់ដោយជនជាតិឆែក និងតាមស្ថាប័នរដ្ឋបាលមន្រ្តីស្ថានទូតឆែក នាសម័យកាលមុន គឺតាំងពីដើមទសវត្សរ៍ទី ៨០ មកនោះ ត្រូវបានស្ថានទូតសាធារណរដ្ឋឆែកប្រចាំប្រទេស កម្ពុជា បានចងក្រងបង្កើតជាកម្រងពិព័រណ៍ ដោយមានរូបថតចំនួន ៣៦ ផ្ទាំង ដែលនឹងបើកសម្ពោធ នៅល្ងាចថ្ងៃទី ១៧ ខែតុលានេះ ក្រោមអធិបតីភាពរដ្ឋមន្រ្តីក្រសួងវប្បធម៌ និងវិចិត្រសិល្បៈ។
ពិព័រណ៍រូបថតនេះ នឹងដាក់តាំងចំនួន ១៥ ថ្ងៃ គឺចាប់ពីថ្ងៃទី ១៧ ដល់ថ្ងៃទី ៣១ ខែ តុលា ឆ្នាំ ២០១៩ នៅឯសារមន្ទីរជាតិក្នុងរាជធានីភ្នំពេញ។ ខណៈការតាំងពិព័រណ៍ ដែលរៀបចំដោយសាធារណរដ្ឋឆែក និងព្រះរាជាណាចក្រកម្ពុជានេះ ក្រោមប្រធានបទមួយឈ្មោះថា «ចំណងមិត្តភាពតាមពេលវេលា»។
បើតាមប្រសាសន៍លោក វ្ល៉ាទីមីល តេសារ ជាភារធារី ទទួលបន្ទុកកិច្ចការនៃស្ថានទូតសាធារណរដ្ឋឆែក ប្រចាំប្រទេស កម្ពុជា បានឲ្យដឹងថា៖ «តាមរយៈការតាំងពិព័រណ៍នេះ ស្ថានទូតសាធារណរដ្ឋឆែកមានបំណង ដើម្បីរំឭកទៅដល់ការជ្រើសរើសនៃបំណែកគួរឲ្យចាប់អារម្មណ៍ពីវិស័យនយោបាយ សេដ្ឋកិច្ច និងវប្បធម៌ ដែលមានសារៈសំខាន់ ចំពោះទំនាក់ទំនងរវាងប្រទេសទាំង ២ ហើយមានឥទ្ធិពលយ៉ាងខ្លាំងលើការតម្រង់ទិសរបស់ខ្លួន»។
លោក ភារធារី បានបន្តឲ្យដឹងទៀតថា៖ «តាមរយៈការប្រមូលផ្តុំរូបថត និងឯកសារសំណៅដើមនានាទាំងនោះ ភ្ញៀវនឹងមានឱកាសក្នុងការសម្លឹងមើលទៅប្រវត្តិសាស្រ្ត និងបច្ចុប្បន្នភាពនៃទំនាក់ទំនងរបស់ប្រទេសទាំង ២ ដែលបានបង្ហាញឲ្យឃើញពីសក្តានុពល និងមិត្តភាព។ ហើយការបង្ហាញរូបថត និងឯកសារដែលភាគច្រើនអ្នកអាចឃើញបានមកពីបណ្ណសារដ្ឋាននៃការិយាល័យប្រធានាធិបតីឆែក បណ្ណសារដ្ឋាននៃក្រសួងការបរទេសឆែក និងពីទិន្នន័យនៃទីភ្នាក់ងារសារព័ត៌មានឆែក។ ផ្នែកមួយនៃការតាំងពិព័រណ៍នេះ ត្រូវបានផ្តល់ជូនជាឧទាហរណ៍ជាក់ស្តែងបង្ហាញពីកិច្ចសហប្រតិបត្តិការនៃអ្នកជំនាញការនៃប្រទេសទាំង ២ ភ្លាមៗ បន្ទាប់ពីមានការដួលរលំនៃរបបខ្មែរក្រហមក្រោយឆ្នាំ ១៩៧៩ ដែលគេហៅថា «ឆ្នាំសូន្យ» នៅក្នុងប្រទេស កម្ពុជា។ ជនជាតិឆែកម្នាក់ រស់នៅសព្វថ្ងៃ ដែលជាអ្នកចូលរួមក្នុងកិច្ចសហប្រតិបត្តិការវិស័យឧស្សាហកម្មព្រៃឈើ បានផ្តល់ជូននូវសំណុំឯកសារសំណៅដើម និងរូបថតផ្ទាល់ខ្លួនរបស់គាត់ដែលមួយចំនួនស្តីពីរាជធានីភ្នំពេញ និងប្រទេស កម្ពុជា នាសម័យកាលនោះ»។
សាធារណរដ្ឋឆែក ដែលជាអ្នកស្នងតំណែងពីអតីតប្រទេស ឆេកូស្លូវ៉ាគី បានរក្សាទំនាក់ទំនងការទូតជាមួយនឹងប្រទេស កម្ពុជា មកទល់នឹងឆ្នាំ ២០១៩ នេះគឺមានរយៈពេល ៦៣ ឆ្នាំមកហើយ ខណៈប្រជាជនឆែកក៏នៅតែជាដៃគូដ៏រឹងមាំរបស់ព្រះរាជាណាចក្រកម្ពុជាដដែល។
លោក វ្ល៉ាទីមីល តេសារ ភារធារីទទួលបន្ទុកកិច្ចការស្ថានទូតសាធារណរដ្ឋឆែក នៅកម្ពុជា បានបន្ថែមថា៖ «ទំនាក់ទំនងល្អរវាងប្រទេស និងប្រទេស គឺផ្អែកលើការទុកចិត្តទាំងសងខាង ការជឿជាក់លើការទុកចិត្ត គឺជាខ្លឹមសារសំខាន់សម្រាប់មិត្តភាព។ ការតាំងពិព័រណ៍នេះអាចឲ្យអ្នក ទស្សនា មើលឃើញទៅដល់អតីតកាល ដែលជាចំណេះដឹងល្អ និងសំខាន់។ ទោះជាយ៉ាងណា អតីតកាលគឺគ្រាន់តែជាមូលដ្ឋានសម្រាប់ការយកចិត្តទុកដាក់ខ្លាំងនៃអនាគតរួមរបស់ប្រទេសទាំង ២»៕